Read lunyore DANIELI 6 Bible Online

DANIELI 6 - lunyore bible

DANIELI 6

¹Dario yayanzisibwa okhwemekha abakafuna emia ndala namakhumi kabili okhwamiha muburuchibwe bwosi.

²Okhumeetakhwo, yali okhwahula Danieli nende abandu bandi babili khulwokhuhengelesia abakafuna nende okhulola mbu kosi akomuruchi yenyanga kakhol'lwe sila okhukosiakhwo esindu siosi.

³Danieli yamanyikha okhusila okhuyomba abasinjil'li nabaami bandi sichila yali nomwoyo omulahi. Khulwako, omuruchi yamala napaala okhumwemekha okhuba omukali woburuchi bwosi.

⁴Kho abahenji bandi nende abaami bateema okhukhaaba obwa banyala okhuyaala Danieli munjila yakhol'langamwo amang'ana koburuchi, nebutswa sibanyoola injila tawe sichila Danieli yali omusubilwa ma nabula esikha. Libi silianyoolekha muye tawe.

⁵Kho abandu yabo nibaboola mbu, “Sikhwitsa okhunyoola obwakhunyala okhuyaala Danieli tawe, fwana libe ling'ana elilondokhana nelilako lia Nyasayewe.”

⁶Kho bahambana halala ma nibatsia khumuruchi. Nibamubool'la mbu, “Omuruchi Dario, omenye inziayo!

⁷Ifwe abakhongo babasikari, nabakafuna, nende abemeli bandi, khuhuchilisanisie mbu:- Omuruchi akwan'ne okhuraho lilako ma lilindwe obutinyu. Ohaane lilako mbu, khulwamatukhu amakhumi kataru, omundu wosi arahuchil'lwakhwo okhusaba esindu siosi okhurula khunyasaye undi wosi, nohomba okhurula khumundu wosi, ngarali okhurula khuiwe omwami. Omundu wosi owakhafunaka lilako lino, afuubwe mubuko bwetsisimba.

⁸Omwami, kho luno ohaane lilako lino ma orekhwo omuhurikwo kho lilekhe okhukalukhanibwa. Libe singa amalako ka Bamede nende Abaperisia akarakalukhananga tawe.”

⁹Omuruchi Dario nahandika lilako ma narakhwo omuhurikwe.

¹⁰Olwa Danieli yamanya mbu lilako lirebubwekhwo omuhuri, yatsia ingo munyumbaye. Munyumbaye musikoti siomukorofa, amatilisa kalimwo akali mikahenga Yerusalemu. Ne singa obwa yakholanga buli lwosi, yasikama hasi nasaaya Nyasaye hali khataru khwitukhu, amadilisa nikekukhile.

¹¹Ma abasuku ba Danieli yabo batsia halala ma nibanyoola Danieli nasaayanga khandi nareebanga Nyasayewe obukhonyi.

¹²Kho batsia khumuruchi okhuyaala Danieli. Nibaboola mbu, “Omwami, ibe wali okhura omuhuri khwilako mbu khulwamatukhu amakhumi kataru, omundu wosi owakhasabakhwo esindu siosi khunyasaye undi wosi nohomba khumundu wosi, narasaba khuibe Omwami alafuubwe mubuko bwetsisimba.” Omuruchi nakalusia mbu, “Yee, nelilako litinyu, elia Bamede nende Abaperisia eliiranyala okhukalukhanibwa tawe.”

¹³Ma nibabool'la omuruchi mbu, “Danieli mulala khubandu abali okhwatisibwa okhurula Yuda siakhuhelesinjia ibe Omwami oluyali nohomba kata okhulonda lilako elia wahaana tawe. Asaayanga buli lwosi hali khataru khwitukhu.”

¹⁴Olwomuruchi yahul'la amang'ana yaka yabeelela okhusila. Yateema obwanyala okhunyoola injila yokhuhonisiamwo Danieli okhwola olweliuba liayeela.

¹⁵Kho abasuku ba Danieli bakalukha khumuruchi nibamubool'la mbu, “Omwami, ibe umanyile bulahi mbu okhulondokhana namalako ka Bamede nende Abaperisia, lilako liosi eliomuruchi ahaananga silinyala okhukalukhanibwa tawe.”

¹⁶Kho omuruchi yalaka mbu Danieli afumilwe ma afuubwe mubuko obwetsisimba. Omuruchi nabool'la Danieli mbu, “Makano Nyasaye uwo oworumikhilanga buli lwosi, akhuhonie.”

¹⁷Lichina nilileerwa, nilireebwa khubuko ne, omuruchi nara omuhurikwe kwoburuchi nende omuhuri kwabaamibe khwichina tsana kho amang'ana ka Danieli kalekhe okhukalukhanibwa.

¹⁸Ma omuruchi nakalukha munyumbaye yoburuchi nahonga obutukhu bwosi sila okhulia ebiokhulia kata okhunywakhwo esindu tawe. Kata tsindoolo sitsiamuhilakhwo tawe.

¹⁹Omuruchi yabuukha m'mabwebwe ma nahuuna matetekhana okhutsia khubuko bwetsisimba.

²⁰Olwa yoola ahembi khubuko obwa Danieli yalimwo, yalanjisia nomwoyo kwesibeela nabool'la Danieli mbu, “Danieli omurumikhili wa Nyasaye oli mwoyo! Nyasayewo oworumikhilanga buli lwosi yali onyala okhukhuhonia mutsisimba noho?”

²¹Ne Danieli nakalusia mbu, “Ibe Omuruchi ohindile inziayo!

²²Nyasaye wanje arumile om'malaikawe okhwikala eminwa chietsisimba. Sitsiisaalisisiekhwo tawe. Akhol'le yaka sichila ye umanyile mbu ise mbula esikha khandi sichila sili okhukhukhol'lakhwo ibe omuruchi obubi bwosi.”

²³Omuruchi yasangala okhusila ma nalaka mbu Danieli ahinibwe m'mbuko. Kho bamuhinia mubuko, nibanyoola mbu siasalisibwekhwo tawe, sichila yali okhusubila Nyasayewe.

²⁴Ma omuruchi nahaana amalako mbu abandu abayaala Danieli bosi bafumilwe ma bafuubwe mubuko bwetsisimba halala nabakhasi babwe, nabaana babwe. Ne kata olwa bali nibasili okhwola hasi wobuko, etsisimba tsiabatiila nitsibafunaka amakumba kabwe kosi mubitonye.

²⁵Ma omuruchi Dario nahandichila abandu bamahanga kosi, nabetsinzibulo, nende abetsinonomo tsiosi musibala naboola mbu; “Nyoole amasiesi kanje!

²⁶Mbaananga lilako mbu musibala esili hasi woburuchi bwanje siosi, buli mundu aritsenje Nyasaye wa Danieli, namuhelesia oluyali. “Ni Nyasaye oli mwoyo, ne alaruka khulwe inziayo. Oburuchibwe sibulatiba tawe. Obunyalibwe sibwakhahwe tawe.

²⁷Ahoninjia, khandi ahonokosinjia. Akholanga akokhuchenya nende akamangalimwa mwikulu nende khusibala. Yahonisie Danieli okhurula mubunyali bwokhwirwa netsisimba.”

²⁸Kho Danieli yahindila m'matukhu koburuchi bwa Dario nende Kirushi Omuperisia.