Read lunyore ESEKIELI 37 Bible Online

ESEKIELI 37 - lunyore bible

ESEKIELI 37

¹Ndali okhuhul'la tsingufu tsio MWAMI nitsili mwise, ma omwoyowe niyambukula ma niyambila Mwibanda eliali nilietsuhamwo amakumba.

²Yanyemel'la okhuchenda mwibanda liosi, ma ndali onyala okhulola mbu kalimwo amakumba amenji okhusila ma khandi mbu kali amomu okhusila.

³Yamala niyambool'la mbu, “Omwana womundu, amakumba yaka kakhanyala okhuba nobulamu khandi noho?” Nase ningalusia nimboola mbu, “OMWAMI Nyasaye, ibe wenyene niwe onyala okhukalusia lireebo yilio!”

⁴Omwami naboola mbu, “Haana oburoobi khumakumba yaka. Bool'la amakumba amomu yaka kahulile ling'ana lio MWAMI.

⁵Kabool'le mbu Ise, OMWAMI Nyasaye, mboolanga khuko mbu: Nzitsanga okhura emiiya mwinywe ma mukhole okhuba nobulamu khandi.

⁶Namuhelesie emiswasi nende inyama ma namukalusiekhwo likhoba. Naare emiiya mwinywe ma namukhole okhuba nobulamu khandi. Khe nilwo olwa namumanye mbu ise nise OMWAMI.”

⁷Kho ndali okhurooba singa obwandali nimbooleywe. Olwa ndali nisiboola, ndali okhuhul'la liyoka liokhutuyana, ne amakumba nikachiaka okhwongana halala.

⁸Olwa ndali nisikoola, amakumba kali nikakalusiibwekhwo emiswasi nende inyama ma nende likhoba. Nebutswa emiiya sichiali mumibili tsana tawe.

⁹Nyasaye niyambool'la mbu, “Omwana womundu, haana oburoobi khumuyeka. Bool'la omuyeka mbu ise OMWAMI Nyasaye, ngulakanga kwitse okhurula mutsimbeka tsiosi, okhufuura mumibili echiafwa yitsi, ma kuchikhole okhuba nobulamu khandi.”

¹⁰Kho ndali okhurooba singa obwa ndali nimbooleywe. Emiiya chienjila m'mibili, ma emibili nichiba mwoyo ma nichisinjila. Bali abandu abenji abanyala okhulomba omukanda kwabasikari.

¹¹Nyasaye niyambool'la mbu, “Omwana womundu, abandu ba Isiraeli bali singa amakumba yaka. Baboolanga mbu bayoma ka, sila obunaayi bwosi kata sibamanyile aketsanga tawe.

¹²Kho haana oburoobi khubandu banje Abaisiraeli ma obabool'le mbu, Ise OMWAMI Nyasaye, nzitsanga okhwikula ebilindwa biabwe. Nzitsanga okhubabukula mbahiniemwo khandi mbakalusie mwiloba lia Isiraeli.

¹³Olwa nanzikule ebilindwa omwabandu banje bayabilwa ma mbaleere esioba, nabamanye mbu ise nise OMWAMI.

¹⁴Ndakhare emiiya chianje mubo, nimbakhola okhuba nobulamu khandi, ma nandekhe nabamenye mwiloba liabwe abene. Nilwo olwa nabamanye mbu ise nise OMWAMI. Ndasubisia okhukhola yaka ne okhwola ndakhakakhole. Ise, OMWAMI mal'le okhuboola.”

¹⁵OMWAMI yal'loma n'nase khandi.

¹⁶Yaboola mbu, “Omwana womundu, bukula indabusi yolusaala ma ohandiikekhwo amang'ana kano: ‘Lihanga lia Yuda.’ Khandi bukula indabusi yindi ma ohandiikekhwo amang'ana kano: ‘Lihanga lia Isiraeli.’

¹⁷Ma otiile tsindabusi tsibili yitsio tsitilane ebitakho mumukhonokwo ma tsifwane indabusi ndala.

¹⁸Olwabandu baabo bakhureeba obabool'le esia yaka kaboolanga,

¹⁹obabool'le mbu ise OMWAMI Nyasaye, nzitsanga okhubukula indabusi eyahandiikwakhwo Isiraeli ma njire halala nende indabusi eyahandiikwakhwo Yuda. Tsindabusi tsibili yitsio nanzikhole natsibe indabusi ndala ma nanzitiile mumukhono kwanje.

²⁰“Otiile tsindabusi tsibili mumukhonokwo ma olekhe abandu batsilole.

²¹Ma obabool'le mbu Ise OMWAMI Nyasaye, nzitsanga okhubukula abandu banje bosi okhurula mumahanga omwabatsia, mbabunjelesie halala, ma mbakalusie mwiloba liabwe abene.

²²Nambahambanie okhuba lihanga elala musibala esili khubikulu bia Isiraeli. Bakhabe nende omuruchi mulala owokhubaruka, ne sibakhabukhanibwe mumahanga kabili nohomba okhukabulwa muburuchi esiakhabili tawe.

²³Sibakhefwabie abene nende ebiniini bies'sinyo khandi nohomba okhweyononia abene nende tsimbi tawe. Ndakhabalakhuule okhurula mutsinjila tsiosi etsia bakhol'langamwo tsimbi nende okhuusiemana. Ndakhabasiiye ne, bakhabe abandu banje, ma nase ndakhabe Nyasaye wabwe.

²⁴Omuruchi singa omurumikhili wanje Daudi yakhabe omuruchi wabwe. Bosi bakhahambanibwe hasi humuruchi mumuruchi mulala ma bakhafumile amalako kanje mubusubilwa.

²⁵Bakhamenye mwiloba eliandahelesia omurumikhili wanje Yakobo, liloba eliabakuka babwe bamenyangamwo. Bakhamenyemwo inziayo, ma khandi abaana nende bosi abolwibulo lwabwe bakhamenyemwo. Omuruchi singa omurumikhili wanje Daudi yakhabaruke inziayo.

²⁶Ndakhalombe n'nabo indakano yomulembe nayo yakhabe indakano yeinziayo. Ndakhabaralisie nende okhumeeta obwibulani bwabwe, ma ndakhare Ehekalu yanje musibala siabwe aha yakhamenye inziayo.

²⁷Ndakhamenyeyo n'nabo, ndakhabe Nyasaye wabwe, nabo bakhabe abandu banje.

²⁸Olwa ndakhare Ehekalu yanje okhuba mubo inziayo, nilwo olwa mahanga kakhamanye mbu ise OMWAMI, ndamala okhwela Isiraeli okhuba abandu banje omwene.”