Read lunyore ESEKIELI 42 Bible Online

ESEKIELI 42 - lunyore bible

ESEKIELI 42

¹Omundu tsana yambila esioba mumukitsi niyanyemel'la okhutsia khumwombokho okuli elubeka lwesinyolu we Hekalu; siyali ehale okhurula khumwombokho okuli elubeka lwemasaba khundulo we hekalu tawe.

²Omwombokho yiku oburambi bwakwo bwali etsimiita amakhumi karano ne obuchiikha bwakwo bwali etsimiita amakhumi kabili natsirano.

³Khulubeka l'lala kwahenga mubweyangu etsimiita likhumi buchiikha, ne kwali khusibafu sie Hekalu, ne khulubeka lundi kwahenga khumusinji kwemumukitsi kwesioba. Kwombokhwa mubikha bitaru, buli esikha siali inyumakhwo okhuyomba esikha esiali isi wasio.

⁴Khulubeka lwesinyolu lwomwombokho yiku, lwaliho olung'anyi olwali nobuchiikha obuhela etsimiita tsirano ne oburambi bwali etsimiita amakhumi karano ne obwinjil'lo bwali khulubeka lwene yilwo.

⁵Ebikoti ebiali khusikha sieikulu sieliomwombokho biali ebinyelele okhuyomba yibio ebiali khubikha biahakari nende ebie hasi sichila tsiali okhusundwa inyuma okhusila.

⁶Ebikoti ebiali mubikha biosi bitaru biali khumitalo ne sibiali nibialetwa nende etsisilo singa emiombokho chindi echili mumukitsi tawe.

⁷Musikha siahasi lisisi liesioba liomwombokho liali litinyu khulwe etsimiita amakhumi kabili natsirano etsiali enusu yoburambi bwasio; ne bialiho ebikoti muburambi obusikalanga etsimiita amakhumi kabili natsirano. Musikha sieikulu bialimwo ebikoti muburambi bwosi bwomwombokho.

⁹Ne obwenjil'lo bwali hasi webikoti yibi khulubeka lwebukwe olwomundu aba niyenjilangamwo okhurula mumukitsi kwesioba.

¹⁰Khwalimwo nebikoti mububambukhu bwelisisi khulubeka lwenandete we Hekalu ebiahenga lundi khandi nibiahenga omwombokho.

¹¹Imbeli webikoti haliho nolung'anyi singa olulikhwo khulubeka lwesinyolu. Lwali nende oburambi nobuchiikha nomulomba nende obwinjil'lo singa obuli khulubeka lwesinyolu.

¹²Omuliango kwaliho hasi webikoti khulubeka lwe enandete lwomwombokho, holubeka lwa ebukwe luhwel'langa owa lisisi liachikila.

¹³Omundu tsana niyambool'la mbu, “Emiombokho yitsi tsiosi nemitsienukhu. Mutsio abesaalisi abenjilanga imbeli wo MWAMI balitsanga ebihanwa ebitsienukhu okhusila. Sichila ebikoti nebitsienukhu, abesaalisi nabareho ebihanwa ebitsienukhu okhusila mbu: ebihanwa biebichese nende omusango okwahanwa khulwe tsimbi nohomba singa omusanga kwokhurunga ebirarunga.

¹⁴Olwabesaalisi babetsanga mu Hekalu ma benya okhutsia mumukitsi kwesioba, okhwola balekhe mubikoti yibi tsingubo tsinzienukhu etsiabebiikha olwa barumikhilanga OMWAMI. Okhwola bebiikhe tsingubo tsindi nibasili okhurula esioba okhutsia habandu babukan'nanga.”

¹⁵Olwomundu tsana yali namal'le okhupima mukari mwe Hekalu, yambukula niyambila esioba okhubir'ra musilibwa siebukwe ma khandi napima esioba we Hekalu.

¹⁶Yabukula olusaala lwokhupiimila ma napima olubeka lwebukwe ne lwali etsimiita tsimia tsibili nende amakhumi karano.

¹⁷Yapima elubeka lwenandete lwali etsimiita tsimia tsibili nende amakhumi karano.

¹⁸Yapima olubeka lwemasaba; nalwo lwali etsimiita tsimia tsibili namakhumi karano.

¹⁹Yapima olubeka lwesinyolu; khandi nalwo lwali etsimiita etsimia tsibili nende amakhumi karano,

²⁰kho lisisi liabotokhana habundu ahahela etsimiita tsibili tsimbeka tsiosi. Lisisi liarumikhanga khulwa okhwabukhania esiali esitsienukhu okhurula khusirali esitsienukhu.