Read lunyore DANIELI 5 Bible Online

DANIELI 5 - lunyore bible

DANIELI 5

¹Omuruchi Beleshasa yalomba lisabo khubaamibe, ehelefu ndala, ma nanywa ewaini halala n'nabo.

²Olwa bali nibanywetsanga, Beleshasa yalaka mbu ebikombe bietsahabu nende ebiefetsa halala nende tsindaabo, ebia Nebukadinesa samwanawe yali niyabukula okhurula mu Hekalu Yerusalemu bileerwe. Omuruchi yarumana biitse khulwaye, abaamibe, abakhasibe, nabakhasibe ababiikha okhunywelamwo.

³Kho ebikombe yibio nende tsindaabo yitsio nibileerwa ma bosi nibanyweelamwo ewaini

⁴nibetsoomia abanyasaye abalombwa khutsahabu, khufetsa, khumukasa, khusibia, khumisaala, nokhwichina.

⁵Ne habwene nahabwene, omukhono okwomundu nikulolekha ma nikuchiaka okhuhandika khwisisi elieinyumba yomuruchi, ahobulafu bwetsitaya bwali nibukhosianga nende okhwakha okhukali. Omuruchi yalola omukhono olwa kwali nikuhandikanga.

⁶M'moni mwomuruchi nimukalukhana likondo, nayungubala ma nachaaka okhurenga ebilenje.

⁷Omuruchi nalanjisia nomwoyo omukali mbu abafumu, abalakuli, nende abebitsohela baleerwe. Nolwa beetsa, omuruchi nababool'la mbu, “Omundu wosi onyala okhusoma lihandiko lino niyambuul'la esifune sialio, alabiikhwa tsingubo tsisembe etsiobwami. Khandi alabiikhwa omunyol'lo kwetsahabu mwikosi ma abe owakhataru mubunyali bwoburuchi bwesibala.”

⁸Kho abachetsiyi bomuruchi bosi beetsa nebutswa abulaho khubo owanyala okhusoma lihandiko tsana nohomba okhubool'la omuruchi esifune sialio.

⁹Kho omuruchi Beleshasa yamala nabengukha okhusila nakalukhana m'moni okhuyombia, ne abaamibe nibakorwa esiokhukhola.

¹⁰Ne omukhaye nyina Omuruchi yahul'la liyoka liomuruchi nende eliabaamibe. Yamala niyetsa niyenjila munyumba yelisabo tsana ma naboola mbu, “Ibe omuruchi ohindile inziayo! Oranyakhana kata okhuyungubala tawe.

¹¹Aliho omundu musibala siorukanga, owomwoyo kwabanyasaye abatsienukhu kuli muye. Olwa papa uwo yali nali omuruchi, omusaatsa uyo, yanyoolekha naali nende amapaalo keikulu nende okhumanyilisia, nobuchesi singa obuchesi bwabanyasaye. Kho omuruchi Nebukadinesa, papa uwo yali okhumukhola omwemeli wabafumu, nabalakuli, nende abebitsohela.

¹²Ali namakani amalahi nende okhumanyilisia nokhubuula esifune esiamalooro, okhwinoosia amabiso, nende okhuribula akatinyile. Kho rumana omusaatsa uyo Danieli, owomuruchi yali okhukulikha mbu Beliteshasa yetse. Yeetsa okhukhubool'la esifune sielihandiko yili.”

¹³Danieli yaleerwa imbeli womuruchi ma omuruchi namureeba mbu, “Niwe Danieli mulala khubasumba Bayahudi abapapa wanje omuruchi Nebukadinesa yali okhwatisia okhurula Yuda?

¹⁴Mbuliiye mbu oli nende omwoyo kwabanyasaye abatsienukhu mwibe khandi mbu oli nobusitsa nende okhumanyilisia ma nende obuchesi.

¹⁵Ne abafumu baleer'rwe mbu basome lihandiko lino, ma bambool'le esifune sialio, nebutswa bamal'le nibaramwa.

¹⁶Ne mbuliiye mbu ibe onyala okhunyoola ebifune biamang'ana akebisa nende okhwinoosia amabiso amatinyu. Kho noba nonyala okhusoma lihandiko lino nende okhumbool'la esifune sialio, olabiikhwa tsingubo tsisembe etsiobwami nende omunyol'lo kwetsahabu mwikosi, ma obe owakhataru mubunyali bwoburuchi bwesibala.”

¹⁷Danieli nakalusia omuruchi naboola mbu, “Biikha ebihanwabio ehale nohomba obiheelesie omundu undi. Kata mbwo nzia okhukhusomela lihandiko ma khubool'le esifune sialio.

¹⁸“Omwami, Nyasaye Oweikulu Okhusila yali okhuheelesia Nebukadinesa papa uwo oburuchi, neifuma, noluyali nende olukoosi.

¹⁹Yali omukhongo okhusila ma abandu bamahanga kosi, nabetsinzibulo tsiosi, nende abetsinonomo tsiosi nibamuria khandi nibatechela khulwaye. Owayenyanga okhwira yerwanga; ne owayenyanga okhulekha yamenya, abayenyanga okhuheelesia oluyali, yabahelesianga ne abayenyanga okhusimbia omurwe yabasimbianga.

²⁰Nebutswa olwa yachaaka okhwelola, naba owesikala marwi, nakhola akeinjinia; yahinibwa khundebeye yoburuchi, ma nakosia oluyalilwe.

²¹“Yakhungwa okhurula mubandu, obuchesibwe nibukholwa singa obwesolo. Yamenya netsipunda etsiom'bulimo niyaaya obunyasi singa ing'ombe nakona m'munyiri ma omubilikwe nikunyira khulwe liime liokhwikulu. Mukhumalila yali okhumanya mbu Nyasaye Oweikulu Okhusila niye orukanga amahanga kabandu. Khandi anyala okhuheelesia oburuchi wosi owayanzile.

²²“Nawe Beleshasa omwanawe, siwetutuyiisie tawe, kata olwa wamanya yako kosi.

²³Waali okhwekaliyia nofukula Omwami owomwikulu nolaka mbu ebikombe netsindaabo bie Hekalu yo Mwami bileerwe khu ibe. Nawe, nabaamibo, nabakhasibo, nende abakhasi ababiikha mwali okhunywelamwo ewaini nimwitsoomia abanyasaye abalombwa khufetsa, khutsahabu, khumukasa, khusibia, okhumusaala nokhwichina, abanyasaye abaranyala okhulola, nohomba okhuhul'la, kata abaramanyile esindu tawe. Nebutswa sioheelesise Nyasaye okhwetsanga obulamu, nakhulinda nakhwemel'la mukosi akokholanga, oluyali tawe.

²⁴Niko akachil'le Nyasaye naruma omukhono okhuhandika amang'ana yaka.

²⁵“Lihandiko eliali okhuhandikwa ndielino: MENE MENE, TEKELI, nende PARESINI.

²⁶Esifune siamang'ana kano siesino mbu MENE: Nyasaye wabasia amatukhu akoburuchibwo, ma ubuleer're khusiakamo.

²⁷TEKELI: Waali okhuchelwa khuratili ma nonyoolekha noli omuleemu.

²⁸PERESINI: Oburuchibwo bukabuuywe nibuhanwa khu Bamede nende Abaperisia.”

²⁹Ma Beleshasa nalaka mbu, Danieli abiikhwe tsingubo tsisembe etsiobwami khandi bamure omunyol'lo okwetsahabu mwikosilie. Ma namwemekha okhuba owakhataru muburuchi bwelihangalie.

³⁰Ne obutukhu bwene yibwo, Beleshasa omuruchi wa Bababulonia niyerwa.

³¹Ma Dario Omumedi, owali nali nemihika amakhumi kasasaba nachibili, nabukula oburuchi.