Read lunyore ESEKIELI 47 Bible Online

ESEKIELI 47 - lunyore bible

ESEKIELI 47

¹Omundu tsana yangalusia inyuma mubwinjil'lo bwomu Hekalu. Amaatsi kali nikarulanga muusi mubwinjil'lo nikabiranga okhutsia ebukwe, elubeka owe Ehekalu yahenga. Kwali nikubiranga okhurula elubeka lwe enandete we Hekalu nobir're enandete wolusambwa.

²Omundu tsana yambukula niyambinia ahe Hekalu yali, ma niyambil'la khunjila yesinyolu ma niyambila khulubeka lundi khusilibwa esiahenga ebukwe. Akhachela khatititi akhamaatsi khali nikharulanga elubeka lwenandete wesilibwa.

³Nali nende olusalalwe olwokhupima, omundu tsana yapima etsimiita etsimia tsirano nalondanga omuchela tsana okhutsia ebukwe ma niyambool'la khalanie okhubir'ra m'muchela. Amaatsi kali okhumbel'la butswa mutsisokosoko.

⁴Khe yapima etsimiita etsimia tsirano tsindi, ma amaatsi ketsa okhwola khumasikamo. Khandi napima etsimiita etsimia tsirano tsindi okhutsia emwalo, amaatsi nikoola mus'sienje.

⁵Napima etsimiita etsimia tsirano tsindi, ma yaho omuchela kwali olutungu olurambi okhusila niranyala okhukhalania okhubir'ramwo. Kali okhutsia olutungu okhusila akarakhakhalanisie ninjendanga niharali okhwel'lema butswa.

⁶Niyambool'la mbu, “Omwana womundu, ohengelesie yaka obulahi.” Ma omundu tsana niyambukula niyangalusia khundulo khwomuchela,

⁷ne olwa ndoolayo, ndalola mbu emisaala chialiho eminji okhusila khubuli luchinga.

⁸Niyambool'la mbu, “Amaatsi yaka kelukhanga okhubir'ra mwiloba okhutsia ebukwe nende emwalo okhutsia mwibanda lia Yorodani ma koolanga munyanza Yechumbi. Olwa kelukhanga nikatsia Munyanza Eyafwa, kakobokhanga mubukono bwamaatsi kechumbi munyanza iyio niketsamwo amalahi.

⁹Buli olwomuchela kubiranga ne kuleranga tsimbila tsiosi etsie tsisolo nende tsisuche. Omuchela nakulombe amaatsi akeinyanza Yechumbi okhuba amalahi, ma hosi ahakubiranga kulerangaho obulamu.

¹⁰Okhurula mumichela chia Engedi okhwola khumichela chia Enegilaimu, bakhabeho abalubi khundulo kweinyanza, ne bakhaaleho etsineti tsiabwe khulwo khwoma. Tsiakhabeho tsimbila tsinyinji etsie tsisuche singa etsili munyanza ya Mediterenia.

¹¹Nebutswa amaatsi mumatabalia nende mumayabo khundulo khweinyanza sikakhabe amalahi tawe. Kakhamenye yaho khulwokhuhaana echumbi.

¹²Khubuli oluchinga lwomuchela, emisaala chiosi echieimbila yosi chiakhakhule khulwokhuhana ebiokhulia. Amasaafu kachio sikakhaniale tawe, ne sichiakhalekhe okhwama amatunde tawe. Chiakhabe nende amatunde amayia buli mwesi, sichila tsisamwanga nende omuchela okhwilukhanga okhurula mu Hekalu. Emisaala natsihaane ebiokhulia, ma amasaafu kakharumikhilwe khulwo okhuhonia abandu.”

¹³OMWAMI Nyasaye yaboola mbu, “Yitsi netsinzakho tsieliloba elia nalikabulwe mutsinzibulo likhumi natsibili, ne olwibulo lwa Yosefu nalunyoole emikabwa tsibili.

¹⁴Ise ndali okhusubisia abakuka benywe mbu ndakhabahelesie liloba yili okhulibukula, luno mulikabule mubuhelani hakari wenywe.

¹⁵“Olwakho olwe esinyolu lutsitsanga enabukwe okhurula khu Nyanza ya Mediterenia okhwola khwitookho lia Hetsiloni okhutsia khulung'anyi lwa Hamatsi nende mwitookho lia Sedadi,

¹⁶okhutsia okhwola khumatookho ka Berotsa nende Sibiraimu (kanyoolekhanga hakari holusoma lwesibala sia Damasiko nende Hamatsi), ma lutsia khwitookho lia Takoni (elili ahembi nende olwokho lwesibala sia Haurani).

¹⁷Kho olwakho lwesinyolu lurulanga khunyanza ya Mediterenia ebukwe okhutsia okhwola khwitookho lia Enoni, olwakho olwa Damasiko nende olwa Hamatsi nitsili esinyolu walio.

¹⁸“Olwakho lwebukwe olutsitsanga enandete okhwola habundu ahali hakari holusoma lwa Damasiko nende olusoma lwa Haurani, ne omuchela kwa Yorodani nikulombanga olwakho hakari wesibala sia Isiraeli khulubeka lwemasaba ne Gileadi khulubeka lwebukwe okhutsia okhwola Tamari khu Nyanza Yechumbi.

¹⁹“Olwakho lwenandete lwolanga enandete yemasaba okhurula Tamari okhwola khumaatsi komusitsimi sia Kadeshi, ma luhenga esinyolu yemasaba nilulondanga olwakho lwe Emisiri okhutsia khu Nyanza ya Mediterenia.

²⁰“Olwakho lwemasaba lulondanga inyanza ya Mediterenia ma lutsia esinyolu okhwola emasaba wolung'anyi lwa Hamatsi.

²¹“Mukabule liloba yili mutsinzibulo tsienywe;

²²Nalibe omukabwa kwenywe okweinziayo. Abacheni abamenyanga mwinywe abali nabaana abebul'lwa hano khandi nabo bakabul'lwekhwo omukabwa okweliloba olwa mukabula. Bakwana bakhol'lwe singa abebule ba Isiraeli khandi babe abanyala okhukhupa imbulu khulwa obukabuli bwamaloba halala netsinzibulo tsia Isiraeli.

²³Abacheni abamenyanga mwinywe bakwana banyoole omukabwa mubandu bolwibulo ababamenyangamwo. Ise, OMWAMI Nyasaye, mal'le okhuboola.”