Read lunyore DANIELI 4 Bible Online

DANIELI 4 - lunyore bible

DANIELI 4

¹Omuruchi Nebukadinesa yaruma amang'ana kano khubandu bosi, abamahanga, abetsinzibulo tsiosi, abetsinonomo tsiosi abamenyanga musibala siosi: “Nyoole amasiesi kanje!

²Nobulahi ise okhumubool'la khukokhuchenya nende akamangalimwa aka Nyasaye Oweikulu Okhusila yabeye okhuumanyia.

³“Mako obwa akokhuchenya, aka Nyasaye akhumanyianga kali amakali! Mako obwa akamangalimwa aka akholanga kali akobunyali! Nyasaye nomuruchi weinziayo, alamiha amatukhu kosi.

⁴“Ise, Nebukadinesa ndali nindi hango munyumba yanje yoburuchi ninditsanga obwale.

⁵Ndaloora lilooro liokhuriisia, khandi nindola libisulo liokhutechesia olwa ndali ningon'ne khusitanda nindi mundoolo.

⁶Kho ndalaka mbu abachetsiyi bomuruchi bosi abali mu Babulonia baleerwe imbeli wanje bambool'le esifune esielilooro tsana.

⁷Ne olwa abafumu, abalakuli, abebitsohela, nende abaroobi beetsa imbeli wanje, ndababool'la akelilooro tsana, ne sibamala nibambool'la esifune sialio tawe.

⁸Ma Danieli niyetsa imbeli wanje olunyuma. (Owakulikhwa eliira lindi mbu Beliteshasa eliali eliira elianyasaye wanje.) Omwoyo kwabanyasaye abatsienukhu[2] kwali muye, kho ndamubool'la akandali nindoor're.

⁹Nimboola mbu: Beliteshasa ibe omwemeli wabafumu, manyile mbu omwoyo kwabanyasaye abatsienukhu kuli mwiwe ma khandi omanyilisianga amabiso kosi. Lilooro eliandoor're ndielino, umbool'le esifune sialio.

¹⁰“Lilooro eliandaloor're nindi khusitanda ningonanga ndielino: Ndaluutsi omusaala omukali hakari wesibala.

¹¹Kwakhul'le ma nikuba omukhongo ma nikurambiha okhwola khwikulu ahakunyala okhulolwa nomundu wosi musibala.

¹²Amasaafu kakwo kali akelikondo lilahi ma nikwelelakhwo amatunde amenji akanyala okhuliibwa nabandu bosi musibala. Etsisolo tsiahuluukhila musiinikha siakwo, amanyonyi akokhwikulu nikombokha ebitsu biokhumenyamwo mutsisaka tsiako. Buli esilonje esili mwoyo sialikhwo amatunde kakwo.

¹³“Ne olwa ndali nisipaala khukelibisulo tsana, ndalola om'malaika niyekhanga okhurula mwikulu naali meso khandi nahengelesinjia.

¹⁴Yalanjisia nomwoyo omukali naboola mbu, ‘Reme omusaala ma musosole tsisaka tsiakwo. Bungulusie amasaafu kakwo, ne musalaanie amatunde kakwo. Mukhunge etsisolo okhurula hasi wakwo nende amanyonyi okhurula mutsisaka tsiakwo.

¹⁵Nebutswa mulekhe es'sichiri nemisi chiasio m'maloba, nisibohelwe nesibohelo esiesibia nende esiomukasa. Musilekhe mubulimo, m'mukunda. “ ‘Lekha liime liame khumundu uyo ma amenye netsisolo tsiomubulimo nende mubirakwa biomusibala.

¹⁶Khulwemihika chine nachitaru, sinabekhwo nobuchesi singa obwomundu tawe, nebutswa naabe nobuchesi singa obwesolo.

¹⁷Lino nilio elia abamalaika abali meso khandi abahengelesianga bamal'le okhukhalaka. Kho, lekha abandu bosi abali habundu hosi bamanye mbu Nyasaye Owe Ikulu Okhusila ali nobunyali khuburuchi bwabandu khandi anyala okhuhelesia omundu wosi owanyanzile oburuchi kata khu yabo abarali abakhongo.’ ”

¹⁸Ma omuruchi Nebukadinesa naboola mbu, “Lino nilio lilooro eliandaluutsi. Nawe Beliteshasa, luno umbool'le esifune sielilooro tsana. Abachetsiyi bosi abomuburuchi bwanje baramilwe okhumbool'la esifune sialio, nebutswa ibe onyala sichila oli nende omwoyo okwabanyasaye abatsienukhu mwibe.”

¹⁹Danieli owakulikhwa mbu Beliteshasa yabengukha khulwe inyinga nalebe ma nabula eliaboola. Omuruchi namubool'la mbu, “Beliteshasa, lilooro nende esifune sialio birakhubengusia tawe.” Beliteshasa, namukalusia namubool'la mbu, “Omwami, ndakhekombele mbu lilooro lino, nende esifune sialio libe khubasukubo, tawe khuibe.

²⁰Waluutsi omusaala okwakhul'le ma nikuba omukhongo, khandi nikurambiha okhwola khwikulu, aha kunyala okhulolwa nomundu wosi khusibala.

²¹Kwali namasaafu kelikondo lilahi nende amatunde amenji akanyala okhuliibwa nabandu bosi. Etsisolo tsiahuluukhila musiinikha siakwo ne amanyonyi kokhwikulu nikalomba ebitsu biokhumenyamwo mutsisaka tsiakwo.

²²“Omwami, niwe omusaala tsana. Wakhula ma wayola khwikulu. Obwamibwo bwalandaala hosi okhwola khusihesi siesibala.

²³Ne, olwe ibe wabeye nosihenga, om'malaika yayikhile okhurula mwikulu ma naboola mbu, ‘Reme omusaala ma mukwononie, nebutswa mulekhe es'sichiri nemisi chiasio m'maloba. Mubohe es'sichiri nesibohelo esiesibia nende esiomukasa. Ma musilekhe mubulimo m'mukunda. Mulekhe liime liame khumundu uyu, ma mulekhe amenye netsisolo tsiomubulimo khulwemihika chine nachitaru.’

²⁴“Esifune siesino: Omwami wanje, kano niko aka Nyasaye Oweikulu Okhusila amal'le okhulaka mbu kakhekholekhe khu ibe.

²⁵Wakhakhungwe okhurula mubandu ne wakhamenye netsisolo tsiomubulimo. Khulwemihika chine nachitaru, wakhaye obunyasi singa ing'ombe, ne wakhakonenge esioba m'munyiri, ahe liime liakhaame khuibe. Kho nilwo olwa wakhamaye mbu Nyasaye Owe Ikulu niye oli nobunyali muburuchi bwosi obwabandu, khandi anyala okhuheelesia omundu wosi owayanzile oburuchi kata khuyabo abarali abakhongo.

²⁶Esifune siom'malaika okhulaka mbu es'sichiri nemisi chiasio bilekhwe mumaloba sili mbu, nokalukhe okhuba omuruchi khandi olwa nobe nomanyile mbu Nyasaye niye orukanga esibala siosi.

²⁷Khulweyako, Omwami wanje olonde amebaalo kanje. Olekhe okhukhola tsimbi, okhole akali amalunji ma obe owetsimbabasi khubatakha. Yako kalachila omeetekhe okhuba nomulembe muburuchibwo.”

²⁸Kano kosi kekholekha khumuruchi Nebukadinesa.

²⁹Inyuma wemiesi likhumi nachibili olwa yali nachendanga khusilama esienyumbaye eyoburuchi mu Babulonia,

³⁰yaboola mbu, “Lola obwe litookho lia Babulonia lili likhongo okhusila! Ndali okhuliombokha libe litookho likali muburuchi bwanje khulwo khumanyia obunyali bwanje nende tsingufu tsianje; khandi okhumanyia oluyali lwanje nende obukhongo bwanje.”

³¹Olwa omuruchi yali nasiboola, omwoyo kwarula mwikulu nikuboola, “Omuruchi Nebukadinesa, hulila akamboolanga kano: Obwami bukhurul'lekhwo.

³²Nokhungwe okhurula mubandu, ne nomenya netsisolo tsiomubulimo. Nawayenje obunyasi singa ing'ombe khulwemihika chine nachitaru. Nilwo olwolimanya mbu, Nyasaye Oweikulu Okhusila niye oli nobunyali khuburuchi bwabandu. Khandi anyala okhuhaana oburuchi tsana khumundu wosi owayanzile.”

³³Ne khubwangu bwene yibwo, amang'ana akali nikaboolwa khu Nebukadinesa kekholekha. Nebukadinesa yakhungwa okhurula mubandu ma niyaaya obunyasi singa ing'ombe. Liime liaama khumubilikwe. Liswilie liarambiha singa emiilo tsietsinditsu. Ne amasandake nikarambiha singa amasanda kamanyonyi.

³⁴“Olwemihika yichio chine nachitaru chiali nichihweye, Ise Nebukadinesa ndachinguula tsimoni nimenga khwikulu, nobuchesi bwanje nibukalukha. Ndamwitsoomia. Nyasaye Owe Ikulu Okhusila. Ndamuhelesia oluyali nimufumia uyo oumenyanga inziayo. “Yakharuke khulwe inziayo, ne obwamibwe bulahindila amatukhu kosi.

³⁵Abandu abokhusibala ababalanga singa abarali esindu. Abamalaika abomwikulu nende abandu abokhusibala bali hasi woburuchibwe. Abulaho ofukulanga obulalilobwe nohomba okhumutsekula.

³⁶“Olwo obuchesi bwali nibukalukhile mwise, oluyali, olukoosi, neifuma yoburuchi bwanje bwakalusibwa khu ise. Abemeli banje nende abakhulundu banje banyinjisia ma ningalusibubwa obunyali bwanje bwoburuchi noluyali olukali okhuyomba olwokhuranga.

³⁷“Ne luno ise Nebukadinesa nzitsoomianga omuruchi wo Mwikulu nimuha oluyali nende ifuma. Kosi aka akholanga nakatooto khandi nakahabwene, ne anyala okhututuyia omundu wosi owelolanga.”