Read lunyore ESEKIELI 5 Bible Online

ESEKIELI 5 - lunyore bible

ESEKIELI 5

¹OMWAMI yambool'la, “Omwana womundu, bukula olukanga olwochi olurumikhile singa olumwo niweebeka omurwe nende esilefu sisio. Ma obukule eratili yokhuchela liswi tsana, ma olikabule mubituma bitaru.

²Esitonye esinabitaru sieliswi olisambe m'mul'lo hakari welitookho nyinga amatukhu kokhufumbilwa khwalio nabasuku kaba nikahweye. Obukule esitonye sindi esinabitaru osikhalake nende olukanga okhubotokhania khwitookho esioba. Esitonye esisikala esinabitaru nasio osifuube ikulu sipulusibwe nomuyeka ne nase nalilondel'le nolukanga.

³Nawe wakhabukulekhwo liswi lititi ma olifumbile mulusiche lwetsingubo tsitsio.

⁴Nebutswa khutsiene yitsio olabukulakhwo khandi elindi litititi ne nolifuuba mumul'lo, nolekha lisambwe nomul'lo. Okhurula muliene yilio, omul'lo kularulamwo nikulanda musibala sia Isiraeli siosi.”

⁵Kano niko ako OMWAMI Nyasaye aboolanga; “Reela khu Yerusalemu yili tsimoni. Ndali okhulira hakari wesibala ne tsinzibulo tsindi nitsialibotokhana.

⁶Nebutswa Yerusalemu liamala nilikhol'la amalako kanje indiri ma nilimanyia mbu nelibibibi okhuyomba tsimbia tsindi tsiosi, khandi abandu baho nibamanyia mbu nabesikala marwi okhuyomba amahanga akalibotokhana. Yerusalemu liali niliasuula okhulinda amachetsiyio kanje.

⁷Khulwakene yako, Ibe Yerusalemu hulila ake ise OMWAMI Nyasaye mboolanga. Khulwo khubula okhuhesia amalako nohomba okhulinda amebaalo, muchemeye amanyakhano amenji okhuyomba tsinzibulo tsindi etsiamubotokhana inywe. Mulondanga emiima chiamahanga kandi.

⁸Khulwako Ise OMWAMI Nyasaye mubool'langa mbu, Ise ndi omusuku wenywe. Namukhalachile esiina imbeli wabetsimbia bosi.

⁹Ne khulwe ebikhole bienywe ebies'sinyo khu ise nambelesie Yerusalemu esinyasio esia sili okhuhanakhwo, kata khandi sindikholakhwo esifwana mbwo olundi tawe.

¹⁰Khulwako abebuli bakhalie abaana babwe, ne abaana nabo bakhalie abebuli babwe mu Yerusalemu. Ne bosi abakhahonokokha ndibaha esinyasio nimbasalania okhutsia mutsimbeka tsiosi.

¹¹“Khulwako, singa obwe ise ndi OMWAMI Nyasaye oli mwoyo, sichila inywe mwafwabia Ehekalu yanje nende ebindu bienywe biemisilo nende obwononekhu bwenywe bwosi, namuremache mwesi okhukwa hasi, ne sinambelekhwo omundu wosi tsimbabasi tawe,” nimbwo OMWAMI Nyasaye aboolanga.

¹²Esitonye esinabitaru khwinywe nabafwe khulwo obulwaye nende inzala mwitookho; ne esitonye esinabitaru khwinywe nabaremakwe nolukanga esioba welitookho; ne esitonye esinabitaru sindi khwinywe nabasalane singa omuyeka ne nimbalondel'la nolukanga.

¹³“Nenywe namuhul'le obusiro bwelirima lianje nende obululu bwanje ma nilwo olwa nase nandehotselesie. Olwa akene yako nakekhole, nenywe namumanye mbu ise OMWAMI ndali okhul'loma muimbalikha yanje khulwo okhubula obusubilwa khwenywe.

¹⁴Abandu bosi okhurula mumahanga akali ahembi n'nenywe abakhabir're ahembi n'nenywe bakhamutsekhel'le nibasinjil'la ehale.

¹⁵“Olwa namutiil'le lileko nende oburima ma nimuha esinyasio, amahanga akali ahembi n'nenywe nakatechesibwe. Abandu bamwo nabamuhengenge nibamuchayilisia nende okhumutsekhel'la.

¹⁶Nandekhe okhumuhelesia ebiokhulia ma nandekhe inzala nemwire. Namuhul'le okhutsunwa khweinzala singa tsisele tsinzochi etsia nderanga okhumusaalisia.

¹⁷Ndiruma inzala nende tsinyama nabulimo okhwira abaana benywe, ne obulwaye, obulwani nende amahe hakari wenywe okhumwira. Ise OMWAMI mal'le okhuboola.”