Read lunyore ESEKIELI 45 Bible Online

ESEKIELI 45 - lunyore bible

ESEKIELI 45

¹Olwe liloba likabulwa okhuhelesia buli lwibulo, omukabwa kwalwo, esitonye silala okhwola sihanwe khu MWAMI. Sibe noburambi obuhela etsikilomita likhumi natsibili nende enusu ne obuchiikha bube tsikilomita likhumi. Esitonye yisio siosi nasibe esitsienukhu.

²Musitonye siene yisio mubemwo esitonye sieliloba esihelana tsimbeka tsiosi khulwe Hekalu, mbu etsimiita etsimia tsibili namakhumi karano khubuli lubeka, ma sibe nobukono obwalamu khutsimbeka tsiosi obuhela etsimiita amakhumi kabili nende tsirano ob'bambukhu.

³Enusu yobukono yibu mbu, oburambi bwetsikilomita likhumi natsibili nende enusu ne obuchiikha bwetsikilomita tsirano tsikhoya tsioburuchi okhurulakhwo; niho ahe Hekalu nebe Habundu Hatsienukhu Okhusila.

⁴Nahabe Habundu Hatsienukhu Okhusila, aharebwa sibeka khulwa abesaalisi abarumikhilanga OMWAMI mu Hekalu yiye. Namubemwo tsinyumba tsiabwe nende obukono bweliloba khulwe Hekalu.

⁵Enusu yesitonye sindi ekhoya okhulekhwa sibeka singa omukabwa kwa Balawi, abakholanga emilimo mu Hekalu. Amatookho matititi kakhabemwo khulwabo okhumenyamwo.

⁶Ahalondakhana nende obukono obutsienukhu, mbu esitonye sindi esili etsikilomita likhumi nende tsibili nende enusu hakhoya okhureebwa sibeka khulwe litookho eliomundu wosi Omuisiraeli anyala okhumenya.

⁷Liloba khandi likhoya okhulekhwa sibeka khulwomusiani womuruchi. Okhurula khulwakho lwemasaba lwesitonye esitsienukhu litsie okhwola emasaba okhwola khunyanza ya Mediterenia; khandi okhurula khulwakho lwebukwe litsie okhwola khulwakho lwebukwe lwesibala sia Isiraeli kho oburambi bwalio bube singa oburambi bweliloba eliahanwa khubetsinzibulo tsia Isiraeli.

⁸Esitonye yisi siakhabe omukabwa okwomusiani womuruchi yakhabe n'nakwo mwiloba lia Isiraeli, kho alabule khandi okhunuula abandu, nebutswa yakhelekhe esibala sindi siosi okhuba khubetsinzibulo tsia Isiraeli.

⁹OMWAMI Nyasaye yaboola mbu, “Mwakhola tsimbi oluhono olurambi, inywe abaruchi ba Isiraeli! Mulekhe obubi bwenywe nende obunuuli. Mukhole akali amalunji khandi akahabwene. Murakhunga abandu banje okhurula mwiloba liabwe khandi tawe. Ise, OMWAMI Nyasaye, nise omubool'langa yaka.

¹⁰“Siabulimulala okhwola arumikhile ebipimo biatooto nende ebichelo biatooto mbu:

¹¹“Efa imangalalu ehelane nende ebatsi khulwesipimo siebindu biamaatsi. Esipimo siokhuranga ne homa[8]. Ne ebipimo bindi bilaba singa mbu ehoma ndala ehelana netsilofa likhumi khandi ehelana nende etsibatsi likhumi.

¹²“Ebipimo bienywe bindi bibe singa mbu: Eshekeli ndala ebe etsigera amakhumi kabili. Emina ndala ebe etsishekeli amakhumi kasasaba.

¹³“Ebipimo yibi nibio ebianochel'lengemwo ebihanwa bibio. Ingano: Esitonye silala khumakhumi kasasaba esia amachese kenywe Eshahiri: esitonye silala khumakhumi kasasaba esia amachese kenywe Amafura komuseituni: Esitonye silala khumia ndala esiebitunde biemiseituni chienywe. (Mupiime nimurumikhilanga etsibatsi likhumi tsihelana nende ehoma ndala, ne ehoma ndala nayo ehelana nende ekori ndala). Amakondi: Likondi elala khumakondi tsimia tsibili okhurula khubiayo bienywe. “Mukhoya okhuleera ebihanwa biobuswache, emiruko echiokhusambwa emichima, nende emiruko chiemisango chiobuhambani kho tsimbi tsienywe tsilekhelwe. Ise OMWAMI Nyasaye ndakile ling'ana yilio.

¹⁶“Abandu bosi abomwiloba okhwola bahile emisango yichi khumusiani womuruchi owamihanga Isiraeli.

¹⁷Nakube omulimokwe okhuhaana emiruko chiokhusambwa nichili emichima, nemisango chiobuswache, nende emisango chiewaini khulwe lihanga liosi lia Isiraeli Mwisabo liomwesi, Omuyia, khwitukhu lie Sabato, nende amasabo kandi kosi. Akwana okhuhaana emisango chietsimbi, emisango chiobuswache, emisango chiokhusambwa nichili emichima, nende emisango chiobuhambani, khulwo okhuhiinia tsimbi etsiabandu ba Isiraeli.”

¹⁸OMWAMI Nyasaye yaboola mbu, “Khwitukhu liokhuranga eliomwesi kwokhurunga mukhoyanga muhaane omusango kwechulukhi erali nobulema bwosi ma musiiye Ehekalu.

¹⁹Omwesaalisi alabukula amalala khumatsahi komusango kwetsimbi yiku ma are khumatilwa kemiliango chie Hekalu, nokhutsimbeka tsine tsiolusambwa, nende khumatilwa komubwinjil'lo bwokhutsia mumukitsi kwomukari.

²⁰Khwitukhu liakhane nakhataru eliomwesi yikwo, namukhole amatelwa yako khulwomundu wosi okhola tsimbi naramanyile munjila yiyi mulakhola Ehekalu okhuba inzienukhu.

²¹“Khwitukhu lielikhumi nakhane eliomwesi kwokhuranga namuchiake okhulia Lisabo lie Pasaka. Khulwa amatukhu kane nakataru siomundu nalie omukaati okuralimwo amamela.

²²Khwitukhu liokhuranga elielisabo, omusiani womuruchi okhwola ahaane echulukhi singa omusango kwe tsimbi tsitsie nende etsiabandu bosi.

²³Khubuli elala khumatukhu kane nakataru akelisabo, akhoya ahaane omusango khu MWAMI mbu etsichulukhi tsine natsitaru nende amakondi kane nakataru ebirali nende obulema bwosi tawe, ma emiruko chiene yichio chisambwe emichima. Akhoya okhuhaana omusango kweimbusi ekhole buli litukhu singa omusango kwetsimbi. Ahaane omusango kweimbusi ekhole buli litukhu singa omusango kwetsimbi.

²⁴Khubuli echulukhi nende khubuli likondi elimal'le okhuhanwa singa omusango okhwola omusango kubeho okwetsiliita likhumi nende tsine natsitaru nende enusu yelifa yobuswache nende etsiliita tsitaru etsiamafura komuseituni.

²⁵“Khulwe lisabo lia Mahindu, elichiakanga khwitukhu lielikhumi nakharano eliomwesi kwakhane nakhataru, omusiani womuruchi ahaane khubuli litukhu liakhane nakhataru emisango emitelwa khulwe tsimbi, emisango emitelwa echiokhusambwa nichili emichima nende emisango emitelwa echiobuswache nende echiamafura komuseituni,”