Read lunyore ESEKIELI 35 Bible Online

ESEKIELI 35 - lunyore bible

ESEKIELI 35

¹OMWAMI yal'loma n'nase.

²Yaboola mbu, “Omwana womundu, fukula esibala sia Edomu.

³Bool'la abandu bayo ake ise OMWAMI Nyasaye, mboolanga kano: Ndi omusuku wenywe, inywe ebikulu bia Edomu! Namukhole okhuba likunda.

⁴Nandekhe amatookho kenywe mukhumumwa, khandi amaloba kenywe nakabe likunda; khe nilwo olwa namumanye mbu ise nise OMWAMI.

⁵“Wali omusuku wa Isiraeli owamatukhu kosi ne wahuchil'la abandu ba Isiraeli berwe mumatukhu kobutinyu bwabwe, munyinga yokhumal'likha yesinyasio esiabanyoola khulwe tsimbi tsiabwe.

⁶Kho luno siahene singa obwe Ise OMWAMI Nyasaye, ndi Nyasaye oli mwoyo, khubool'langa mbu okhufwa nikhwo omunyakhano kukwo, ne sionyala okhuhonokokha tawe. Oli nesikha siokhwira, kho okhwirwa nakhukhulonde.

⁷Nakhole esibala siokhusikulu esia Edomu okhuba esikhaya ne nanzire siomundu wosi ochendanga nabir'ra musio.

⁸Nafuunikhe ebikulu nende abafu, ne emilambo echieyabo abereywe mubulwani nachifuunikhe ebikulu nende amabanda.

⁹Nakhukhole okhuba likunda khulwe inziayo, ne omundu wosi siyakhamenyekhwo mumatookho kaako khandi tawe. Nilwo olwa nomanye mbu ise nise OMWAMI.

¹⁰“Waboola mbu amahanga kabili kano: Yuda nende Isiraeli, halala nende emikunda chiako nakako, khandi mbu wakhakabukule, kata nikali mbu Ise, OMWAMI, ndali Nyasaye wabwe.

¹¹Kho luno siahene singa obwe ise, OMWAMI Nyasaye, ndi Nyasaye oli mwoyo, nakhurunje khulwe lirima lilio, imbalikha yiyo, nende okhubihil'la khukhwo khubandu banje. Nabamanye mbu khuhelesianga esinyasio khukawabakhol'la.

¹²Nilwo olwa nomanye mbu Ise, OMWAMI, ndakhuhul'la noboolanga neinzekhelesi mbu ebikulu bia Isiraeli biali likunda khandi mbu biali ebibio okhubibukula.

¹³Ndamala okhuhul'la obwa wepaakanga nende okhuboola amang'ana amabi khu ise.”

¹⁴OMWAMI Nyasaye aboolanga mbu, “Nakhukhole likunda ma esibala siosi nasisangal'le okhulekwa khukhwo,

¹⁵singa butswa obwa nawe wasangal'la okhumumwa khwa Isiraeli, esili omwandu kwanje kwene. Ebikulu bia Seiri, yee, esibala siosi esia Edomu nasibe likunda. Ma nilwo olwabandu bosi nabamanye mbu ise nise OMWAMI.”