Read lunyore ESEKIELI 32 Bible Online

ESEKIELI 32 - lunyore bible

ESEKIELI 32

¹Khwitukhu liokhuranga eliomwesi kwelikhumi nakhabili mumuhika kwelikhumi nakhabili okhurula nikhwatisibwa mubuhambe, OMWAMI yal'loma n'nase.

²Yaboola mbu, “Omwana womundu, haana lichetsiyio liralilu khumuruchi we Misiri. Mubool'le amang'ana yaka okhurula khu ise: Wekholanga singa esimba mumahanga, nebutswa oli butswa singa ing'wena eyilukhilanga m'maatsi komuchela. Otubuulanga amaatsi nebilenje bibio ne niwononia emichela.

³Olwa amahanga amenji nakebunjikhe halala, nakhutil'le muneti yanje ma nandekhe abandu nabakhukhwese okhukhuhila khuluchinga.

⁴Nakhufuube esioba khwiloba ma nandeere amanyonyi kosi nende tsinyama tsiokhusibala okhukhulia.

⁵Ndakhetsusie omubilikwo okubolanga mubikulu nende mumabanda.

⁶Ndakhasundule amatsahiko okhwitsula khubikulu nende mumichela.

⁷Olwa ndakhakhumume ndakhafuunikhe likulu nende okhuhiniaho tsinyininyini. Eliuba liakhebise emukongo wamalumbesi, ne omwesi sikwakhabale tawe.

⁸Ndakhasimie obulafu bwosi obwo mwikulu ma ndakhare esibala siosi musiilima. Ise OMWAMI Nyasaye mal'le okhuboola.

⁹“Amahanga amenji kakhabe nesihenda mwoyo olwa ndakhalandie amang'ana kokhumumwa khukhwo mubibala ebiosili okhuhul'lakhwo.

¹⁰Akanakhole khuibe nakatechesie amahanga amenji. Olwa namusonie olukanga lwanje, abaruchi bakhatechesibwe okhusila. Khwitukhu liokhumumwa khukhwo bosi bakhatechele muburi khulwobulamu bwabwe.”

¹¹OMWAMI Nyasaye abool'langa omuruchi we Misiri mbu: “Olukanga lwomuruchi wa Babulonia nalukhwitsile.

¹²Nandekhe abasikari okhurula mumahanga amalulu okhuchomola tsinganga tsiabwe ma beere abandu benywe bosi. Abandu bosi nende ebindu bindi ebiamwelol'langakhwo nabimumwe.

¹³Nasinzile ebiayo bienywe siahabundu heliyabo liamaatsi lili. Abandu sibakhabeho nohomba kata tsing'ombe khulwa okhutuubula amaatsi khandi tawe.

¹⁴Nandekhe amaatsi kenywe nakalengele ma kalabe, khandi nandekhe emichela chienywe chibire sila okhutuubuukha. Ise OMWAMI Nyasaye mal'le okhuboola.

¹⁵Olwa ndakhakhole Emisiri okhukwa likunda, khandi olwa namume bosi abamenyeleyo, nabamanye mbu ise nise OMWAMI.

¹⁶Lichetsiyio litinyu yili liakhakwe olwembo lwamasika. Abakhasi bamahanga nabalwembe nibekhuulanga khulwe Misiri nende abandu bayo. Ise OMWAMI Nyasaye mal'le okhuboola.”

¹⁷Khwitukhu lielikhumi nakharano eliomwesi kwokhuranga mumuhika kwelikhumi nakhabili okhurula nikhwatisibwa mubuhambe, OMWAMI yal'loma n'nase.

¹⁸Yaboola mbu, “Omwana womundu, ekhuule khulwa abandu be Misiri abenji. Obahile musibala sie Makombe halala namahanga kandi amakufu.

¹⁹Babool'le mbu, “Mupaalanga mbu muli abelikondo lilahi okhuyomba omundu undi wosi noho? Namutsie musibala sie Makombe, ma mukoneyo mubandu abaramanya Nyasaye.

²⁰“Abandu be Misiri nabafwe halala ne yabo abali okhwir'rwa mubulwani. Olukanga lwerechekhele okhubeera bosi.

²¹Etsisawoni tsieifuma nende yabo bosi abakhonyel'le Emisiri okhulwana lihe, benjisianga Abaamisiri musibala sie Makombe. Bahanzukhanga nibaboola mbu, ‘Abandu abaram'manya Nyasaye abali okhwir'rwa mubulwani betsele hano, ne nibo abakon'ne hano yaba!’

²²“Asiria lili ebwene y'yo halala nebilindwa biabasikari balio bosi. Bosi bali okhwir'rwa mubulwani,

²³ne ebilindwa biabwe bili mubukono obwatsia olutungu musibala sie Makombe. Abasikari balio bosi ber'rwa mubulwani ne ebilindwa biabwe biabotokhana esilindwa sialio. Ne kata olundi batekesia esibala sia abali mwoyo.

²⁴“Elamu lili ebwene y'yo ne ebilindwa biabasikari balio bialibotokhana. Bosi bali okhwir'rwa mubulwani, ne bamala nibatsia musibala sie Makombe nibasili okhusebwa. Olwa bali nibasili mwoyo, betsusia ebiriisio habundu hosi, nebutswa luno bafwa ma bali mutsisoni.

²⁵Elamu liakona halala nende yabo aber'rwa mubulwani, ne ebilindwa biabasikari balio bialibotokhana. Bosi sibasebwa tawe, ne bosi bali okhwir'rwa mubulwani. Olwa bali nibasili mwoyo betsusia ebirisio habundu hosi. Nebutswa luno bafwa ma bali mutsisoni, khandi basanganga musibi esieyabo aber'rwa mubulwani.

²⁶“Mesheki nende Tubali kali ebwene y'yo halala nebilindwa biabasikari bako nibiakabotokhana hosi. Bosi sibasebwa tawe, khandi bosi ber'rwa mubulwani. Ne kata olundi batekesiakhwo abali mwoyo.

²⁷Sibaali okhuyabilwa nende oluyali singa etsisawoni tsiakhale etsieifuma etsiayabilwa nebilasan'no biosi ma nibatsia n'nabio musibala sie Makombe tawe; okhuba abandu boluyali bayabilungwa netsinganga tsiabwe nitsireywe emurwe wabwe ne ebikhumba biabwe nibireywe khumibili chiabwe. Abandu abakufu yabo olundi bali nobunyali obwinji obwokhuriisia abandu abali mwoyo.

²⁸“Nimbwo Abaamisiri nabakone nibatubuywe mubandu abarasebwa abali okhwir'rwa mubulwani.

²⁹“Edomu lili ebwene y'yo nende abaruchi balio nabaami balio. Bali abasikari abakufu, nebutswa luno bafwa ma bali musibala sie Makombe halala nabandu abarasebwa abali okhwir'rwa mubulwani.

³⁰“Ababaruchi bosi besinyolu bali ebwene y'yo, khandi Abasidoni baliho. Obunyali bwabwe olundi bwetsusia ebiriisio musibala nebutswa luno bafwitsanga nibetsuye netsisoni, yabo abali okhwir'rwa mubalwani ma bayabilwa, nibasili okhusebwa. Banyoolanga tsisoni singa yabo abatsitsanga musibala sie Makombe.

³¹“Okhulolekha khweyabo bosi abali okhwir'rwa mubulwani khwakhabe obuhotselekhi khumuruchi we Misiri nende abasikaribe.” OMWAMI Nyasaye umal'le okhuboola.

³²“Ndali okhuchila omuruchi we Misiri nasandia abali mwoyo, nebutswa ye nende abasikaribe bosi naberwe ma nabayabilwe okhutsia okhuhuluukha halala ne yabo bosi abarasebwa abafwilanga mubulwani.” OMWAMI Nyasaye umal'le okhuboola.