Read lunyore ESEKIELI 41 Bible Online

ESEKIELI 41 - lunyore bible

ESEKIELI 41

¹Khandi omundu tsana yambila musikoti siahakari mbu, Habundu Hatsienukhu. Yapima olung'anyi olwinjilanga musikoti tsana ne lwali etsimiita tsitaru okhutsia hasi

²ne lwali nobuchiikha obuhela etsimiita tsirano ne amasisi akali elubeka nelubeka kali nobusiro obuhela etsimiita tsibili nenusu. Yapima esikoti siene. Siali noburambi obuhela etsimiita amakhumi kabili, ne obuchiikha bwali etsimiita likhumi.

³Khe yamala natsia musikoti siomukari okhusila. Yapima olung'anyi olwinjilangamwo: lwali emita ndala okhutsia hasi ne obuchiikha bwe tsimita tsitaru, ne amasisi akali khutsimbeka tsiombi kali nobusiro obuhela etsimiita tsitaru nende enusu.

⁴Yapima esikoti siene, ne siali etsimiita likhumi tsimbeka tsiosi. Kho yamala yambool'le mbu: “Hano niho Habundu Hatsienukhu Okhusila.”

⁵Omundu tsana yapima obusiro bwelisisi liomukari mweliombokhwa liehekalu, ne liali etsimiita tsitaru. Khwisisi yili okhubotokhana Ehekalu yosi bialikhwo ebikoti ebitititi ebinji ebiali nobuchiikha obuhela etsimiita tsibili.

⁶Ebikoti yibi biali mutsikorofa tsitaru, ne ebikoti amakhumi kataru biali khubuli ekorofa. Lisisi liesioba lie Hekalu khukorofa yeikulu liali linyel'le okhuyomba eliekorofa yehasi, kho mbu ebikoti biakhanyal'le okhwikhala khwisisi sila okhuliyembel'la.

⁷Ma kho amasisi kehekalu, olwa kalolekha okhurula esioba, kafwana singa akali nende obusiro obuhelani okhurula hasi okhwola ikulu. Khwisisi liesioba elia Ehekalu, olubeka lwesioba lwebikoti, ebiniinilo bibili ebibambukhu biokhutsia ikulu biombokhwa khutsikorofa, kho bwali obutoro okhurula mukorofa yahasi okhutsia muyahakari nende mukorofa yeikulu.

⁸Inyumba tsana yali nende obwelu obwechingu nibwachibotokhana ne emisinji chiebikoti biesioba biali noburambi obuhela etsimiita tsitaru.

⁹Obusiro bwelisisi liesioba bwali etsimiita tsibili nende enusu. Nebutswa obweyangu obwalamu obwali hakari hebikoti ebili khuhekalu

¹⁰nende ebikoti biesioba bwali nobuchiikha obuhela etsimiita likhumi khutsimbeka tsiosi etsie Hekalu.

¹¹Kwalimwo omuliango mulala okwenjilanga mubikoti bie hekalu khulubeka lwesinyolu ne okundi mulala okwenjilangamwo khulubeka lwenandete ne buli omuliango mulala kwali nobweyangu obuhela etsimiita tsitaru hakari hakwo kwosi.

¹²Mukhuhwelel'la khwobweyangu obwalamu khulubeka lwemasaba we Ehekalu kwaliho omwombokho okwali noburambi obuhela etsimiita amakhumi kane natsirano ne obuchiikha bwali etsimiita amakhumi kataru natsirano. Amasisi kakwo kali nobusiro obuhela etsimiita tsibili nende enusu tsimbeka tsiosi.

¹³Omundu tsana yapima esioba we Hekalu, ne noburambi bwayo bwali etsimiita amakhumi karano. Okhurula inyuma we Hekalu, okhukhalania obukono obwalamu okhwola olubeka lwehale lwomwombokho okhutsia okhwola emasaba, oburambi bwali khandi etsimiita amakhumi karano.

¹⁴Oburambi bwokhukhalania imbeli we Hekalu, halala nende obweyangu obwalamu khubuli olubeka, bwali etsimiita amakhumi karano.

¹⁵Yapima oburambi bwomwombokho okhutsia emasaba, halala nende obweyangu bwokhubir'ramwo mutsimbeka tsiosi, khandi tsiali etsimiita amakhumi karano. Esikoti siobwinjil'lo bwe Hekalu, Habundu Hatsienukhu, nende Habundu Hatsienukhu Okhusila,

¹⁶biosi biali okhwombokhwa nende tsimbao okhurula hasi okhwola khumadirisa. Amatilisa yaka kali akanyala okhufunikhwa.

¹⁷Amasisi komukari ke Hekalu, okhutsia ikulu okhwola khumiliango ikulu, kali nikafunikhwakhwo nebindu ebiabaatswakhwo

¹⁸emisaala chiamasindu nende amakerubi. Emisaala chiamasindu tsiasilania nende amakerubi, buli omusaala nikulondananga nende Amakerubi musikoti siosi. Buli likerubi liali nobweni b'bili:

¹⁹Obweni bwomundu obwahenganga khumusaala kwamasindu olubeka l'lala, ne obweni bwesimba obwahenga khumusaala khulubeka lundi. Kali butswa mbwo khwisisi liosi,

²⁰okhurula hasi okhwola ikulu khumiliango.

²¹Amatilwa kemiliango tsia Habundu Hatsienukhu kali amahelani tsimbeka tsiosi. Imbeli wobwinjil'lo bwa Habundu Hatsienukhu Okhusila haliho esindu esiafwana singa

²²olusambwa lwemisaala. Siali emita ndala nende enusu okhutsia ikulu ne obuchiikha bwali emita ndala. Emisaala tsiomutsikona, nende obwalo bwalwo, nende tsimbafu tsialwo biali nibialombwa khumisaala. Kho omundu uyo niyambool'la mbu, “Yiyi niyo emesa esinjilanga imbeli wo MWAMI.”

²³Omuliango kwaliho khusihesi siolung'anyi olwinjilanga Habundu Hatsienukhu, khandi okundi kwali khusihesi siolung'anyi olwinjilanga Habundu Hatsienukhu Okhusila.

²⁴Chiali emiliango echiahambana mwo chibili echiekukhanga nichiakan'na hakari.

²⁵Chialiho emisaala chiamasindu nende Abakerubi ebiafumbilwa khumiliango chia habundu Hatsienukhu, singa butswa biali khumasisi. Khandi sialiho esifunikho siemisaala ikulu we esioba wemiliango chiomubwinjil'lo obwesikoti.

²⁶Mutsimbafu tsiesikoti yisi mwalimwo amatilisa, ne amasisi kali nikang'onibwakhwo nende emisaala chiamasindu.