Read lunyore DANIELI 10 Bible Online

DANIELI 10 - lunyore bible

DANIELI 10

¹Mumuhika kwakhataru Kirushi nali omuruchi wa Perisia, Danieli owakulikhwa eliira mbu Beliteshasa yali okhubisul'lwa ling'ana. Ling'ana tsana liali eliatooto nebutswa liali eliobusoolo obukhongo. Okhumanyilisia khweling'ana tsana khwetsa khuye mwibisulo.

²Olwene yilwo, Ise Danieli ndali nindekhuulanga khulwa amahonga kataru.

³Sindaliakhwo ebiokhulia biosi ebilahi kata inyama tawe. Sindanywakhwo ewaini yosi nohomba kata okhwebakhakwo amafura khulwa amahonga kataru yako tawe.

⁴Omwesi nikuli amakhumi kabili nende khane, khumwesi kwokhuranga khumuhika, ndali nisinjiiye khuluchinga lwomuchela omukhongo okwa Tigurisi.

⁵Ndahenga nindola omundu niyebikhile tsingubo etsieikatani, niyebohele olukhoba lwetsahabu isiyikhu m'musienjesie.

⁶Omubilikwe kwang'inang'ina singa inyuma. M'monimwe mwakha singa oluheni, netsimonitsie nitsifwana singa ebichienga ebiatukhanga omul'lo. Ebilenjebie namakhonoke nibifwana singa omukasa okuruut'twe. Omwoyokwe kwahul'likha singa okhuhukuma khwomukanda omukali.

⁷Ise Danieli sienyene nise owalola libisulo yilio. Abandu aba ndali n'nabo sibalilola tawe, nebutswa batechela okhusila ma nibelukha nibebisa.

⁸Kho nisikala sienyene, nimenganga libisulo liokhuchenya yilio. Sindalikhwo ne tsingufu tsiosi tawe. Likondo lianje nilikalukhana okhusila mbu kata omundu wosi siyakhamanyile tawe.

⁹Ndahul'la omwoyokwe nikul'lomanga, ne olwa ndali nimuhuyianga, ndakwa hasi mafung'ama, tsindoolo tsinyinji nitsimbila.

¹⁰Ma omukhono nikundiilakhwo, nisinjil'la khumakhono nokhumasikamo, ne ndali nisirenganga.

¹¹Om'malaika niyambool'la mbu, “Ibe Danieli, Nyasaye wakhuyanza okhusila. Sinjila silunji ohul'le amang'ana akanzitsanga okhukhubool'la. Rumilwe khuibe.” Olwa yaboola amang'ana yako, ndasinjila nindechelanga.

¹²Ma om'malaika tsana niyambool'la mbu, “Danieli oraria tawe. Nyasaye uhuliye amasaayoko okhurula litukhu eliokhuranga elia wahuchil'la okhwetutuuyia khulwokhunyoola obumanyilisi. Kho nase nzitsile khulwa amang'anako.

¹³Om'malaika omukhongo woburuchi bwa Perisia yanzikal'la khulwamatukhu amakhumi kabili nende elala. Ma Mikaeli, mulala khubamalaika abakhongo niyetsa okhukhonyel'la sichila ndali nindakhelwe Perisia sienyene.

¹⁴Nzitsile okhukhwinoosia akakhekholekhe khubandubo m'matukhu aketsanga. Yaka namabisulo akamatukhu aketsanga.”

¹⁵Olwa yambool'la amang'ana yako, ndahenga hasi singa omusilu oranyala okhul'loma.

¹⁶Ma om'malaika owafwana singa omundu niyandiila khumunwa ma ninjaaka okhul'loma. Nimubool'la mbu, “Omwami wanje, libisulo lino limal'le tsingufu ma sindi onyala okhulekha khutechela tawe.

¹⁷Ndi butswa singa omusumba osinjiye imbeli wo Mwamiwe. Ndakhanyala mbwena okhul'loma n'nawe? Tsingufu tsianje tsihweye kata sindi onyala okhuhelana tawe.”

¹⁸Niyandiilakhwo khandi ma ninyoola tsingufu.

¹⁹Yaboola mbu, “Nyasaye wakhuyanza, kho oralekha esindu sikhutechesie kata okhukhuhendia omwoyo tawe. Obe nomulembe, woome ikholo.” Olwa yal'loma n'nase, ndali okhumeetekha tsingufu nimboola mbu, “Omwami wanje, khambool'le, akooli n'nako. Ibe umbelesisie tsingufu.”

²⁰Naye niyareeba mbu, “Umanyile esichil'le ninzitsa khu ibe? Nebutswa luno ngalukhanga okhutsia okhulwana nom'malaika omukhongo olindanga Perisia. Ne olwa nambe nimulekele, Om'malaika omukhongo olindanga Yunani aleetsa.

²¹Nebutswa nisili okhutsia nzia okhukhubool'la akahandikwa musitapu esiobwatooto. Abulaho onyala okhuukhonya okhubaleka narali Mikaeli Om'malaika olindanga Isiraeli.