Read lunyore ESEKIELI 34 Bible Online

ESEKIELI 34 - lunyore bible

ESEKIELI 34

¹OMWAMI yal'loma n'nase.

²Yaboola mbu, “Omwana womundu, fukula abemeli ba Isiraeli. Rooba nobabool'langa ake Ise, OMWAMI Nyasaye, mboolanga khubo kano: Mulitsiboolelwa inywe abaayi ba Isiraeli! Mwehendelanga abene nebutswa simutendanga amakondi tawe.

³Munywetsanga amabeele, nimwebiikha tsingubo etsialombwa okhurula khubwoya, nende okhwira nende okhulia amakondi amalahi. Nebutswa simutendanga amakondi tawe.

⁴Musili okhuhendelakhwo amatekhele kata okhuhoniakhwo yako akali amalwaye, kata okhubohel'la yako akasaliye, kata okhuchelesiakhwo yako akasalaniye ehale, nohomba okhurunilisia yako akali nikakor're tawe. Musilenje sieyako mukakhupianga esibi.

⁵Sichila amakondi sikaali nomwayi tawe, kali okhusalaana, ma tsinyama nabulimo tsiali okhukeera ma nitsikalia.

⁶Kho amakondi kanje kachendachenda mubikulu ebirambi nende ebimbichiti. Kali okhusalaana khusibala siosi, ne omundu siyaliho owokhukaruna, nohomba owateema okhukanyoola tawe.

⁷“Kho luno inywe abaayi, hulile ake Ise OMWAMI mubool'langa.

⁸Siahene singa obwe Ise ndi Nyasaye oli mwoyo, bwakhabeye obulahi mulambulila. Amakondi kanje kamala okhuseerwa nende tsinyama nabulimo etsiali okhukeera nende okhukalia sichila omwayi siyaliho tawe. Abaayi banje sibateema okhuruma amakondi tawe. Behendelanga abene ne sibahendelanga amakondi tawe.

⁹Kho mbulile, inywe abaayi.

¹⁰Ise, OMWAMI Nyasaye, khalakanga mbu ndi omusuku wenywe. Nambinie amakondi kanje khwinywe ma sindakhamulekhe inywe okhuba abaayi bako khandi tawe; kata khandi sindakhalekhe inywe okhwehendela abene tawe. Nambonokosie amakondi kanje okhurula mwinywe ne sinambuchil'le mukalie tawe.

¹¹“Ise OMWAMI Nyasaye, mubool'langa mbu, Ise omwene nakhaabe amakondi kanje ma nangaliisie

¹²singa butswa abaayi bahendelanga amakondi kabwe akali nikasalaana ma nikaleerwa halala khandi. Nangakalusie okhurula habundu hosi ahakali nikasalanibwa mwitukhu yilio liesiilima khandi eliomunyakhano.

¹³Nangahiinie okhurula mubibala bindi, ningabunjikha halala, nende okhukachelesia musibala siako siene. Nangemel'le okhukakalusia mubikulu nende khumichela chia Isiraeli ma ndakhakaaye mubwayilo obulahi.

¹⁴Nangalekhe nakaaye sila omunyakhano mubwayilo bwomusikulu, obwomumabanda nende mubwayilo bwobunyasi ob'bisi obwesibala sia Isiraeli.

¹⁵Ise, omwene nambe omwayi wamakondi kanje, ne nanganyol'le habundu hokhuhuluukhila. Ise, OMWAMI Nyasaye, mal'le okhuboola.

¹⁶“Nakhaabe yako akakora, nandeere yako akachendachendanga ehale, nambohel'le yako akasaliye, khandi nandese yako akali amalwaye, nebutswa yako akakhomela khandi akali netsingufu nangamume sichila ndi omwayi okholanga akali akahabwene.

¹⁷“Khe luno, inywe esiayo sianje, Ise, OMWAMI Nyasaye, mubool'langa mbu nakhalachile siabuli mulala khandi nambinie abalahi okhurula khubabi, amakondi okhurula khutsimbusi.

¹⁸Abalala khwinywe sibekuranga olwa balitsanga obunyasi obulahi tawe; kata musen, nanga hasi obwa muralitsanga! Munywetsanga amaatsi amalahi ma mutubuula aka muranywetsanga!

¹⁹Amakondi kanje kandi kalitsanga obunyasi obwa musen'nanga hasi nende okhunywa amaatsi akamutubuulanga.

²⁰“Kho luno, Ise OMWAMI Nyasaye, mubool'langa mbu nakhalake esiina hakari henywe inywe amakondi amakufu nende amakondi amatekhele.

²¹Mwalumba amalwaye elubeka nimukanzukhila ehale okhutsia okhurula khusiayo.

²²Nebutswa nambonie amakondi kanje ne sinangalekhe nakanyasibwe khandi tawe. Nakhalachile buli likondi lianje ma nambinie amalahi okhurula khumabi.

²³Nangahelesie omuruchi singa omurumikhili wanje Daudi okhuba omwayi wabwe mulala, naye nakahendele.

²⁴Ise OMWAMI nambe Nyasaye wabwe, ne omuruchi singa omurumikhili wanje Daudi nabe omuruchi wabwe. Ise mal'le okhuboola.

²⁵Ndakhalombe n'nabo indakano yomulembe. Ndakhahiinie tsinyama tsimbi tsiosi okhurula musibala, khe amakondi kanje kamenye bulahi m'bulimo nende okhukona bulahi mumitsuru.

²⁶“Ndakhakalaamile tsikhabi nende okhukalekha kamenye khundulo khwesikulu sianje esitsienukhu. Yaho ndakhakalaamile tsikhabi ningaler'ra ifula olwa kachienya.

²⁷Emisaala chiakhaame amatunde, emikunda chiakhaame ebiamo, ma siomundu yakhamenye mumulembe khwiloba lilie omwene. Olwa ndakhakhalake eminyol'lo chiabandu banje nende okhubalakhula okhurula mu yabo ababakhola abasumba, nilwo olwa bakhamanye mbu, ise nise OMWAMI.

²⁸Amahanga kabanasibala sikakhayaake esibala siabwe khandi tawe, ne tsinyama nabulimo sitsiakhabeere nende okhubalia tawe. Bakhamenye mumulembe ne abulaho owakhabarisie.

²⁹Ndakhabahelesie emikunda eminolu ne ndakhahiinie inzala musibala. Amahanga kandi sikakhabatsekhel'le khandi tawe.

³⁰Siomundu yakhamanye mbu soolanga Isiraeli, khandi yakhamanye mbu nabandu banje. Ise OMWAMI Nyasaye mal'le okhuboola.

³¹“Inywe, amakondi kanje, esiayo esiandisianga, muli abandu banje, nase ndi Nyasaye wenywe,” nimbwo OMWAMI Nyasaye aboolanga.