Read lunyore DANIELI 7 Bible Online

DANIELI 7 - lunyore bible

DANIELI 7

¹Mumuhika kwokhuranga olwa Beleshasa yali omuruchi wa Babulonia, Danieli yaloora lilooro khandi nalola libisulo olwa yali mundoolo butukhu nakonanga khusitsanda. Yamala nahandika hasi lilooro tsana ma amang'ana tsana akayalola mubutukhu ngakano:

²Danieli yaboola mbu “Ndaali okhulola mukhubisula butukhu, omuyeka nikuhungutsanga okhurula mutsimbeka tsiosi khandi nikutuubulanga inyanza ikhongo.

³Etsisolo tsikhongo tsine tsiarula munyanza buli ndala niyabukhan'ne okhurula khuyindi.

⁴Esolo yokhuranga yafwana singa esimba nebutswa yali netsimbaha singa etsieinditsu. Ne olwa ndali nisikoola, tsimbaha tsiamanyuukha. Nesinjisibwa okhurula hasi ma nesinjila khubilenje b'bili singa omundu. Ma neheebwa obuchesi bwomundu.

⁵“Esolo yakhabili yafwana singa eliaka, nilisinjiiye khubilenje bialio ebieinyuma. Liali nil'li netsimbafu tsitaru tsieinyama m'meeno kalio hakari. Nilibool'lwa mbu, ‘Buukha olie inyama inyinji.’

⁶“Olwa ndali nisihenga ndalola esolo yindi. Nayo yafwana singa ingwe, nebutswa khumukongo kwayo khwalikhwo netsimbaha tsine singa etsielinyonyi, khandi yali nemirwe tsine. Yaheebwa obunyali okhuruka.

⁷“Olunyuma olwe yako, esolo yakhane yalolekha. Yali eyokhuriisia, eyokhutechesia, ma eyetsingufu tsinyinji. Yali nameno kesibia amakhongo aka yarumikhila okhuliila ebiayiir're ma neseena ebisikaaye nebilenje. Yali okhwabukhana nende etsisolo tsindi etsiokhuranga; yali netsinzika likhumi.

⁸Olwa ndali nisisihenga tsinzika yitsio, ndalola olwika olutititi nilurula hakari mutsindi ne nilumekula tsinzika tsitaru tsiokhuranga nemisi chiatsio. Olwika yilwo lwali nende tsimoni singa etsiomundu, khandi nende omunwa okwaboolanga amang'ana amakhongo akokhwekhonya.

⁹“Ne nisihenga, ndalola tsiiruba nitsirenjekhwa mubukono bwatsio. Uyo oweinziayo okhurula khale yekhala khuluruba l'lala khutsio. Tsingubotsie tsiali tsindafu singa etsaluchi, ne liswilie liali singa obwoya obulafu tser're. Olurubalwe, olwali nilierenjekhele khumul'lo lwali nilwatukhanga omul'lo.

¹⁰Omul'lo kwarula khuluruba yilu singa omuchela. Abandu etsielefu netsielefu bamurumikhila ne abandu etsimilioni netsimilioni nibasinjila imbeliwe. Esiina nisichaaka okhuyaala emise, ne ebitapu nibifuunulwa.

¹¹“Ma ninzilil'la okhuhenga sichila olwika lutititi yilwo lwali nilusiboola amang'ana amakhongo akokhwekhonya. Ne nisihenga, esolo eyakhane niyiirwa. Omulambo kwayo nikufuubwa m'mul'lo okwatukhanga ma nikusambwa nikukhakha.

¹²Ne etsisolo tsindi nitsinuulwa obunyali bwatsio nebutswa tsiahuchil'lwa okhumenyakhwo khulwa oluhono lutititi.

¹³“Ne butukhu nisili mwibisulo yilio, ndahenga nindola esindu esifwana omundu. Yali niyeetsanga aha ndali, naali m'malumbesi akokhwikulu, ne yatsia khu uyo owalinjiho okhurula khale ma nahilwa imbeliwe.

¹⁴Omwene uyo yali okhuhebwa obunyali, oluyali, nende oburuchi, kho abandu bamahanga kosi, nabetsinzibulo tsiosi nende abetsinonomo tsiosi bamurumikhile. Obunyalibwe bwakhahindile inziayo khandi oburuchibwe sibwakhoole khusihesi tawe.

¹⁵“Ise Danieli ndanyakhana omwoyo khulwa mabisulo aka ndali okhulola ma nimenda okhusila.

¹⁶Ndatsia khumulala khu yabo abali nibasinjiyeho nimureeba yanyinoosie obwatooto bwamang'ana yako kosi. Ma niyambool'la esifune siamang'ana tsana.

¹⁷Yaboola mbu, ‘Etsisolo tsikhongo tsine tsino, nabaruchi bane abalibuukha okhuruka esibala.

¹⁸Ne abandu ba Nyasaye Oweikulu Okhusila bakhanyoole oburuchi nibabulinda khulwe inziayo.’

¹⁹“Ma ninyenya okhumanya amenji khumang'ana kesolo yakhane eyali okhwabukhana nende etsindi tsiosi, esolo yokhuriisia, eyameno akesibwa, nende amasanda akomukasa. Yarumikhila ameno kayo okhulia ebia yali niyir're, ne neseen'na ebisikaye hasi nebilenje.

²⁰Ninyenya khandi okhumanya aketsinzika likhumi etsiali khumurwe kwayo, nende olwika lundi olwarula olunyuma niluchila tsinzika tsitaru nitsimekukha ma nitsikwa hasi. Olwika olwali netsimoni nende omunwa okwaboolanga amang'ana amakhongo akokhwekhonya lwali olwokhuriisia okhuyomba etsindi tsiosi.

²¹“Ne nisihenga, olwika tsana, nilulwana lihe nende abandu ba Nyasaye ma nilubaleka.

²²Ma oweinziayo okhurula khale niyetsa khuhaana obukhalachi ma obulechi nibuba khubandu ba Nyasaye Owe Ikulu okhusila. Inyinga niyoola eyabandu ba Nyasaye bali okhunyoola obunyali oburuchi.

²³“Esifune esiandenoosibwa siesino: ‘Esolo eyakhane, noburuchi obwakhane obulibaho khusibala, ne bwakhabukhane noburuchi bundi bwosi. Bwakhatubule esibala siosi, nibusiseen'na hasi.

²⁴Tsinzika likhumi, nabaruchi likhumi abaliruka muburuchi yibwo. Nilwo olwomuruchi undi yakheetse. Yakhaabukhane khubandi abokhuranga yabo ne yakhanuule abaruchi bataru obwami.

²⁵Yakhal'lomenje amang'ana kokhufukula Nyasaye Owe Ikulu Okhusila, nasandia abandu ba Nyasaye. Yakhateeme okhukalukhania amalako nende emilukha chiabandu ba Nyasaye ne abandu ba Nyasaye bakhabe hasi wobunyalibwe khulwemihika chitaru nende enusu.

²⁶Ma esiina siomwikulu siakhekhal'le omuse kwobukhalachi nisihiniaho obunyalibwe, nende okhumumuma likali.

²⁷Obunyali nende obukhongo obwoburuchi bwosi khusibala bwakhahaanwe khubandu ba Nyasaye Oweikulu Okhusila. Obunyali obwoburuchi bwabwe sibwakhahweho tawe, khandi abaruchi bosi bakhabarumikhile nibalonda amalako kabwe.’

²⁸“Kho amang'ana nikahwela yaho. Nimenda ma ningalukhana obukondo bwem'moni. Nebutswa ndabiikha amang'ana yako m'mwoyo kwanje.”