Read lunyore DANIELI 12 Bible Online

DANIELI 12 - lunyore bible

DANIELI 12

¹Om'malaika owebiikhile tsingubo tsiekatani naboola mbu, “Olwene yilwo, om'malaika omukhongo Mikaeli oulindanga abandubo yakhetse. Ma khwakhabeho neinyinga yomunyakhano okusili okhubakhwoho okhurula olwa mahanga kachiaka okhubaho tawe. Ne kaliba olwa inyinga yene iyio yakhabe niyol'le, abandu bomwihangalio aba amera kabwe kahandiikwa musitapu sia Nyasaye bakhahonibwe.

²Ne abenji khubene yabo abali okhufwa bakhasimukusibwe abalala bakhatsie mubulamu obweinziayo ne abandi bakhanyoole es'simba murwe sieinziayo.

³Abemeli abachesi bakhaakhe singa obulafu bwo mwikulu. Ne yabo abebaal'la abandu abenji okhukhola akali amalunji bakhaakhe singa tsinyininyini khulwe inziayo.”

⁴Om'malaika tsana yambool'la mbu, “Nebutswa luno ibe Danieli, fuunikha esitapu ma orekhwo omuhuri okhwola khunyinga yesihesi siesibala. Abenji balamala tsingufu tsiabwe nibateemanga okhumanyilisia akekholekhanga.”

⁵Olunyuma, ise Danieli ndahenga nindola abandu babili nibasinjiiye hamuchela, mulala nali khuluchelekha l'lala ne owundi naali khuluchelekha lundi.

⁶Mulala khubo nareeba Om'malaika owali niyebikhile tsingubo etsiekatani nasinjiye elubeka lwemukulu womuchela mbu, “Nalube oluhono sina amang'ana akokhuchenya kano nikasili okhwola khusihesi?”

⁷Om'malaika nachinga amakhonoke kosi ikulu niyeetsuba muliira lia Nyasaye obeetsangaho mwoyo inziayo. Ma nimbul'la naboola mbu, “Kalabaho khulwemihika chitaru nenusu. Yako kosi kakhabe nikekholekhele olwokhusandibwa okhwabandu ba Nyasaye khwakhabe nikhuhweye.”

⁸Ndahul'la akayaboola, nebutswa sindakamanyilisia tawe. Ma nimureeba mbu, “E, Omwami wanje, esihesi siamang'ana yaka siakhabe mbwena?”

⁹Naye nakalusia mbu, “Okhwola orule otsie luno, Danieli, sichila amang'ana kano okhwola kabikhwe mumambiswi ma kabiswe okhwola lwesiesihesi siliba nisiol'le.

¹⁰Abandu abenji bakhasiiywe, nibaba sila esipala siosi. Ne ababi bakhatsilil'le okhuba ababii sichila sibakhamanyilisie tawe. Abali abachesi nibo abakhamanyilisie.

¹¹“Okhurula khunyinga eyemisango chiabulitukhu chiakhabe nichikaliiywe, okhurula khunyinga ye Esiniini sie Es'sinyo amatukhu ehelefu ndala, etsimia tsibili namakhumi karano nakane kakhabire.

¹²Nabeikhabi abatsilil'la okhuba abasubilwa okhwola olwa amatukhu ehelefu ndala etsimia tsitaru namakhumi kataru na karano kaba nikahweye.

¹³“Ne nawe, Danieli tsilil'la okhuba omusubilwa okhwola olwe esihesi siliola. Olunyuma wakhafwe nebutswa wakhasimukukhe okhunyoola omukabwakwo khunyinga yesihesi.”