Read lunyore ESEKIELI 44 Bible Online

ESEKIELI 44 - lunyore bible

ESEKIELI 44

¹Omundu tsana yambila khusilibwa siesioba esili elubeka webukwe habundu we Hekalu yali. Esilibwa siali nisikaye,

²ma OMWAMI niyambool'la mbu, “Esilibwa yisi nasimenye nisikaye ne sisiakhekulwekhwo tawe. Omundu namundu siahuchil'lwanga okhusirumikhila tawe, sichila Ise, OMWAMI Nyasaye wa Isiraeli, mal'le okhwinjil'lwamwo. Okhwola simenye nesiekala.

³Omusiani womuruchi owamihanga, kata mbwo, anyala okhutsiayo okhulia ebiokhulia ebitsienukhu ebili imbeli wanje. Alenjila ma arul'le mubwinjilo obubir'ranga musikoti siobwinjil'lo mubumal'likhi bwomukari.”

⁴Khe omundu tsana yambukula niyambisisia musilibwa siesinyolu okhutsia imbeli we Hekalu. Olwa ndahenga, ndalola Ehekalu yo MWAMI yali niyetsuye obulafu obumanyia obukhongo bubwe. Ndakwa hasi mafung'ama,

⁵ma OMWAMI niyambool'la mbu, “Omwana womundu, rekelesia amang'ana kosi akololanga nende okhuhulila. Nzitsanga okhukhubool'la amalako nende amebaalo kosi akokhurumikhila khu Hekalu. Omanyilisie bulahi nibandu sina abahuchil'lwanga okhwinjila nende okhurula mu Hekalu khandi nibandu sina abarahuchil'lwanga.

⁶“Bool'la abandu ba Isiraeli abeinduli yabo mbu Ise, OMWAMI Nyasaye sinanzilil'le okhwefwila ebindu bies'sinyo ebiabakhol'lenje tawe.

⁷Bafwabia ehekalu yanje khulwo khuhuchil'la abandu abacheni, abarasebwa abarambelesianga oluyali okhwinjila muhekalu olwetsisinya nende amatsahi kemusango kahanwanga khu ise. Kho abandu banje bafunaka indakano yanje khulwebindu biosi ebies'sinyo ebiabakhola.

⁸Sibahendelakhwo okhulinda ebindu ebiatsienulwa mu Hekalu yanje tawe, nebutswa musilenje sieyako babukula abacheni ma nibabakhola okhubisinjil'la.

⁹“Ise OMWAMI Nyasaye mbisianga mbu omundu wosi omucheni orasebwa, omundu wosi ourambetsanga oluyali arenjilakhwo mu Hekalu yanje tawe, kata omucheni omenyanga mubandu ba Isiraeli arakhenjilamwo tawe.”

¹⁰OMWAMI yambool'la mbu, “Mbananga esinyasio khu Balawi yabo, halala nende abandu ba Isiraeli bandi bosi abandekha nibekayakaya ebiniini.

¹¹Banyala okhurumikhila mu Hekalu khulwokhulinda ebilibwa nende okhukhola emilimo chiomu Hekalu. Banyala okhwira omuruko kwabandu bahan'ne singa omusango kwokhusambwa nende emisango chindi, khandi banyala okhuba khubulindi bwokhurumikhila abandu.

¹²Nebutswa sichila bali okhwemel'la obwekayakayi bwebiniini obwabandu ba Isiraeli bakhola ma munjila iyi bemel'la abandu mutsimbi, Ise, OMWAMI Nyasaye ndesuhanga mubwatooto mbu okhwola mbahelesie esinyasio.

¹³Sibalarumikha singa abesaalisi nohomba okhutsia ahembi khusindu siosi esili esitsienukhu khu ise kata okhwinjila Habundu Hatsienukhu okhusila tawe. Yisi nisio esinyasio khulwebindu ebies'sinyo ebiabali okhukhola.

¹⁴Mbahelesianga emilimo emititi echiokhukholwa mu Hekalu.”

¹⁵OMWAMI Nyasaye yaboola mbu, “Abesaalisi yabo abali abolwibulo lwa Lawi abetsukhulu ba Sadoku, kata mbwo batsilil'la okhurumikhila nobusubilwa mu Hekalu olwa abandu ba Isiraeli bandi bosi baakhupa omukongo. Kho luno nibo abanabarumikhile nende okhwitsa imbeli wanje okhumbelesia etsisinya nende amatsahi kemisango.

¹⁶Yabo bonyene nibo abanabenjilenge mu Hekalu, okhurumikha khulusambwa nende okhwemel'la obwekayakayi mu Hekalu.

¹⁷Olwa benjila mubwinjil'lo okhwola mumukitsi kwomukari okwemu Hekalu, okhwola bebiikhe tsingubo tsiekatani. Barebiikhakhwo ingubo yosi eyalombwa khubwayo olwa bali khumilimo mumukitsi kwomukari nohomba mu Hekalu tawe.

¹⁸Kho babule okhuraatsa oluuya, okhwola bebiikhe ebilemba biekatani nende ebilwali bwekatani nebutswa bareboha tsikhoba tawe.

¹⁹Nibasili okhutsia mumukitsi kwesioba owabandu bali, okhwola bahiinie tsingubo tsiabebiikhile nibali khuburumikhi mu Hekalu ma batsilekha mubikoti ebitsienukhu. Bebiikhe tsingubo tsindi mbu babiikhe ehale tsingubo tsinzienukhu khulwokhubula okhusaalisia abandu.

²⁰“Abesaalisi sibakwan'ne okhubeka emirwe chiabwe nolumwo nohomba okhulekha amaswi kabwe okhuba amarambi tawe. Benyekhanga bakalekhe okhuba noburambi obwahabwene.

²¹Abesaalisi sibakwan'ne okhunywa ewaini yosi nibasili okhutsia mumukitsi kwomukari tawe.

²²Omwesaalisi arateesia omukhasi walekhana nomusaatsa tawe, ateesie omukhaana Omuisiraeli osili nolukhaana nohomba omukhasi mulekhwa owomusaatsawe yafwa naali omwesaalisi.

²³“Abesaalisi bakhoya bekesie abandu banje obwabukhani buliho hakari webindu ebitsienukhu nende ebirali ebitsienukhu khandi hakari webindu ebili ebisiyikhu nende ebiomusilo.

²⁴Olwa oburambane bunyoolekha mubandu, abesaalisi babukol'losie okhulondokhana nende amalako kanje. Bakhoya okhulinda amasabo kedini okhulondokhana nende amalako kanje nende amebaalo kanje ma bakhoya okhulinda litukhu lie Sabato libe litsienukhu.

²⁵“Omwesaalisi siakhoyele okhuba musifwabwi siomusilo tawe khulwo okhufumila khumulambo tawe, nikurali okwa mulala khubebuli baabe, mulala khubaana baabe nohomba omusiani wabwe noho omukhaana wabwe osili okhutesibwa.

²⁶Namal'le okhuba omusiyikhu khandi, okhwola alinde khulwamatukhu kane nakataru

²⁷ma khe atsie mumukitsi kwomukari mwe Hekalu ma ahaane omusango kwokhwetsienula, ma kho abe onyala okhurumikha mu Hekalu khandi. Ise, OMWAMI Nyasaye mal'le okhuboola.

²⁸“Abesaalisi bali nende oburumikhi bwobwesaalisi singa omukabwa kwabwe okwandamala okhuhaana khu Isiraeli kube okwokhuhanwa okhurula khulwibulo okhutsia khulundi. Sibakwan'ne okhuba nende emiandu mu Isiraeli tawe; Ise ndi biosi ebiabatakha.

²⁹Emisango chiobuswache, emisango chietsimbi nende emisango chiokhurunga ebirarungwa nabetsenje ebiokhulia biabesaalisi, khandi bakhoya okhunyoola ebindu biosi mu Isiraeli ebiarebwa sibeka khulwe Ise.

³⁰Abesaalisi bakhoya okhunyoola amachese kokhuranga amalahi okhusila khukosi khandi khubindu bindi biosi ebimal'le okhuhanwa khu ise. Sieinyinga olwabandu batekha omukaati, bakhoya okhuhelesia abesaalisi omukaati kwokhuranga singa esihanwa, ma tsikhabi tsianje natsibe khutsingo tsiabwe.

³¹Abesaalisi sibakwan'ne okhulia linyonyi liosi nohomba inyama esolo eyene nohomba eyir'rwe nende esolo yindi tawe.”