Read lunyore ESEKIELI 4 Bible Online

ESEKIELI 4 - lunyore bible

ESEKIELI 4

¹Nyasaye yaboola mbu, “Omwana womundu, bukula litifwali ma olialisie imbeli uwo, ne oling'oolekhwo esifwanani sielitookho lia Yerusalemu.

²Ne khulwokhumanyia okhufumbilwa nabasuku khwelitookho obiikhekhwo emitalo ma olonge ebifuumi, khandi wombokhekhwo ekambi ma orekhwo amashini kokhutuya amasisi.

³Ma obukule lipanga, olisinjisie libe singa lisisi hakari haho nende litookho tsana. Ohengane nelitookho tsana elimal'le okhufumbilwa nabasuku ne niwe olifumbilanga. Yisio nesimanyilo khubandu ba Isiraeli.

⁴“Ma khe weyalisie khusibafu siomukhono mukhasi, ne nambiikhe esikha sietsimbi tsia Baisiraeli khuibe. Buli sielitukhu elala elioba niweyalisinjiaho nalibetsenje singa omuhika mulala khumihika etsia nabanyoole esinyasio.

⁵Okhuba khuretsangakhwo esinyasio khulwamatukhu etsimia tsitaru nende amakhumi karano nakane, okhuhela nende emihika chiesinyasio siabwe, kho ibe nonyoole esinyasio khulwa abandu ba Isiraeli.

⁶Ne olwa oba nomal'le akene yaka, osukhane ma weyalisisie khusibafu sisio esiokhumukhono mulunji ma nokhupe esibi khulwe esikha sietsimbi tsia Yuda khulwamatukhu amakhumi kane; mbu buli sielitukhu elala nalibetsenje singa omuhika mulala.

⁷“Orele litookho lia Yerusalemu elimal'le okhufumbilwa nabasuku tsimoni. Osonie omukhonokwo khwitookho yilio ma oroobe aketsa okhulikwila.

⁸Ne, lola, nakhubohe kho mbu obe oranyala okhusukhana okhurula olubeka l'lala okhuhenga olubeka lundi okhwola olwa amatukhu kokhufumbilwa khwalio kaliba nikahweye.

⁹“Luno bukula ingano nende eshayiri, namakanda netsimindi, nobule nende amabele ne obitubul'le mundabu ndala okhulombakhwo omukaati. Omukaati yikwo nikwo okwanolitsenje khumatukhu etsimia tsitaru nende amakhumi karano nakane yako akonobe niweyalisisie khusibafu siomukhono mukhasi.

¹⁰Nohuchil'lwe okhulitsanga esiokhulia esihela etsikuramu tsimia tsibili namakhumi kataru khwitukhu elala ne nasikhulindenge okhwola khwitukhu lilondakhwo.

¹¹Amaatsi nako nonywetsenje ebikombe b'bili bionyene khwitukhu.

¹²Nolombenje omul'lo okhurula khumafwi komundu, notekhela omukaati khumul'lo tsana ne nokulila habulafu ahabandu bosi banyala okhukhulola.”

¹³OMWAMI naboola; “Nimbwo abandu ba Isiraeli balilia ebiokhulia biomusilo olwa nambasalanie okhutsia mumahanga amacheni.”

¹⁴Khe nase ningalusia nimboola mbu, “Tawe OMWAMI Nyasaye! Ise sili okhutumbakhwo khusiomusilo tawe. Okhurula mubwana bwanje okhwola luno sindaliakhwo inyama yesindu esifwiiye esiene nohomba esietsisolo tsiomubulimo tsiir're tawe. Khandi sili okhuliakhwo inyama elangilwe eyomusilo tawe.”

¹⁵Kho nilwo olwa Nyasaye yambool'la mbu, “Yako namalahi. Nakhuhuchil'le orumikhile esingo yeing'ombe musilenje siamafwi komundu, nawe notekhele omukaati khumul'lo kwayo.”

¹⁶Okhumetakhwo, yamala niyambool'la mbu, “Omwana womundu, lola, nzia okhututuyia emikaati echia Yerusalemu banyoolanga: Abandu ba Yerusalemu nabalitsenge omukaati okupimilwe nende amaatsi akapimilwe ma nababe musibi nende musihenda mwoyo esikali.

¹⁷Nabatakhe emikaati nende amaatsi, ne nababe mungoingoi ma bahwe tsingufu khulwe tsimbi tsiabwe.”