Read lunyore DANIELI 8 Bible Online

DANIELI 8 - lunyore bible

DANIELI 8

¹Mumuhika kwakhataru okwa Beleshasa yali nali omuruchi, ndalola libisulo liakhabili.

²Mwibisulo yilwo, ndanyoola nindi mwitookho likhongo elia Susa, elili mulukongo lwa Elamu, ne ndali nisinjiiye hamuchela kwa Ulai.

³Ne olwa ndachinguula tsimoni nimenga, ndalola limiiku nilisinjiiye khumwalo womuchela. Limiiku tsana liali netsinzika tsibili tsirambi. Olwika l'lala lwali olurambi khandi oluyia okhuyomba olundi.

⁴Ndahenga ma nindola limiiku tsana nilituyanga netsinzika tsialio mumbeka tsiemasaba, esinyolu; nende enandete. Esolo yosi siyali enyala okhuliikal'la nohomba okhuhonokokha khulio tawe. Liakhola singa obwa lienyele nende okhwekhulumamia.

⁵Olwa ndali nisipaala khukene yaka, ndalola ekhole nerul'la emasaba niyilukhanga emilibiri ma kata ebilenje biayo sibaseenakhwo hasi tawe. Ekhole iyio yali nolwika l'lala olukali olwalolekhanga hakari wetsimoni tsiayo.

⁶Ekhole iyio niyiitsa khwimiiku eliali netsinzika tsibili, elia ndali ninduutsi khumuchela nilisinjiiye ma ekhole tsana nelondel'la limiiku netsingufu tsiosi.

⁷Nindola netuya limiiku nelul'le okhusila. Nekhupaka limiiku nefunaka tsinzika tsialio tsibili. Limiiku nilibula tsingufu tsiokhulwana. Lialumbwa hasi ma niliseen'nwaho ne siyaliho owakhalihonisie tawe.

⁸Ekhole tsana niyekhulumamia okhusila nebutswa olwa yali nemetekhele mutsingufu, olwika lwayo olukhongo lwafunikha. Musilenje sialwo, tsinzika tsindi tsine nitsimela, ma nitsikhula buli l'lala niluchomele elubeka walwo mumbeka tsine etsiabukhan'ne.

⁹L'lala khutsinzika tsine yitsio lwakhulakhwo olwika lundi olutititi olwali nobunyali khutsimbeka tsie enandete, ebukwe, nende khusiabala esia Nyasaye yasubisia abandube.

¹⁰Lwakhula niluba olukhongo ma nilwoola khumahe kokhwikulu, ma nilufuuba tsinyininyini tsindi hasi ma nilutsisen'naho.

¹¹Kata khandi lwachaaya omukhongo wamahe kokhwikulu nilwikal'la emisango chiabulikhasotso echiahaanwanga khuye nende okhufwabia Ehekalu.

¹²Abandu bakhola tsimbi mu Hekalu musilenje siokhuhaana emisango echiahuchil'lwa echia buli khasotso, ne akatooto nikafuubwa hasi. Olwika lwanyoola obulechi mukosi aka lwakholanga.

¹³Ma nimbul'la om'malaika nareeba om'malaika undi mbu, “Ebindu bilolekhele mwibisulo lino nabitsiliil'le okhwola line? Niluhono sina olwetsimbi tsiesifwabwi natsitsil'le okhukholwa musilenje siemisango tsia buli khasotso? Amahe kokhwikulu nende Ehekalu nabitsilil'le okhusen'nwa hasi okhwola lina?”

¹⁴Ndahul'la om'malaika undi nakalusia mbu, “Kalatsilil'la khulwa amatukhu ehelefu ndala nemia ndala namakhumi karano. Ne kalatsilil'la buli mukolooba namukamba olwemisango yichio nachibule okhuhanwa. Ma nilwo olwe Hekalu nekalusibwe mung'ono mwayo.”

¹⁵Olwe Ise Danieli ndali ninduutsi libisulo yilio, ndenya okhumanyilisia esifune sialio ne nonoho nindola omundu nasinjiiye imbeli wanje.

¹⁶Nimbul'la omwoyo okwomundu nikulanjisia khumuchela kwa Ulai nikuboola mbu, “Gaburieli, yinoosia omundu uyo esifune sielibisulo obwa yaali okhulola.”

¹⁷Kho Gaburieli niyetsa ahembi ahandali nisinjiiye. Ma ningwa hasi mafung'ama khulwoburi. Nebutswa niyambool'la mbu, “Omwana womundu, hul'la esifune. Libisulo yili lil'lomanga khukesihesi siesibala.”

¹⁸Ne olwa yali nal'lomanga, ndali ningwiiye hasi ning'ang'al'le. Nebutswa yandiila ma niyasinjisia.

¹⁹Niyambool'la mbu, “Khumanyianga akalibaho inyuma welirima lia Nyasaye. Libisulo yilio lil'lomanga khukeinyinga yesihesi.

²⁰“Limiiku elia waluutsi nil'li nende tsinzika tsibili nesifwanani sioburuchi bwa Bamede nende Abaperisia.

²¹Imbusi ekhole, nesifwanani bwoburuchi bwa Bayunani. Olwika luli hakari owetsimoni tsiayo, nesifwanani siomuruchi owokhuranga.

²²Tsinzika tsine etsiamela aholwika l'lala olwokhuranga lwamekukhila nesifwanani siamahanga kane obwakakhekabule okhurula mwihanga liokhuranga khandi sikakhabe netsingufu okhuyomba lihanga liokhuranga tawe.

²³“Olwoburuchi bwamahanga yako buliba nibuli ahembi okhuhwaho khandi olwa kakhabe amabi okhusila mbu okhwola kahebwe esinyasio, omuruchi undi yakhanyoolekhe owesikala marwi, omubi khandi omukaati.

²⁴Yakhabe owetsingufu ne tawe khulwa obunyalibwe omwene. Yakhakhole amabi okhusila ne yakhanyoole obulechi mukosi. Yakhamulule abandu betsingufu nende abandu ba Nyasaye.

²⁵Sichila mbu yakhabe omubatsa, yakhanyoole ebindu ebinji khulwokhukaata. Yakhabe owokhwelola omwene khandi yakheere abandu abenji sila esifune. Yakhachaaye omuruchi omukhongo mubosi nebutswa yakheerwe nobunyali oburali bwomundu.

²⁶Amang'ana kawalol'la mwibisulo yaka akemisango echiokhumukamba nende echiokhumukolooba akomal'le okhwinoosibwa nakekholekhe. Nebutswa okabiikhe butinyu masilisi luno sichila nakabukule oluhono nikasili okhwekholekha.”

²⁷Ma ise Danieli, nindesikoka khandi nindwala amatukhukhwo amenji. Kho ndamala nisinjila ningalukha okhukhola emilimo chiomuruchi yali niyambelesia. Nebutswa amang'ana kelibisulo yako kanjenyia ma sindaali onyala okhukamanyilisia tawe.