Read lunyore ESEKIELI 31 Bible Online

ESEKIELI 31 - lunyore bible

ESEKIELI 31

¹Khwitukhu liokhuranga eliomwesi kwakhataru mumuhika kwelikhumi namulala okwokhwatisibwa khwefwe, OMWAMI yal'loma n'nase.

²Yaboola mbu, “Omwana womundu, bool'la omuruchi we Misiri nende abandu baabe bosi mbu: Mako obwa muli abakufu! Ndakhamuchelania khulusina?

³Mufwana[6] singa omusiita okuli mu Lebanoni, kuli nende tsisaka tsindahi, etsiesinikha, omusaala omurambi okhusila okwolanga khumalumbesi.

⁴Amaatsi kalinjiho khulwokhukukhusia, nende emichela chiom'maloba musi echiokhukulisia. Chiali okhusama amaatsi ahomusaala kwali nikukhulanga, ma nichihila emichela chiamaatsi khumisaala chiosi echiom'mutsuru.

⁵Sichila omusiita yikwo kwasamwakhwo amaatsi akahela, kwakhula nikurambiha okhuyomba echindi. Tsisaka tsiakwo tsiameetekha obusiro khandi nichirambiha.

⁶Tsinyama nabulimo tsiebul'la abaana batsio mubiinikha biakwo; Amahanga kesibala kahuluukhila mubiinikha biakwo.

⁷Mako obwomusaala yikwo kwali nelikondo lilahi; kwali omurambi okhusila, nende tsisaka tsirambi po. Emisi chiakwo chiakhula muusi okhwola hasi mukari khumichela echili hasi weliloba.

⁸Sikwaliho omusiita mumukunda kwa Nyasaye, okwakhanyala okhuhelanibwa n'nakwo tawe. Sikwaliho omusaala kundi kwosi okwali netsisaka singa etsiakwo tawe, kata sikwali omusaala omulambilu okwali okhwelokha n'nakwo. Sikwaliho omusaala kwosi mumukunda kwa Nyasaye okwali okwelikondo lilahi okhusila tawe.

⁹Ndali okhukulomba okwelikondo khandi okwetsisaka tsialandala. Emisaala chindi chia Edeni, omukunda kwa Nyasaye, chiali neimbalikha khumusaala yikwo.

¹⁰“Kho luno, Ise OMWAMI Nyasaye nzia okhukhubool'la esianasiekholekhe khumusaala kula okwali okhukhula ma nikwola khumalumbesi. Olwa kwakhula ma nikurambiha, kwali nesunga ingali,

¹¹Kho mal'le okhukusuula ne nandekhe omuruchi welihanga lindi nakubukule. Nahelesie omusaala yikwo esinyasio esikukwan'ne khububi bwakwo.

¹²Abandu bebibala bie ebucheni ababula tsimbabasi nabakuremake, nabakukoke ma nabakulekhe. Tsisaka tsiakwo nende ebitonye nabikwe khubuli sikulu nende khubuli libanda elili musibala. Amahanga kosi akamenyanga musiinikha siakwo nakarulemwo nikatsia.

¹³Amanyonyi naketse okhuyeela khumusaala okukwiye, ne tsinyama nabulimo natsichende khutisaka tsiakwo.

¹⁴Ma kho, okhurula luno, kubulaho omusaala kwosi kata kube okwatsukhil'lwakhwo amaatsi mbwena okwakharambihe singa omusaala yikwo, nohomba okwakhahinie omurwe kwakwo okhubir'ra mumalumbesi ma kube omurambi singa mbwo tawe. Tsiosi tsilekhelwe tsifwe singa abaana babandu. Bosi bakhalachilwa okhuhambana nende yabo abatsitsanga hasi musibala sie Makombe.”

¹⁵Yaka niko ako MWAMI Nyasaye aboolanga: “Khwitukhu yilio olwomusaala kwakhatsie musibala sie Makombe, ndakhalekhe amaatsi akali hasi weliloba kakufuunikhe singa esilolelo siokhwekhuula. Ndakhekal'le emichela ne sindakhalekhe emichela eminji okhubira tawe. Sichila omusaala kufwiye, nandeere esiilima khubikulu bia Lebanoni khandi ndakhachile emisaala chiosi etsiom'mutsuru okhuniala.

¹⁶Olwa ndakhakuhile hasi musibala sie Makombe, liyoka liokhukwa khwakwo liakhatechesie amahanga. Emisaala chiosi echia Edeni nende emisaala chiosi echiasamwa chia Lebanoni echili emilahi khandi echiatsia musibala sie Makombe chiakhasangal'le okhukwa khwakwo.

¹⁷Chiakhatsie n'nakwo musibala sie Makombe okhutsokana nende yitsio etsiamala okhukwa. Ne yabo bosi abamenyanga musiinikha siakwo bakhasalanibwe okhutsia mumahanga.

¹⁸“Omusaala yikwo nomuruchi we Misiri nende abandube. Kata emisaala chili mu Edeni sichialikhwo emirambi khandi echiokhuyanzisia singa kwo tawe. Nebutswa luno singa emisaala echia Edeni, omusaala yikwo nakutsie hasi musibala sie Makombe okhuhambana nende yabo abarali aba Nyasaye nende yabo abali okhwir'rwa mubulwani. Ise Mal'le okhuboola,” nimbwo OMWAMI Nyasaye aboolanga.