Read lunyore ESEKIELI 8 Bible Online

ESEKIELI 8 - lunyore bible

ESEKIELI 8

¹Mumuhika kwakhasasaba, mumwesi kwakhasasaba, khwitukhu liakharano liomwesi yikwo ndali ninzikhaye munzu mwanje, nende abemeli ba Yuda. Nonoho obunyali bwo MWAMI bwetsa khu ise.

²Ndachinguula tsimoni, ma nindola libisulo liomundu owakhanga singa omul'lo. Okhurula mus'sienje sisie okhwikha hasi yalolekha singa omul'lo, ne okhurula mus'sienje sisie okhutsia ikulu, yaakha singa omukasa okwaruutwa.

³Yanyiila esindu esiafwana singa omukhono, niyafumila liswi liokhumurwe kwanje. Ma mwibisulo tsana omwoyo wa Nyasaye niyanjinguula ikulu mumiiya hakari wesibala nende likulu ma niyambila Yerusalemu. Yambila hamuliango kwesilibwa siomuchitsi kwomukari okuhengele esinyolu we Hekalu ahesinini siali nisiarebwa nasio siali esies'sinyo khu Nyasaye.

⁴Habwene yaho ndalola obulafu obukhongo obumanyianga okhubaho khwa Nyasaye wa Isiraeli, singa butswa ndali nimbuluutsi olwa ndali hamuchela kwa Kebari.

⁵Ma Nyasaye niyambool'la mbu, “Omwana womundu, chiingula tsimoni tsitsio ikulu ohenge esinyolu.” Olwa ndahenga, ndalola esiniini sies'sinyo khu Nyasaye nisili ahembi nende olusambwa oluli habwinjil'lo bwesilibwa.

⁶Ne niyambool'la mbu, “Omwana womundu, ololanga akabakholanga? Lola ebindu bies'sinyo ebiabandu ba Isiraeli bakholanga hano okhunzilusia okhutsia ehale okhurula habundu hanje hatsienukhu. Nebutswa nolole amang'ana kes'simba murwe amenji okhuyomba yaka.”

⁷Ne yamala yambile habwinjil'lo bwomuchitsi kwesioba ma niyamanyia omuluhu mwisisi.

⁸Ma niyambool'la mbu, “Omwana womundu, futula mwisisi,” ne nyinga ndafutula mwisisi yimwo, ndanyoolamwo omuliango.

⁹Kho niyambool'la mbu, “Tsia winjilemwo, ma olole ebindu ebibi ebiebisi'sinyo ebiabakhol'langamwo.”

¹⁰Nase ndenjilamwo ma nimenga. Amasisi kali niketsulakhwo amang'oole ketsinzokha tsiomusilo, nitsimoolanga, nende etsisolo tsiemisilo tsimbila tsiosi ma nende ebiniini biosi ebia Baisiraeli bekayakayanga.

¹¹Ne imbeli wabio basinjilaho abemeli ba Isiraeli amakhumi kane nakataru nibali halala nende Yaazania omusiani wa Shafani. Siamulala yali nende olwelo lulwe olwokhusamba obwali m'mukhono kukwe, ne omwosi kwali nikutumanga okhurula khubwali tsana.

¹²Nyasaye niyareeba mbu, “Omwana womundu, uluutsi akabemeli Baisiraeli bakholanga m'mambiswi? Bosi bekayakayilanga musikoti esitsuyemwo ebifwanani. Okhuba baboolanga mbu, ‘Omwami siakhulolanga ifwe tawe! Ye umal'le okhukhupa lihanga omukongo.’ ”

¹³Ma OMWAMI khandi niyambool'la “Ibe khandi nolole nibakholanga ebindu ebinji bies'sinyo okhuyomba yibio.”

¹⁴Kho yambila habwinjil'lo bwesilibwa siesinyolu, esie Hekalu ma niyamanyia abakhasi abali nibekhuulanga khulwokhufwa khwomunyasaye olangwanga Tamusi[1]

¹⁵Nyasaye niyareeba mbu, “Omwana womundu uluutsi akabakholanga yako? Ibe notsilil'le okhulola ebindu bies'sinyo ebinji okhuyomba bino.”

¹⁶Kho yambila m'mukitsi kwomukari mwene okwe Hekalu. Ne habwene yaho ahembi nomuliangokwe Hekalu, hakari holusambwa nende olusimbo, baliho abasaatsa amakhumi kabili nabaraano nibakhupile emikongo khuhekalu yo MWAMI ne nibahunamiye m'moni mwabwe ebukwe ne nibekayakayanga eliuba ndirulanga.

¹⁷OMWAMI niyambool'la mbu, “Omwana womundu, uluutsi akabakholanga? Abandu ba Yuda sibekuranga okhukhola ebindu bies'sinyo ebia omal'le okhukhola hano yibi nende okhwitsusia obulwani musibala tawe. Nebutswa benyanga okhunjema oburima khulwo khwitsa okhukakhol'la mu Hekalu yene. Lola obwa banyekanga amanyeko kokhumbiyia omwoyo!

¹⁸Khulwa akene yako, nasundule oburima bwanje khubo. Sinambalekhelekhwo kata okhubabeela tsimbabasi tawe.”