Read lunyore ESEKIELI 30 Bible Online

ESEKIELI 30 - lunyore bible

ESEKIELI 30

¹OMWAMI yal'loma khandi.

²Yaboola mbu, “Omwana womundu, rooba ma olandie ake ise MWAMI Nyasaye, mboolanga. Okhwola okambe amang'ana yaka mbu: Litukhu liesibi esikali litsanga!

³Litukhu tsana lili ahembi, litukhu elio MWAMI nakhole ling'ana, Litukhu eliamalumbesi nende eminyakhano nabibe khumahanga.

⁴Lihe liakhabe Emisiri, ne okhwelil'la okhwinji nakhube Etsiopia. Abenji mu Misiri bakherwe; Esibala siakhayaakwe ma silalekhwe nisisasikhile.

⁵“Lihe yilio liakhere kata abasikari abakombolwa okhurula Etsiopia, Ludia, Libia, Ebuarabia, Kubi, nende kata okhurula mubandu banje bene.”

⁶OMWAMI Nyasaye aboolanga mbu, “Okhurula khwitookho lia Mikitoki elili esinyolu okhwola Aswani elili enandete, yabo bosi abasoolanga Emisiri bakher'rwe mwihe. Abasikari be Misiri abelolanga nabakhuywe. Ise OMWAMI Nyasaye mal'le okhuboola.

⁷Lihanga lie Misiri liakhabe nes'soma okhusila musibala siosi, ma amatookho kalio kakhalekhwe kosi.

⁸Olwa ndakhahambie omul'lo musibala sie Misiri khandi olwa bosi abasisoolanga bakhabe nibeer'rwe, nilwo olwa bakhamanye mbu ise nise OMWAMI.

⁹“Olwe litukhu yilio naliole ma Emisiri nekhuyilwe, narume abarumwa mutsimeeli okhuchema oburima Abaetsiopia abaralikhwo nesikha na Bamisiri, ma Abaamisiri nabatechesibwe. Litukhu yilio litsanga!”

¹⁰OMWAMI Nyasaye aboolanga mbu, “Narumikhile Nebukadinesa omuruchi wa Babulonia okhwikal'la Emisiri okhuyoola obuhinda.

¹¹Ye nende abasikaribe ababula tsimbabasi nabetse okhukhuya esibala. Nabaseere Emisiri nende tsinganga, ne esibala nasitsulemwo abafu.

¹²Naakhamie omuchela kwa Naili ma nare abandu be Misiri mumakhono kabandu ababi. Abarende bakhamume esibala siosi. Ise OMWAMI mal'le okhuboola.”

¹³OMWAMI Nyasaye aboolanga mbu, “Naakhuye ebiniini nende abanyasaye bobubehi aba Memufisi. Siyakhabekhwoho omundu wosi owakharuke Emisiri tawe, khandi ndakhatechesie abandu bosi.

¹⁴Ndakhakhole enandete we Misiri okhuba likunda ma ndakhahambie mwitookho lia Soani omul'lo elili esinyolu. Nambane esinyasio khwitookho likhongo lia Tsebesi.

¹⁵Nandekhe litookho lia Pelusiumu elili oluhinga olukhongo lwe Misiri, okhuhul'la obusiro bwobululu bwanje. Namume obuhinda bwa Tsebesi.

¹⁶Namambie omul'lo mu Misiri, ma Pelusiumu nalibe musibeela esikali. Amasisi ka Tsebesi nakafunakwe, ma litookho liakhetsulemwo omukhul'la kwamaatsi.

¹⁷Ababuukha bamatookho ka Heliopoli nende Bubasitisi nabafwile mwihe, ne abandu bandi bakhahilwe mubuhambe.

¹⁸Esiilima sikhabe mu Tahapanihesi olwa nafunake obunyalibwe Misiri nende okhuleera esiakamo khutsingufu etsiabali okhwelol'la. Lilumbesi liakhafuunikhe Emisiri, ne abandu bamatookho kalio kosi bakhabe ababohe.

¹⁹Olwa nandeere esinyasio khu Misiri munjila iyi, nabamanye mbu ise nise OMWAMI.”

²⁰Mwitukhu liakhane nakhataru eliomwesi kwokhuranga mumuhika kwelikhumi namulala okwokhwatisibwa khwefwe, OMWAMI yal'loma n'nase.

²¹Yaboola mbu, “Omwana womundu, mal'le okhufunaka omukhono okwomuruchi we Misiri. Abulaho omundu okuboheleye nohomba okuleteleye nende omukoye khe kube okunyala okhuhona ma kube netsingufu chiokhuchinga olukanga khandi.

²²Khe luno kano niko ake ise OMWAMI Nyasaye mboolanga; Ndi omusuku womuruchi we Emisiri. Nzitsanga okhufunaka amakhono kaake kosi, omulamu nende okundi okwamala okhufunikha, ma olukanga nalukwe okhurula mumukhonokwe.

²³Nzitsanga okhusalaania Abaamisiri musibala siosi.

²⁴Ma nakhole amakhono komuruchi wa Babulonia okhuba netsingufu ma naare olukanga lwanje mumakhono kaake. Nebutswa nafunake amakhono komuruchi we Misiri, ma nayekane ma nafwile mutsimoni tsiomusuku uwe.

²⁵Yee, namukhole okhuba omutekhele ma naralisie omuruchi wa Babulonia. Olwa namuhe olukanga lwanje ma naluchoomie khu Bamisiri, siomundu namanye mbu ise nise OMWAMI Nyasaye.

²⁶Nasalaanie Abaamisiri musibala siosi. Khe nilwo olwa nabamanye mbu ise nise OMWAMI.”