Read lunyore ESEKIELI 43 Bible Online

ESEKIELI 43 - lunyore bible

ESEKIELI 43

¹Omundu tsana yambukula niyambila khusilibwa esihenga ebukwe,

²ma lola obukhongo bwa Nyasaye wa Isiraeli bwetsanga okhurula ebukwe ma amayoosi kokhwitsa khukhwe kali singa okhuhoola khwamaatsi amenji ne esibala siali okhwakha khulwo obukhongo bubwe.

³Obuloli yibu bwali singa obwandali nindol'lekhwo olwa Nyasaye yetsa okhumuma Yerusalemu, khandi nende obwa ndalola nindi ahembi nomuchela kwa Kebari. Khe ndali okhukwa hasi mafung'ama.

⁴Obukhongo bwo MWAMI bwenjila mu Hekalu nibuhengele musilibwa sia Ebukwe.

⁵Omwoyo wo MWAMI yanjinguula ikulu ma niyambila mumukitsi kwomukari, ahandalola mbu Ehekalu yali okhwitsulamwo obukhongo bwo MWAMI.

⁶Omundu tsana yasinjila hasibafu sianje ma nimbul'la OMWAMI nal'loma n'nase naali esioba we Hekalu.

⁷Yaboola mbu, “Omwana womundu, oluruba lwanje ndwolu. Namenye hano mubandu ba Isiraeli nimbamiha khulwe inziayo. Kata abandu ba Isiraeli nohomba abaruchi babwe sibakhaleerekhwo esifwabwi khuliira lianje khulwo okhwekayakaya abanyasaye bandi nohomba khulwo okhuyabila emilambo chiabaruchi mubukono yibu tawe.

⁸Abaruchi bombokha ebiniini nende amatilwa keinyumba yobwami nehengana nende ebiniini nende amatilwa ka Ehekalu yanje, kho lialiho butswa lisisi eliokhukhwabukhania. Bafwabia eliira lianje khulwebindu biosi ebibi ebiabakhola, ma kho mwileko lianje ndali okhubamuma.

⁹Luno okhwola balekhe okhwekayakaya abanyasaye bandi khandi bahiinie emilambo chiabaruchi babwe. Nibakhola mbwo namenye mubo khulwe inziayo.”

¹⁰Ma OMWAMI natsilil'la okhuboola mbu, “Omwana womundu bool'la abandu ba Isiraeli khuke Hekalu, ma basome nibamanyilisia esifwanani siayo. Basimbie emirwe khulwe ebikholwa biabwe ebibi.

¹¹Ma nibaba nibasimbile emirwe khumabi akabakhola, obenoosie esifwanani sie Ehekalu: mbu omulombo kwayo, emiliango chiayo chiokhwinjila nende chiokhurula, okhufwana khwayo, obuloosie bwebindu biosi, nende amalako kayo halala nende amebaalo kayo. Handika yaka hasi khulwabo kho babe abanyala okhulola siesindu mbu ebindu biosi biloosibubwe ma babe abanyala okhuhesia amalako kosi.

¹²Kano niko amalako ke Hekalu: Habundu hosi ahabotokhana Ehekalu ikulu wesikulu nahasiyikhu khandi nahatsienukhu.”

¹³Khuno nikhwo okhupimwa khwolusambwa nibarumikhilanga esichelo esiokhupima singa esiapimilwa Ehekalu. Tsimbeka tsiosi tsiobwalo bwolusambwa haliho nende olwakhi olwali etsisentimita amakhumi karano okhutsia hasi, etsicentimita amakhumi karano obuchiikha; nende etsisentimita amakhumi kabili natsirano okhutsia ikulu.

¹⁴Habundu hatsia hasi okhusila khulusambwa, okhurula ikulu wobwalo, hali emita ndala okhutsia ikulu. Esikha sialondakhwo siali siasundwa inyuma okhurula khundulo etsisentimita amakhumi karano mutsimbeka tsiosi ne lwali etsimiita tsibili okhutsia ikulu. Esikha esialondakhwo siali khandi okhusundwa inyuma okhurula khundulo etsisentimita amakhumi karano mutsimbeka tsiosi.

¹⁵Esikha sieikulu yisi, okhwemisango tsiasambilwanga, siali khandi etsimiita tsibili okhutsia ikulu. Tsinzika etsiachobel'la mutsimbeka tsine tsiali tsirambi okhuyomba ikulu yosi.

¹⁶Ikulu wolusambwa yali imbelani tsimbeka tsiosi, mbu etsimiita tsisasaba khubuli olubeka.

¹⁷Esikha sia hakari khandi siali esihelani tsimbeka tsiosi, mbu, etsimiita tsine natsitaru khubuli olubeka, ne siali nende olusiche khundulo wolusambwa oluhela etsicentimita amakhumi kabili natsirano okhutsia ikulu. (Olwakhi lwali nobuchiikha obuhela etsisentimita amakhumi karano). Ebiniinilo biokhutsia khulusambwa biali khulubeka lwebukwe.

¹⁸OMWAMI Nyasaye yambool'la mbu, “Omwana womundu, hulilisia akakhubool'langa. Olwolusambwa nalube nilwombokhelwe, nolusaayile khulwo okhusambilakhwo emisango nende okhutsukhil'lakhwo amatsahi kemiruko etsihan'nwe singa omusango.

¹⁹Abesaalisi yabo abolwibulo lwa Lawi abetsukhulu ba Sadoku nibo bonyene abanabetsenge imbeli wanje okhuurumikhila. Ise OMWAMI Nyasaye, ndakanga yaka. Nobahelesie akhachulukhi akhasikhula okhuhaana singa omusango kwetsimbi.

²⁰Nobukulekhwo amatsahi kayo ma nore khutsinzika tsine etsiatsobel'la etsili ikulu wolusambwa nende khutsikona etsie sikha siahakari holusambwa, nende okhubotokhana khundulo khwalwo khwosi. Munjila yiyi osiye olusambwa nende okhulutsienula.

²¹Nobukule echulukhi emal'le okhuhanwa singa omusango kwetsimbi ma usambile habundu hachoomekhe esioba we Hekalu.

²²Litukhu lilondakhwo nobukule imbusi ekhole erali nobulema bwosi ma ochihaane singa omusango kwetsimbi. Osiiye olusambwa nende amatsahi kayo munjila indelwa singa obwokholeye echulukhi.

²³Olwa nobe nomal'le okhukhola yaka, nobukule akhachulukhi akhasikhula nende akhakondi akhakhole, biosi ebirali nobulema bwosi,

²⁴ma obileere khu ise. Omwesaalisi nanyul'lusiekhwo echumbi ma nasambe singa omusango khu ise.

²⁵Bulitukhu khulwamatukhu kane nakataru nohaanenje imbusi, echulukhi, nende esimeme sielikondi singa omusango kwe tsimbi. Biosi okhwola bibe ebiralikhwo nende obulema tawe.

²⁶Khulwamatukhu kane nakataru, abesaalisi batsienule olusambwa balurechekhe khulwoburumikhi.

²⁷Olwelihonga nalibe nilihweye, abesaalisi nabachiake okhuhaana khulusambwa emisango chiokhusambwa nende chiobuhambani echiabandu nabalere. Nilwo olwa namusangal'le inywe mwesi. Ise, OMWAMI Nyasaye mal'le okhuboola.”