Read lunyore ESEKIELI 39 Bible Online

ESEKIELI 39 - lunyore bible

ESEKIELI 39

¹OMWAMI Nyasaye yaboola mbu, “Omwana womundu, fukula Koku, omwami omukhongo wamahanga ka Mesheki nende Tubali, ma omubool'le mbu ndi omusuku uwe.

²Namusukhanie namuhengie olubeka olwibulo khandi namwemel'le okhurula esioba wesinyolu okhwola olwa nayetse khubikulu bia Isiraeli.

³Ma nilwo olwa nakhupake obuhingo bwe okhurula mumukhono omukhasi ne tsiseletsie okhurula mumukhonokwe omusaatsa.

⁴Koku nende amahanga akakhola obulina n'naye nabafwile mubikulu bia Isiraeli ma nendekhe emibili chiabwe nachibe ebiokhulia khulwa amanyonyi kosi nende tsinyama nabulimo.

⁵Nabafwile musikuru esikhaya. Ise, OMWAMI Nyasaye, mal'le okhuboola.

⁶Namambie omul'lo mwiloba lia Makoku nende khutsindulo tsiosi omwabandu bamenyanga sila okhusibil'lwa, ma siomundu namanye mbu ise nise OMWAMI.

⁷Nandole mbu abandu banje ba Isiraeli bamanyile eliira lianje litsienukhu, ma sinandekhe eliira lianje okhufwabibwa khandi tawe. Khe nilwo olwa mahanga nakamanye mbu Ise OMWAMI, ndi Nyasaye Omutsienukhu wa Isiraeli.”

⁸OMWAMI Nyasaye yaboola mbu, “Litukhu elia ndal'lomangakhwo lili butswa ahembi okhwola.

⁹Abandu abamenyanga mumatookho ka Isiraeli nabarule ma nababunjelesie ebilasan'nwe ebialekhwa nibabikhola tsikhwi. Nabalombele emil'lo nibarumikhilanga ebikhumba, obuhingo tsisele, amafumo nende ebikulume, ma balabe n'nabio ebinyala okhwatukha khulwemihika chine nachitaru.

¹⁰Sibakhatakhwe okhurenya tsikhwi mubulimo nohomba okhuremaka emisaala m'mutsuru tawe, sichila bakhabe nibali nende ebilasan'nwe ebialekhwa khulwo khubisamba. Bakhanuule nende okhuyaaka ebindu bie yabo abali okhubanuula nende okhubayaaka.” OMWAMI Nyasaye umal'le okhuboola.

¹¹OMWAMI yaboola mbu, “Olwe yaka kosi kakhekhole, nambelesie Koku omukunda kwokhuyabilwamwo yaho mu Isiraeli, Mwibanda liabachendi, elili ebukwe we Inyanza ye Chumbi. Koku, nende abasikaribe bosi bakhayabilwemwo ne libanda tsana liakhalangwe mbu, ‘Libanda liabasikari ba Koku.’

¹²Kakhabukule Abaisiraeli emiesi chine nachitaru okhuyabila emilambo chiosi nende okhukhola liloba okhuba lisiyikhu khandi.

¹³Abandu bosi musibala yimwo bakhakhonye okhubayabila, ma bakhahebwe oluyali khulwa akene yaka mwitukhu lianje liobulechi. Ise, OMWAMI Nyasaye mal'le okhuboola.

¹⁴Olunyuma lwemiesi chine nachitaru, abandu bakhelwe abokhuchenda nibabir'ra musibala khulwo okhuruna nende okhuyabila emilambo yitsio echisikalanga khwiloba kho babe abanyala okhulomba esibala okhuba esisiyikhu.

¹⁵Olwa baba nibachendanga musibala mwosi, lwosi olwa bakhanyoola likumba liomundu, bare esimanyilo ahembi n'nalio kho abayabi bebilindwa babe abanyala okhwitsa ma baliyabile mwibanda liabasikari ba Koku:

¹⁶Litaala liakhabeho ahembi eliakhalangwe eliira liabasikari ba Koku yabo. Ma nimbwo esibala siakhalombwe okhuba esisiyikhu khandi.”

¹⁷OMWAMI Nyasaye yambool'la mbu, “Omwana womundu, langa amanyonyi kosi nende tsisolo tsiosi tsitse okhurula habundu hosi okhulia omusango okwambilombelanga. Nalibe lisabo likali khubikulu bia Isiraeli ahabinyala okhulia inyama nende okhunywa amatsahi.

¹⁸Biakhalie nokhunywa amatsahi kabasikari nende abaruchi besibala bosi. Yabo bosi bakherwe singa ebimeme biamakondi nohomba ebietsimbusi nohomba singa amakondi nohomba tsimbusi nohomba singa etsichulukhi tsiakhomela.

¹⁹Olwa nanzire abandu yaba singa emisango, amanyonyi nende etsisolo biakhalie etsisinya tsiosi etsiatsinyala okhwikura khandi biakhanywe amatsahi okhwola olwa biakhakholwe namalwa.

²⁰Khumesa yanje biakhalie inyama inyinji singa binyala eyetsisululi nende abelukhilangakhwo nende eyabasikari nende eyabandu bosi abalwananga line. Ise OMWAMI Nyasaye mal'le okhuboola.”

²¹OMWAMI yaboola mbu, “Nandekhe amahanga nakalole obukhongo bwanje nende okhukanywa singa obwarumikhilanga obunyali bwanje okhukhola yako akanjoomanga okhukhola akali akatooto.

²²Abaisiraeli nabamanye okhurula luno okhutsia imbeli mbu ise nise OMWAMI Nyasaye wabwe.

²³Ne amahanga nakamanye mbu Abaisiraeli batisibwa khulwe tsimbi etsiabali okhukhol'la. Ndali okhubakhupa omukongo ma nindekha abasuku babwe okhubaleka nende okhuber'ra mubulwani.

²⁴Ndali okhubahelesia esiali nisibahel'le khulwokhubula okhuba abasiiyikhu khwabwe nende khulwobubi bwabwe, ma nimbakhupa omukongo.”

²⁵OMWAMI Nyasaye yaboola mbu, “Nebutswa luno nambe netsimbabasi khulwibulo lwa Yakobo, abandu ba Isiraeli, ma nambahindihasie khandi. Nasoole eliira lianje litsienukhu.

²⁶Olwa nababe nibamenyanga mumulembe nibali musibala siabwe siene, sila omundu undi wosi okhubarisia, bakhabe abanyala okhwibil'la obwabali okhusimbibwa emirwe khulwa okhuusiemana ise.

²⁷Khulwa okhumanyia amahanga amenji mbu ndi omutsienukhu, nanjelesie abandu banje okhurula mubibala ebiabasuku babwe bamenyangamwo.

²⁸Nilwo olwa abandu banje nabamanye mbu ise nise OMWAMI Nyasaye wabwe. Nabamanye yaka, sichila ndali okhubahila mubuhambe, ne luno mbabunjelesianga nimbakalusia musibala siabwe siene, niralekhakhwo kata mulala yenyene inyuma.

²⁹Ndakhasundule omwoyo kwanje khubandu ba Isiraeli ma sindakhabakhupekhwo omukongo khandi tawe. Ise OMWAMI Nyasaye mal'le okhuboola.”