Read lunyore ESEKIELI 40 Bible Online

ESEKIELI 40 - lunyore bible

ESEKIELI 40

¹Liali litukhu lielikhumi khumuhika omuyia, okwali omuhika kwamakhumi kabili nachirano kwokhwatisibwa khwefwe mubuhambe ne kwali omuhika kwelikhumi nakhane okhurula Yerusalemu nilifumilwa nabasuku. Khwitukhu yilio ndahul'la tsingufu tsio MWAMI nitsili mwise ma OMWAMI niyambila ehale.

²Mwibisulo, Nyasaye yambila musibala sia Isiraeli ma niyara khusikulu esirambi. Ndali okhulola imbeli wanje omukanda kwemiombokho echiafwana singa litookho.

³Yali okhumbila ahembi, ma nindola omundu owali okhwakha singa omukasa. Yali nachinjile omukoye kwokhupima okwekatani nende olusaala lwokhupima ne yali nasinjiye musilibwa siokhwinjila.

⁴Omundu tsana yambool'la mbu, “Henga omwana womundu. Hulilisia bulahi ma orekelesie bulahi khubindu biosi ebianzia okhukhumanyia, sichila yaka niko akachil'le nolerwa hano. Oliho khulwa okhubool'la abandu ba Isiraeli ebindu biosi ebiololanga.”

⁵Esiandalola yali Ehekalu, ma oluhinga lwali nilwachibotokhana. Omundu uyo yabukula olusaala lulwe olwokhupima olwali noburambi obuhela etsimiita chitaru, ma napima oluhinga. Lwali etsimiita tsitaru okhutsia ikulu khandi etsimiita tsitaru obusiro.

⁶Ma natsia musilibwa esiahenga ebukwe. Niyanichil'la khubiniinilo, ne nali ikulu, yapima obwinjil'lo; bwali etsimiita tsitaru okhutsia hasi.

⁷Imbeli wabwo lwaliho olung'anyi, olwali nende ebikoti bitaru ebiobulindi mbu bulilubeka. Buli esikoti siali esihelani tsimbeka tsiosi, etsimiita tsitaru buli olubeka, ma amasisi kali hakari wabio kali etsimiita tsibili nende enusu obusiro. Imbeli webikoti biobulindi lwaliho olung'anyi olwali noburambi obuhela etsimiita tsitaru buli olubeka, ma amasisi kali hakari wabio kali etsimiita tsibili nende enusu obusiro. Imbeli webikoti biobulindi lwaliho olung'anyi olwali noburambi obuhela, etsimiita tsitaru ne olung'anyi tsana lwatsitsanga musikoti esikali esiahengana nende Hekalu.

⁸Yapima esikoti esili mubwinjil'lo musilibwa esia henga mukari.

⁹Siali etsimiita tsine okhutsia hasi ne etsisiilo tsiasio etsielubeka nelubeka tsiali nobusiro obuhela emita ndala. Esikoti siomusilibwa siahenga mukari.

¹⁰(Ebikoti yibi khubuli lubeka lwolung'anyi biali ebihelani, ne amasisi hakari wabio kali amahelani mubusiro.)

¹¹Ma omundu tsana khandi napima obuchiikha bwolung'anyi olwali mubwinjil'lo. Bwali etsimiita tsisasaba nende enusu halala, ne obweyangu hakari webilibwa ebialamu bwali etsimiita tsirano.

¹²Imbeli wa buli esikoti siobulindi lialiho lisisi eliahasi eliali etsisentimita amakhumi karano ikulu khandi etsisentimita amakhumi karano obusiro. (Ebikoti biali etsimiita tsitaru tsimbeka tsiosi.)

¹³Ma napima ob'bambukhu okhurula inyuma welisisi eliesikoti silala okhwola emukongo welisisi liesikoti sindi esili olubeka lundi lwolung'anyi ne bwali etsimiita likhumi nachibili.

¹⁴Esikoti siokhundulo siatsitsanga m'mukitsi kwesioba! Yasipima ma nanyoola siali nobubambukhu obuhela etsimiita likhumi.

¹⁵Oburambi bwosi bwobwinjil'lo bwesilibwa okhurula khwisisi liesioba eliesilibwa okhwola khulubeka lwesikoti siokhumal'likha bwali etsimiita amakhumi kabili nachirano.

¹⁶Mwalimwo emiluhu mititi mumasisi kesioba akebikoti biosi nende mumasisi komuusi hakari webikoti. Tsialiho emisaala chiamasindu echiang'oolwa khumasisi komuusi akahengana nende olung'anyi.

¹⁷Omundu tsana yali okhumbukula niyambisisia musilibwa esinjilanga mumukitsi. Bialiho ebikoti, amakhumi kataru ebiombokhwa okhweleta khwisisi liesioba, ne imbeli wabio bwaliho obukono bwokhundulo obwombokhwa namachina,

¹⁸obwabotokhana omukitsi kwosi. Obweyangu yibu obwomuchitsi kwesioba bwali obwahasi okhuyomba obweyangu bwomukitsi kwemukari.

¹⁹Khwaliho neinjila yomusilibwa eya eyehekulu eyenjilanga mumukitsi kwomukari. Omundu tsana yapima obweyangu obwali hakari wetsinjila tsiokhwinjila tsibili yitsio, ne bwali etsimiita amakhumi karano.

²⁰Ma omundu tsana napima esilibwa siobwinjil'lo esili elubeka lwesinyolu esienjilanga mumukitsi kwesioba.

²¹Ebikoti biobulindi bitaru khubuli lubeka lwolung'anyi, amasisi akali hakari wabio, nende esikoti siomubwinjil'lo biosi biahelana nende yibio ebiali musilibwa siobwinjil'lo bwe ebukwe. Oburambi bwosi obwe esilibwa siokhwinjila bwali etsimiita amakhumi kabili natsirano ne obuchiikha bwali etsimiita likhumi natsibili nende enusu.

²²Esikoti siomubwinjil'lo, namadirisha, nende emisaala chiamasindu echiang'olwa khumasisi, biosi ebiali singa yibio biali musilibwa siebukwe. Hano khwaliho nebiniinilo bine nabitaru ebiatsia okhwola khusilibwa, ne esikoti siomubwinjil'lo siali khubuhwel'lesio nisihengele m'mukitsi.

²³Okhukhalania omukitsi okhurula mubwinjil'lo bwesinyolu bwali obwinjil'lo bundi obutsitsanga mumukitsi kwomukari singa butswa obwa kali khulubeka lwebukwe. Omundu tsana yapima oburambi hakari wobwinjil'lo bubili yibu, ne bwali etsimiita amakhumi karano.

²⁴Khandi omundu tsana yambila, khulubeka lwenandete, ne ebweneiyo khwalola obwinjil'lo bundi. Yabupima, ne bwahelana nende obundi bwosi.

²⁵Amatilisa kali mubikoti biobwinjil'lo yibu singa butswa akali mubindi. Oburambi bwosi halala bwobwinjil'lo bwali etsimiita amakhumi kabili nende tsirano, ne obuchiikha bwali etsimiita likhumi natsibili nenusu.

²⁶Ebiniinilo bine nabitaru biatsia okhwola khusio, khandi esikoti siasio esiomubwinjil'lo siali khandi ahobwinjil'lo buhwel'langa nisihengele mumukitsi. Tsialiho emisaala chiamasindu nichiang'oolwa khumasisi komukari akali nikahengan'ne nolung'anyi.

²⁷Hano khandi, haliho obwinjil'lo obwinjilanga mumukitsi kwomukari. Omundu tsana yapima oburambi okhwola khubwinjil'lo bwakhabili, ne bwali etsimiita amakhumi karano.

²⁸Omundu tsana yambukula niyambisisia mubwinjil'lo bwenandete okhutsia mumukitsi kwomukari. Yapima obwinjil'lo, ne bwali obuhelani singa obwinjil'lo obuli mubukono bwamasisi kesioba.

²⁹Ebikoti biasio ebiobulindi, etsisiilo tsielubeka nelubeka halala nende amasisi kasio akomukari kali amahelani singa yako akali mubwinjil'lo bundi bwosi.

³⁰Amatilisa kali mubikoti bia biobwinjil'lo yibu. Oburambi bwosi halala bwali etsimiita amakhumi kabili natsirano ne obuchiikha bwali etsimiita likhumi natsibili nende enusu.

³¹Esikoti siomubwinjil'lo siahenga m'mukitsi kundi, ma emisaala chiamasindu chiang'oolwa khumasisi komulung'ayi yilu. Khwaliho nebiniinilo munane ebiola khusilibwa yisi.

³²Omundu tsana yambukula niyambisisia mubwinjil'lo bwebukwe okhutsia mumukitsi kwomukari. Yapima obwinjil'lo, ne bwali obuhelani nende obundi bwosi.

³³Ebikoti biabwo biobulindi nende esikoti siomubwinjil'lo nende amasisi kasio akomukari kali amahelani nende akobwinjil'lo bundi bwosi Amatilisa kalimwo mwosi, khandi nende musikoti siomubwinjil'lo. Oburambi bwosi bwali etsimiita amakhumi kabili natsirano ne obuchiikha bwali etsimiita likhumi natsibili nende enusu.

³⁴Esikoti siomubwinjil'lo siahenga m'mukitsi kwesioba. Emisaala chiamasindu chiali nichiang'oolwa khumasisi akali khundulo khwobwinjil'lo. Khwaliho nebiniinilo munane ebiola khusilibwa yisi.

³⁵Ma omundu tsana niyambila mubwinjil'lo bwesinyolu. Yasipima, ne siali esihelana nende ebindi biosi.

³⁶Siali singa ebindi biosi. Siali nebikoti biobulindi, amasisi komukari nikang'oolwakhwo amahuwa, esikoti siomubwinjil'lo nende amatilisa tsimbeka tsiosi. Oburambi bwosi bwali etsimiita amakhumi kabili nende tsirano ne obuchiikha bwali etsimiita likhumi nachibili nende enusu.

³⁷Esikoti siomubwinjil'lo siali nisiahenga esioba m'mukitsi. Emisaala chiamasindu nichiang'oolwa khumasisi akali khundulo khwobwinjil'lo. Ebiniinilo munane biola khusilibwa yisi.

³⁸Mumukitsi kwesioba mwalimwo akhayumba akhatilana nende obwinjil'lo bwomukari khulubeka lwesinyolu. Akhayumba tsana khalimwo omuliango okwenjila musikoti siomubwinjil'lo esiahenga m'mukitsi, ma habwene yaho basaabilangaho emilambo chiemiruko echiokhusambwa nichili emichima singa emisango.

³⁹Musikoti siomubwinjil'lo yisi mwalimwo etsimesa tsine, buli tsibili khulubeka l'lala olwe esikoti. Khwali khutsimesa tsana nikhwo okhwaber'rangakhwo emiruko tsiokhuhanwa singa emisango emisambe nichili emichima nohomba singa emisango tsietsimbi nohomba singa esihanwa siokhurungana.

⁴⁰Esioba wesikoti tsialiho etsimesa tsine etsifwanana nende etsiomukari, buli tsibili khulubeka l'lala lwobwinjil'lo bwesilibwa siesinyolu.

⁴¹Tsiosi halala tsiaho etsimesa munane okhwemiruko tsiemisango tsier'rwangakhwo: tsine mukari mwesikoti ne tsine esioba m'mukitsi.

⁴²Etsimesa tsine etsiali mukhayumba akhongulwa, etsiarumikhilwa okhurechekha emisango tsiokhusambwa nichili emichima chialombwa khwichina libaatse. Tsiali noburambi bweikulu obuhela etsisentimita amakhumi karano, ne ikulu watsio tsiali etsisentimita amakhumi kane nakataru natsirano tsimbeka tsiosi. Ebirumikhilo biosi ebiarumikhilwa mukhwira emiruko tsiomusango biabiikhwa khutsimesa yitsi.

⁴³Tsingaka esiakhabili, etsiali noburambi obuhela etsimilimita amakhumi kane nakataru natsirano tsiabotokhana etsimesa yitsio khundulo. Inyama yosi eyokhuhanwa mumusango yali okhureebwa khutsimesa.

⁴⁴Ma omundu uyo niyandeera m'mukitsi kwomukari. Bialiho ebikoti b'bili ebikukhanga olubeka lwomukari olwomukitsi, silala siahenga elubeka lwenandete hasibafu siobwinjil'lo bwesinyolu ma esindi siahenganga esinyolu hasibafu siobwinjil'lo bwe enandete.

⁴⁵Omundu tsana yambool'la mbu esikoti esiahenga enandete siali esiabesaalisi abarumikhanga mu Hekalu,

⁴⁶ne esikoti esiahenga esinyolu siali esiabesaalisi abarumikhanga khulusambwa? Abesaalisi bosi nabolwibulo lwa Sadoku. Khubolwibulo lwa Lawi nibo bonyene abahuchil'lwa okhutsia imbeli MWAMI khulwo okhumurumikhila.

⁴⁷Omundu tsana yapima omukitsi kwomukari ne, kwosi halala kwali etsimiita amakhumi karano. Ehekalu yali elubeka lwemasaba, ne imbeli wayo khwaliho nende olusambwa.

⁴⁸Khe yamala yanyinjisia musikoti siobwinjil'lo bwe Hekalu. Napima obwinjil'lo ne bwali etsimiita tsibili nende enusu okhutsia hasi khandi bwali nobubambukhu obuhela etsimiita tsine natsitaru ne bwali namasisi akali nobusiro obuhela emita ndala nende enusu khutsimbeka tsiombi.

⁴⁹Ebiniinilo bialiho ebiokhutsia musikoti siobwinjil'lo, esiali nobu chiikha obuhela etsimiita likhumi khandi siali etsimiita tsisasaba okhutsia hasi. Tsialiho etsisilo tsibili, ndala khulubeka l'lalala lwobwinjil'lo ne eyindi khulubeka lundi.