Read lunyore ESEKIELI 6 Bible Online

ESEKIELI 6 - lunyore bible

ESEKIELI 6

¹OMWAMI yal'loma n'nase naboola mbu,

²“Omwana womundu, henga khubikulu bia Isiraeli, ma obool'le abandu bamenyangakhwo amang'ana kanje.

³Obabool'le mbu, Inywe abamenyanga mubikulu bia Isiraeli, hulile ling'ana lio MWAMI Nyasaye; hulile ake ise MWAMI Nyasaye mbool'langa yabo abamenyanga mubikulu ebirambi nende ebimbichiti mumaboona nende mumabanda: mbu Ise, nandeere olukanga khwinywe, ne nanzononie habundu ahabandu bekayakayilanga ebiniini.

⁴Tsisambwa tsiemisango natsituyilwe hasi kata tsisambwa tsiokhusambilakhwo obwali tsilatuywa. Abandu bosi abekayakayilangaho naber'rwe imbeli wabiniini biabwe.

⁵Ndakhasalanie emilambo chiabandu ba Isiraeli imbeli wabiniini ebia benamilanga. Ndakhasalanie amakumba kabwe okhubotokhana tsisambwa tsiabwe tsimbeka tsiosi.

⁶Amatookho ka Isiraeli kosi nakamumwe, ma khulwako tsisambwa tsiabwe nende ebiniini biabwe nabilikul'lwe nibikwa mubitonye, tsisambwa tsiabwe tsiobwali natsisasakwe ne ebindu biosi ebia balomba nabikore.

⁷Abandu bakher'rwe habundu hosi, ne yabo abalihonokokha bakheyame mbu ise nise OMWAMI.

⁸“Kata mbwo ndilekhakhwo abalala mwinywe okhuba mwoyo, ma balasalanibwa mumahanga kandi,

⁹aha bakhamenye mukhwatisibwa. Ebwene iyo balinzitsul'la ma balimanya mbu nise obaheye esinyasio nende okhubasimbia omurwe sichila khulwokhubula okhuba abasubilwa, bali okhunzilukha ne bayanza ebiniini okhuyomba ise. Ne abene bakhetule khulwobubi bwabwe nende ebindu bies'simba murwe ebia bakhola.

¹⁰Bakhamanye mbu ise nise OMWAMI khandi mbu amachetsiyio kanje sikaali butswa ebirisio ebiabutswa tawe.”

¹¹OMWAMI Nyasaye yaboola mbu, “Khupe amakhono! Ritsile ebilenje bienywe hasi! Mulakaye musibeela khulwo obubi nende ebindu biesifwabwi ebia Baisiraeli bamal'le okhukhola. Bakhafwile mwihe, khandi bakhafwe inzala, nende obulwaye.

¹²Yabo abali ehale okhusila bakhatekhelane mubulwaye ma nabafwe; yabo abali ahembi bakhafwile mwihe; ne yabo aba nabahonokokhe nabafwe khulwe esimotso. Nimbwo tsingufu tsioburima bwanje natsihwel'le khubo.

¹³Emilambo chiabandu chiakhasalanibwe mubiniini nende khutsisambwa tsiosi nachisalanibwe khubikulu ebirambi nende khubimbichiti, isi wemisaala emibisi nende womusaala kwomufuri nende habundu aha basambilanga emisango khubiniini biabwe. Ma nilwo olwabandu bosi nabamanye mbu ise nise OMWAMI.

¹⁴Ne ndakhanyiile omukhono kwanje okhumuma esibala siabwe. Nasikhole okhuba likunda okhurula musiyieyie sienandete, okhwola khwitookho lia Ribula elili esinyolu; niralekhakhwo habundu hosi aha Baisiraeli bamenyanga. Nilwo olwa abandu bosi bakhamanye mbu nise OMWAMI.”