Read lunyore ESEKIELI 36 Bible Online

ESEKIELI 36 - lunyore bible

ESEKIELI 36

¹OMWAMI yaboola mbu, “Omwana womundu, l'loma khubikulu bia Isiraeli obibool'le bihulile amang'ana ake Ise,

²OMWAMI Nyasaye nyenyanga okhubibool'la. Abasuku ba Isiraeli babeekhana ma nibaboola mbu, ‘Luno ebikulu yibio ebiakhale nebiefwe!’

³“Haana oburoobi, ma olandie ake Ise, OMWAMI Nyasaye, mboolanga. Olwa amahanga akali ahembi kafumila ma nikanula ebikulu bia Isiraeli, bosi bali okhunyeka Isiraeli.

⁴Kho luno hulile ake Ise, OMWAMI Nyasaye, mboolanga khwinywe ebikulu ebirambi nende ebimbichiti, khwinywe emichela nende amabanda, khwinywe tsimbeka etsialekhwa mukhumumwa, nende khwinywe amatookho akabandu beelukhamwo akali okhunulwa nikatsekhel'lwa nende amahanga kosi akali ahembi.

⁵“Ise, OMWAMI Nyasaye, mal'le okhulul'la amahanga akali ahembi ne okhusila muno Edomu. Basangaala nibekhonya olwa bafumila liloba lianje ma nibehamba obwayilo obwalio.

⁶“Khulwe yako haana oburoobi khwiloba lia Isiraeli; bool'la ebikulu, ebirambi nende ebimbichiti, emichela nende amabanda ake Ise OMWAMI Nyasaye mboolanga mwileko lieimbalikha sichila amahanga kali okhubanyeka nende okhubachaaya.

⁷Ise, OMWAMI Nyasaye, subisianga mukatooto mbu amahanga akali ahembi nakasimbibwe omurwe.

⁸Nebutswa emisaala echili khubikulu bia Isiraeli nachikhulekhwo amasaafu khandi nachiame amatunde khulwenywe, abandu banje. Namube nimukalukhanga ingo bwangu.

⁹Ndi khulubeka lwenywe, ne nandole mbu liloba lienywe lilimilwe khandi, ma tsimwo tsiraachilwemwo.

¹⁰Nakhole obwinji bwenywe okhumeetekha. Namumenye mumatookho ma namwombokhe obuhia siesindu esiali okhulekhwa nisiabiya.

¹¹Nakhole abandu nende tsing'ombe okhumeetekha. Mwakhabe abenji okhuyomba obwamwali olwokhuranga, ma namube nende abaana abenji. Nandekhe namumenyeho singa obwa mwamenyangaho khale, ma nandekhe namuhindihale okhuyomba obwa mwalinji khale. Nilwo olwa namumanye mbu ise nise OMWAMI.

¹²Namukalusie inywe abandu banje Isiraeli, okhumenya musibala khandi. Siakhabe esibala sienywe abene, ne sisiakhalekhe abaana benywe okhuhul'la inzala khandi tawe.

¹³“Ise, OMWAMI Nyasaye, mboolanga mbu: Nakatooto mbu abandu baboolanga liloba lilitsanga abandu, khandi baboolanga mbu linuulanga lihanga abaana balio.

¹⁴Nebutswa okhurula luno okhutsia imbeli sinalilie abandu khandi tawe; kata sinalimunuule abaana benywe khandi tawe. Ise, OMWAMI Nyasaye, mal'le okhuboola.

¹⁵Liloba sinalihulilisie khandi khumahanga nikalitsekhel'langa nohomba okhulola abandu nibaliekhana tawe. Liloba sinalinuule lihanga abaana balio khandi tawe. Ise, OMWAMI Nyasaye mal'le okhuboola.”

¹⁶OMWAMI yal'loma n'nase.

¹⁷Yaboola mbu, “Omwana womundu, olwa Baisiraeli bali nibamenyanga mwiloba liabwe, bali okhulifwabia munjila eya bamenyelangamwo nende obwa bakholanga amang'ana. Ndali okhubala tsifwo tsiabwe okhuba etsiomusilo singa omukhasi oli m'mwesi abetsanga owomusilo.

¹⁸Ndali okhubalekha bahul'le obululu bwelileko lianje khulwobwiri obwabali nibakhola mwiloba, khandi khulwebiniini ebiachila nibafwabia liloba.

¹⁹Ndali okhubakhalachila khulwo obulamu obwabali nibamenya nende ebikhole ebiabali okhukhola, ma nimbasalania mubibala bindi.

²⁰Hosi ahabatsitsanga baleeranga es'simba murwe khuliira lianje lietsienukhu sichila abandu bakhabooye mbu, ‘Abandu yaba balinji abo MWAMI nebutswa kabahachia okhurula mwiloba liabwe abene!’

²¹Yaka niko akali okhunomba mendele eliira lianje litsienukhu, olwa Abaisiraeli balikhola okhuba elies'sinyo siahabundu hosi ahabatsitsanga.

²²“Luno bool'la Abaisiraeli amang'ana ake Ise, OMWAMI Nyasaye, mbabool'langa. Akanzitsanga okhukhola sikali khulwenywe Abaisiraeli tawe, nebutswa nikhulweliira lianje litsienukhu, elie inywe mwali okhulikhola elies'sinyo mubuli lihanga elia mwatsiamwo.

²³Olwa namanyie amahanga obweliira lianje likhongo lili litsienukhu, elie inywe mwafwabia mubo, nabamanye mbu ise nise OMWAMI. Ise OMWAMI Nyasaye, mal'le okhuboola. Namurumikhile inywe okhumanyia amahanga mbu ndi omutsienukhu.

²⁴Namubukule okhurula mubuli lihanga nende esibala ma namukalusia mwiloba lienywe abene.

²⁵Nanzukhil'le amaatsi amasiiyikhu khwinywe nende okhumukhola abasiyikhu okhurula khubiniini bienywe biosi nende ebindu bindi biosi ebiali okhumufwabia.

²⁶Ndakhamuhelesie omwoyo omuyia nende amakani amayia. Nambinie omwoyo omubi okwelichina mwinywe ma muhelesia omwoyo kwobuhulili.

²⁷Nare omwoyo wanje mwinywe ma nanyenye okhulola mbu mulondaanga amalako kanje nimulinda amalako kosi aka ndamuhelesia.

²⁸Khe nilwo olwa namumenye mwiloba eliandahelesia abakuka benywe. Mwakhabe abandu banje, nase ndakhabe Nyasaye wenywe.

²⁹Ndakhamuhonie okhurula khubindu biosi ebimufwabianga. Ndakhalake obuswache okhuba obwinji khe mulalekhe okhubakhwo nende inzala khandi tawe.

³⁰Ndakhameete ebiamo bienywe ebiemisaala chiamatunde nende ebiemikunda chienywe, kho mulalekhe okhubakhwo nende inzala khandi eyakhachila mufwabie eliiralienywe mumahanga.

³¹Mwakhetsul'le tsifwo tsienywe tsimbi nende obubi bwamwakhola, ma tsimbi tsienywe nende obusiamu bwenywe bwakhamukhole okhwesimbia emirwe abene.

³²Isiraeli, nyenyanga mumanye mbu sikholanga yaka kosi khulwe inywe tawe. Runanga mwesimbie emirwe mube netsisoni abene khulwamang'ana akamukholanga. Ise OMWAMI Nyasaye, mal'le okhuboola.”

³³OMWAMI Nyasaye aboolanga mbu, “Olwa namukhole okhuba abasiyikhu okhurula mutsimbi tsienywe tsiosi, namulekhe namumenye mumatookho kenywe, khandi namwombokhe obuhia ebiabiiya.

³⁴Siomundu owali niyanala okhuchendela ahembi nemikunda chienywe yalola singa obwachiali nichiayumba khandi echiarisia, nebutswa nandekhe namuchilime khandi.

³⁵Siomundu naboolenje singa obweliloba yili, eliali niliakwa esitsiimi olundi, obwa liakwiye singa omukunda kwa Edeni, khandi singa obwamatookho akali nikasambul'lwa nikanuulwa ebindu ma nikalekhwa mukhumumwa obwa luno kamenywangamwo ma kayombokhwakhwo oluhinga.

³⁶Khe nilwo olwa mahanga akali ahembi akasikala nakamanye mbu Ise, OMWAMI ndombokha obuhia amatookho akali nikamumwa ma ningalukhila okhuraaka emikunda echiali nichiayumba. Ise, OMWAMI mal'le okhusubisia mbu nakhole yaka — ne okhwola nangakhole.”

³⁷OMWAMI Nyasaye aboolanga mbu, “Olundi khandi nandekhe Abaisiraeli bareebe obukhonyi okhurula khu ise, ne nandekhe nabameetekhe okhuba abenji singa esiayo siamakondi.

³⁸Amatookho akali mukhumumwa luno naketsulemwo abandu singa obwa Yerusalemu liali nilietsulamwo amakondi akali okhuhanwa singa emisango mwisabo. Nilwo olwa nabamanye mbu ise nise OMWAMI.”