Read lunyore ESEKIELI 7 Bible Online

ESEKIELI 7 - lunyore bible

ESEKIELI 7

¹OMWAMI yal'loma n'nase naboola mbu,

²“Omwana womundu, kano niko ake ise OMWAMI Nyasaye mboolanga khusibala sia Isiraeli: Esihesi siesibala siosi simal'le okhwola.

³“Isiraeli, esihesi simal'le okhwola. Nasundule lirima lianje khuibe nikhukhalachila esiina khulwe ebikhole bibio. Khandi nakhurunjie khulwe ifwo yiyo imbibibi.

⁴Sinakhulekhelekhwo kata okhukhubelel'la tsimbabasi tawe. Nzitsanga okhukhuhelesia esinyasio khulwe ebikhole bibio ebibibibi, ne nilwo olwa nomanye mbu ise nise OMWAMI.”

⁵Kano niko ako MWAMI Nyasaye aboolanga, “Amakhupako nakakhwitsile nikalondananga.

⁶Lole ketsanga habundu hosi. Yisi nisio esihesi. Inywe mumal'lwe pe.

⁷Esihesi siitsanga khwinywe abamenyanga musibala. Inyinga yitsanga olwa amasabo kobusangali khubikulu biemisango nakahwe, nayo neinyinga yesikhu.

⁸“Bwangu yibu nasundule oburima bwanje khwinywe ne namal'la lileko lianje khwinywe. Mukhalachilanga inywe khulwe ebikhole bienywe ne namurunjie khulwe ifwo yenywe imbibibi.

⁹Sinamulekhelekhwo kata okhumubelel'la tsimbabasi tawe. Namuhe esinyasio khulwe ebikhole bienywe ebibibibi, ne nilwo olwa namumanye mbu ise nise OMWAMI omuhetsanga esinyasio.

¹⁰“Lole, litukhu liesibi litsanga khu Isiraeli. Obulwani bumeetekhanga! Esunga isilaan'ne!

¹¹Obulwani bumeetanga obubi khubundi. Sibulaho esia nasisikale khulwabo tawe; kata sibulaho esianasisikale khubuhinda bwabwe, kata khubulahi bwabwe nohomba khubukhongo bwabwe tawe.

¹²“Inyinga yitsanga. Litukhu litsanga olwa okhukula nende okhukusia nabibule esifune, sichila esinyasio esia Nyasaye ahaananga nasikwile abandu bosi.

¹³Omukholi wobukhala sinamenye okhwola olwa nanyoola esia yakosia tawe sichila oburima bwa Nyasaye buli khubandu bosi. Yabo abakholanga obubi sibalamenya tawe.

¹⁴“Etsinzika tsikhupilwe ma abandu berechekhele. Nebutswa abulaho otsiye mwihe. Okhuba oburima bwa Nyasaye buli khubandu bosi.

¹⁵“Obulwani buliho mutsing'anyi, ne obulwaye nende inzala bili mumataala. Omundu wosi oli mumataala alafwila mubulwani naye oli mwitookho alafwa khulwobulwaye nende inzala.

¹⁶Ne abalala nabahonokokhele mubikulu, singa amakhulwi akarisibubwe okhurula mumabanda. Bo bosi nabekhuule khulwe tsimbi tsiabwe.

¹⁷Amakhono kabandu bosi nakatendeye, ne amasikamo kabwe nakabe amatekhele.

¹⁸Nabebikhe tsingubo tsiamatasi ne nabatechele khulwe indenga habundu hosi. Nababekwe murwe olwale ma es'simba murwe nasibahambe bosi.

¹⁹Nabafuube efetsa yabwe nende etsahabu mumihanda, singa amakokha sichila efetsa nende etsahabu yabwe sienyala okhubanunula olwo MWAMI asundulanga oburima bubwe khubo tawe. Sibanyala okhutsirumikhila okhuhesia obwekombi bwabwe tawe kata sibanyala okhutsilia ma bekure tawe. Etsahabu nende efetsa biachila niboona.

²⁰Balinji okhwelahil'la ebiesiaho biabwe ebieing'ono, nebutswa babirumikhila okhukunzakhwo ebiniini bies'sinyo. Niko akachilanga OMWAMI nakhola emiandu chiabwe okhubakalukhana.”

²¹OMWAMI yaboola mbu, “Nandekhe abacheni babakaate, khandi abandu abaralondanga amalako nababanuule emiandu chiosi ma nabachifwabie.

²²Sinanzikal'lekhwo abanuuli olwa nabafunake Ehekalu yanje inzienukhu nibakhol'lamwo akesifwabwi tawe.

²³“Ebindu biosi bili mungoyingoyi; esibala sitsuyemwo obwiri ne amatookho nako ketsuyemwo obulwani.

²⁴Nandeere tsimbia tsiabandu ababi okhusila okhubukula tsinyumba tsienywe. Abasaatsa benywe abakufu nabarimukhwe ikholo olwa nandekhe amahanga yako okhufwabia habundu aha mwekayakayilanga.

²⁵Okhubengukha nakhubeho. Namurune omulembe, nebutswa sinamukunyoole tawe.

²⁶Esibi nasiitse okhumeeta khusibi sindi, khandi amang'ana kokhubeelesia nakabe amenji mwinywe. Namuhombe abaroobi okhumubool'la akabalolanga mumabisulo kabwe. Abesaalisi nabo sibakhabe nende eliokhwibaal'la abandu tawe. Kata abakhulundu sibakhabe nobuchetsiyi bwosi tawe.

²⁷Omuruchi nayekhuule, omukhongo nahiniekhwo omwoyo ne abandu nabo nabatechele khulwo oburi. Namuhelesie esinyasio khulwamang'ana kosi akamwakhola ne namukhalachile okhuhelana nende obukhalachi obwa mwakhalachila abandi. Yaka nakamumanyie mbu ise nise OMWAMI.”