Read lunyore ESEKIELI 38 Bible Online

ESEKIELI 38 - lunyore bible

ESEKIELI 38

¹OMWAMI yal'loma n'nase.

²Yaboola mbu, “Omwana womundu, fukula Koku, omuruchi omukhongo wamahanga ka Mesheki nende Tubali mwiloba lia Makoku. Mufukule

³ma omubool'le mbu Ise, OMWAMI Nyasaye, ndi omusuku uwe.

⁴Namusukhanie, nira tsingaka mutsiseyatsie, ma namukhwese ye nende abasikaribe nimuhila ehale. Abasikaribe nabenji khandi etsisululi tsiabwe nende abaninangakhwo abeyunifomu, netsinyinji, ne siomusikari achinganga esikhumba ne werechekhele nende olukanga.

⁵Abandu okhurula Perisia, Kushi[7], nende Libia bali n'naye, ne bosi bali nebikhumba nende ebikutu.

⁶Abandu bosi abokhulwana lihe okhurula mubibala bia Komeri nende Betsi Tokarima ebili esinyolu bali n'naye, khandi nende abandu okhurula mumahanga kandi amenji.

⁷Mubool'le yerechekhe ma alake abasikaribe berechekhe okhuhul'la lilakolie.

⁸Olunyuma lwemihika eminji namulake natsie okhuseera esibala esiabandu bakalusibwa halala okhurula mumahanga amenji khandi abamenya sila oburi bwelihe tawe. Yakhaseere ebikulu bia Isiraeli ebiali likunda khandi ebiabandu belukhamwo oluhono olurambi, nebutswa owabandu bosi bamenyanga mumulembe luno.

⁹Ye nende abasikaribe nende amahanga amenji akali n'naye nabaseere singa imbumbuyeka ne bakhafunikhe liloba singa lilumbesi.”

¹⁰Yaka niko ako MWAMI Nyasaye aboolanga khu Koku. “Olweinyinga tsana yakhoole, wakhachiake okhupaala okhuloosia ling'ana liibi.

¹¹Nawahule okhuseera esibala esiranyala okhwesoola omwabandu bamenyanga mumulembe nende mubulakhuule mumataala akarayombokhelwa amasisi kokhukasinga.

¹²Wakhayaake nende okhunuula ebindu biabandu abamenyanga mumatookho akali nikamumwa. Bali okhuleerwa halala okhurula mumahanga, ma luno bali nende ebiayo nende emiandu ma bamenya mumasanganjila kesibala.

¹³Abandu ba Sheba nende Dedani nende abakhala okhurula mumataala ake Esipania nabakhureebe inywe mbu ‘Mwali okhulanga abasikari benywe halala ma nimuseer're khulwokhunula nende okhuyaaka? Ochomanga okhubukula efetsa, etsahabu, tsing'ombe, nende emiandu ma otsie nebindu yibio biosi ebioyaakile?’ ”

¹⁴Kho OMWAMI Nyasaye, yarumile okhubool'la Koku aka yali okhuboola khuye kano: “Olwa abandu banje Abaisiraeli nababe nibasimenyele mumulembe, notsie

¹⁵okhurula mubukono bubwo obuli esinyolu ehale, niwemeleye abasikari abenji khandi abetsingufu okhurula mumahanga amenji, bosi nibali khumikongo chietsisululi.

¹⁶Namuseere abandu banje ba Isiraeli singa imbumbuyeka ebir'ranga hakari weliloba. Olwa inyinga yakhoole ndakhamurume mulatsie okhuseera liloba lianje khulwokhumanyia amahanga mbu Ise nise wina, okhubamanyia obutsienukhu bwanje khulwamang'ana akakholanga okhubir'ra mwinywe.

¹⁷Niwe owatsana owandal'lomangakhwo olwali khale, olwa ndalandia okhubir'ra mubarumikhili banje, abaroobi ba Isiraeli mbu mumatukhu aketsanga ndakhaleere omundu nalebe okhuseera Isiraeli.” OMWAMI Nyasaye umal'le okhuboola.

¹⁸OMWAMI Nyasaye aboolanga mbu, “Khwitukhu elia Koku yakhaseer'rekhwo Isiraeli ndakhabe nelirima.

¹⁹Mbisianga mubululu bwelileko lianje mbu khwitukhu yilio khwakhabeho okhurenga khwesibala okhukali okhusila mwiloba lia Isiraeli.

²⁰Sieisuche nende linyonyi, buli inyama ingali nohomba indititi, nende siomundu oli khusibala yakhatechele muburi khulwe Ise. Ebikulu biakhakwe, ma sielisisi liakhakwe.

²¹Ndakhariisie Koku nirumikhilanga amakhupako keimbila yosi. Ise, OMWAMI Nyasaye, mal'le okhuboola. Abasikaribe bakhasuukhanie tsinganga tsiabwe nibalwana omundu nowasie.

²²Ndakhamuhelesie esinyasio siobulwaye nende okhuratsia amatsahi. Okhukwa khweifula nende amachina, halala nende omul'lo nende obunora, biakhasundukhe hasi khuye nende khubasikaribe nende khumahanga amenji akali khulubeka lulwe.

²³Mukhukhola mbwo ndakhanyie amahanga kosi mbu ndi omukhongo khandi mbu ndi omutsienukhu. Bakhamanye mbu nilwo olwe ise ndi OMWAMI.”