Read lunyore ESEKIELI 9 Bible Online

ESEKIELI 9 - lunyore bible

ESEKIELI 9

¹Ma nimbul'la Nyasaye nalanjisia nomwoyo omukali naboola mbu, “Mwesunde ahembi, inywe abatsitsanga okhuleera esinyasio khwitookho. Mwitse nebilasan'no bienywe.”

²Ne nonoho abasaatsa basasaba beetsa nibarula enasilibwa siesioba esili esinyolu, ne buli mundu yali nesilasan'no sisie. Ne yaliho mulala mubo owali niyebikhile tsingubo tsiekatani, nali nende ekalamu nobwino ebiokhuhandichila, nibibohelwe khukhukunyu. Ne bosi benjila, nibasinjila halusambwa lwomukasa.

³Yaho obulafu obukhongo obumanyianga okhubaho khwa Nyasaye wa Isiraeli bwaakha okhurula Khubakerubi, aha bwali nibuli, ma nibutsia habwinjil'lo bwe Hekalu. Ma OMWAMI nalanga omundu owali niyebikhile tsingubo tsiekatani, namubool'la mbu,

⁴“Tsia obir're hakari welitookho lia Yerusalemu, ma ore esimanyilo khubweni bwabandu bosi abelil'langa nibabinda khulwe ebisinyo ebikholekhanga mwitookho.”

⁵Ne ndahul'la Nyasaye nabool'langa abandi yabo mbu, “Mubir're mwitookho nimumulondanga inyuma ma mubere. Muralekhelakhwo omundu wosi nohomba okhumubeelel'la tsimbabasi tawe.

⁶Mwire bwira abasakhulu, abasiani nabakhaana, abaana abatitiiti nende abakhasi. Nebutswa mureerakhwo omundu wosi oli nesimanyilo khubwenibwe tawe: ne mulachiachila mu Hekalu muno.” Ma nibachaachila khubasakhulu abali nibali imbeli we Hekalu.

⁷Nyasaye yababool'la mbu, “Mwonoonie Ehekalu ma mwitsusie emikitsi chiayo chiosi nende emilambo. Rule mutsie okhuchiaka okhwira!” Kho barula nibachaaka okhwira abandu mwitookho.

⁸Olwa bali nibatsilil'langa nobwiri, nase ndali nisikaye sienyene. Ndamala ngwe hasi mafung'ama nikhupa etsikhwisi nimboola, “E OMWAMI Nyasaye, ibe oli noburima obukali khu Yerusalemu mbu wenyanga okhwira abandu bosi abasikalamwo noho?”

⁹Naye niyambool'la mbu mbu, “Obubi bwabandu ba Isiraeli nende Yuda nobwinji okhusila. Abandu bakhola obwiri obwinji musibala siosi khandi bayitsusia Yerusalemu nobubi. Baboolanga mbu, ‘OMWAMI wakhupa lihanga liefwe omukongo; OMWAMI siakhulolanga tawe.’

¹⁰Nebutswa ise sinambalekhelekhwo tawe; ne nambakhol'le aka nabo bakhol'langa abandu bandi.”

¹¹Ne lola omundu owali niyebikhile tsingubo tsiekatani, owali nakingile ebindu biokhuhandichila khukhukunyu, yakalukha ma nakalusisia OMWAMI ling'ana mbu, “Khol'le akaundachile.”