Read lunyore ESEKIELI 48 Bible Online

ESEKIELI 48 - lunyore bible

ESEKIELI 48

¹Ne kano niko amera ketsinzibulo: Dani yahebwa esitonyesie sieliloba esili okhurula esinyolu khunjila ya Hetsiloni okhutsia Lebo Hamatsi okhwola Hasarenani khulwakho lwa Damasiko, ma okhutsia khulung'anyi lwa Hamatsi okhurula ebukwe okhutsia emasaba.

²Asheri naye yahebwa esitonye sie sieliloba esilondokhananga nende Dani okhurula khulubeka lwebukwe okhutsia emasaba.

³Nafutali naye yanyoola esitonyesie sieliloba esilondokhananga nende Asheri okhurula ebukwe okhwola emasaba.

⁴Manase naye yanyoola esitonyesie sieliloba esilondokhananga nende Nafutali okhurula ebukwe okhwola emasaba.

⁵Efuraimu naye yanyoola esitonyesie esilondokhananga nende Manase okhurula ebukwe okhutsia emasaba.

⁶Rubeni naye yanyoola esitonyesie esilondokhananga nende Efuraimu okhurula ebukwe okhutsia emasaba.

⁷Yuda naye yanyoola esitonyesie sieliloba esilondokhananga nende Rubeni okhurula ebukwe okhutsia emasaba.

⁸Esitonye silondakhwo esieliloba nesiokhulekhwa sibeka khulwo oburumikhi obuchomekhe. Siali nobuchiikha obuhela etsikilomita likhumi natsibili nende enusu okhurula esinyolu okhwola enandete, khandi oburambi nibuhela mbwo okhurula ebukwe okhwola emasaba okhuhelana nende esitonye esiahanwa khutsinzibulo. Ehekalu yakhabe musitonye yisi.

⁹Hakari wesitonye yisi, liloba lichomekhe obuli noburambi etsikilomita likhumi natsibili nende enusu ne obuchiikha obuhela etsikilomita likhumi neliokhuhanwa khu MWAMI.

¹⁰Abesaalisi banyoolekhwo esitonye khwiloba litsienukhu yili. Okhurula ebukwe okhwola emasaba esitonye siabwe sienyekhanga sibe etsikilomita likhumi natsibili nende enusu ne okhurula esinyolu okhutsia enandete sibe etsikilomita tsirano. Ehekalu yo MWAMI elaba hakari wesitonye yisi.

¹¹Habundu hatsienukhu yaha nahabesaalisi abali abetsukhulu ba Sadoku. Baarumikhila nobusubilwa ma sibaali okhutsokana nende abandu ba Isiraeli bandi mukhukhola obubi singa abandu bandi abolwibulo lwa Lawi bakhola tawe.

¹²Kho okhwola banyoole esitonye esichomekhe esilondokhananga nende esitonye sia Balawi ma nahabe ahatsienukhu okhuyomba ebitonye bindi bieliloba.

¹³Abalawi nabo khandi bakhoya okhuhebwa liloba lichomekhe, elili enandete wesonye sibesaalisi. Nasio khandi sibe etsikilomita likhumi natsibili nende enusu okhurula ebukwe okhutsia emasaba, ne etsikilomita tsirano okhurula esinyolu okhutsia enandete.

¹⁴Liloba elihan'nwe khu MWAMI nesitonye esilahi okhusila mwiloba liosi ne esitonye siosi khusio sisiakhakusibwakhwo nohomba okkhusilanibwa nohomba okhuhebwakhwo omundu undi wosi. Nesitsienukhu khandi nesitonye sio MWAMI.

¹⁵Esitonye sieliloba lichomekhe elisikalanga elili noburambi obuhela etsikilomita likhumi natsibili nende enusu ne obuchiikha etsikilomita tsibili nenusu, silili litsienukhu tawe, nebutswa neliokhurumikhilwa nabandu bosi. Abandu banyala okhumenyaho nibarumikhila omukunda. Litookho libe hakari walio

¹⁶ne libe lihelani tsimbeka tsiosi, mbu libe etsimiita etsielefu tsibili netsimia tsibili namakhumi karano buli olubeka.

¹⁷Khutsimbeka tsiosi tsie litookho khubuli lubeka hakhabeho obweyangu obwalamu obuhela etsimiita emia ndala namakhumi kabili nende tsirano okhurula iyi okhwola iyi.

¹⁸Liloba elisikala olunyuma lwelitookho okhwombokhwa musitonye esilondokhananga nende enandete wesitonye esitsienukhu esili noburambi obuhela etsikilomita tsirano ne obuchiikha etsikilomita tsibili nende enusu olubeka lwebukwe khandi oburambibwe etsikilomita tsirano nende obuchiikha bwe tsikilomita tsibili nenusu olubeka lwemasaba lirumikhilwe singa omukunda nende abandu abamenyanga mwitookho.

¹⁹Omundu wosi omenyanga mwitookho kata abe owolwibulo sina anyala okhulima omukunda yikwo.

²⁰Kho liloba liosi elili hakari hesitonye esiabikhwa sibeka bwakhabe obuhelani tsimbeka tsiosi mbu etsikilomita likhumi natsibili nende enusu khubuli lubeka, ne liakhabemwo nende esitonye esie litookho liombokhwamwo.

²¹Liloba lisikalanga nalibe eliomuruchi khulubeka l'lala ne khulubeka lundi nalibe esitonye esitsienukhu nende esie litookho ne lichiachilanga ebukwe nilitsia emasaba, ne Ehekalu nebe hakari waho.

²²Ne nohinisie khwesitonye sia Balawi nende esitonye sielitookho liombokhwamwo, ebili hakari weliloba liomuruchi elindi liosi elili hakari holwakho lwa Yuda nende olwakho lwa Benjameni nalibe eliomuruchi.

²³Ne khulwetsinzibulo tsindi: Benjameni yanyoola esitonyesie sieliloba okhurula ebukwe okhwola emasaba.

²⁴Simioni naye yanyoola esitonyesie sieliloba esilondokhananga nende Benjameni okhurula ebukwe okhutsia emasaba.

²⁵Isakari naye yanyoola esitonyesie esilondokhananga nende Simioni okhurula ebukwe okhutsia emasaba.

²⁶Sabuloni naye yanyoola esitonyesie esilondokhananga nende Isakari okhurula ebukwe okhutsia emasaba.

²⁷Gadi naye yanyoola esitonyesie esilondokhananga nende Sabuloni okhurula ebukwe okhutsia emasaba.

²⁸Khulubeka lwenandete lwesitonye esiahanwa khubolwibulo lwa Gadi, olwakho lwarulanga enandete nilutsia emasaba okhurula Tamari okhutsia khwiloba liamaatsi elili musitsiimi lia Kadeshi, ma lurula esinyolu niluhengele emasaba nilulondanga khulwakho lwe Misiri okhutsia khu Nyanza ya Mediterenia.

²⁹OMWAMI Nyasaye yaboola mbu, “Iyio niyo injila eyeliloba likwan'ne okhukabulwa mubitonye khulwe tsinzibulo tsia Isiraeli okhunyoola omukabwa.”

³⁰Ebilibwa biokhwinjila mwitookho lia Yerusalemu biakhabe likhumi nabibili singa mbu. Khulubeka lwesinyolu lisisi liali etsimiita etsielefu tsibili netsimia tsibili namakhumi karano.

³¹Ebilibwa bitaru biakulikhwa amera ketsinzibulo tsitaru tsia Isiraeli mbu; esilibwa sia Rubeni, esilibwa sia Yuda nende esilibwa sia Lawi.

³²Lisisi lwebukwe liali nende obuchiikha obuhela etsimiita etsielefu tsibili, netsimia tsibili namakhumi karano. Liali nebilibwa bitaru mbu: esilibwa sia Yosefu, esilibwa sia Benjameni, nende esilibwa sia Dani.

³³Lisisi lienandete liali nobuchiikha obuhela etsimiita etsielefu tsibili netsimia tsibili namakhumi karano. Liali nebilibwa bitaru mbu, esilibwa sia Simioni, esilibwa sia Isakari nende esilibwa sia Sabuloni.

³⁴Lisisi liemasaba liali nobuchiikha obuhela etsimiita etsielefu tsibili, netsimia tsibili namakhumi karano. Nalio khandi liali nebilibwa bitaru mbu Gadi, Asheri, nende Nafutali.

³⁵Oburambi bwosi obwe lisisi tsimbeka tsine etsie litookho ni etsimiita etsielefu tsirano natsine. Eliira lielitookho okhurula olwaleelo okhutsia imbeli nalibetsenje: “OMWAMI Ali Hano!”