Read lunyore DANIELI 9 Bible Online

DANIELI 9 - lunyore bible

DANIELI 9

¹Dario Omumedi omusiani wa Ahaswero yeemekhwa okhuba omuruchi wa Babulonia.

²Mumuhika okwokhuranga kwoburuchibwe, ise Danieli ndali nisomanga ebitapu ebitsienukhu khandi ndali nimpaalanga khukemihika amakhumi kane nakataru echia Yerusalemu liali niliamululwa singa obwo MWAMI yali niyabool'la omuroobi Yeremia.

³Nisaaya OMWAMI Nyasaye nomwoyo kwosi, nokhuhonga okhulia nindebiikhile tsingubo tsiamatasi, nende okhwikhala mwikokhe okhumanyia esibeela sianje.

⁴Nisaaya khu Mwami Nyasaye wanje, nindeyama tsimbi tsiabandu banje. Ndaboola mbu, “Omwami Nyasaye, ibe oli omukhongo khandi khukhuheelesinjia oluyali. Oli omusubilwa khu indakanoyo khandi omanyianga obuyanzi oburalilu khuyabo abakhuyanzanga nibalonda amalako kaako.

⁵“Khwakhola tsimbi, nikhukhola ob'bi ma nikhukhola amasiamu nende induli. Khwasuula okhukhola aka wakhulaka ma khwasiama khumalako kaako nende okhurula khu akawakhumanyia okhuba amalunji.

⁶Sikhwahul'la abarumikhili baabo abaroobi tawe. Ababool'langa abaruchi befwe, nabaami, nabakuka, nabandu bosi abesibala amang'ana muliiralio.

⁷Ibe, Omwami, obetsanga omulunji khasotso nebutswa ifwe abandu ba Yuda nende abamenyanga Yerusalemu ma nende Abaisiraeli bosi aba wali okhusalaania mumbibala, ahembi nehale, olwaleelo khuli nes'simba murwe khulwa okhubula khuba nobusubilwa khuyibe.

⁸Omwami, ifwe, nabaruchi befwe, nabaami, nabakuka khuli nes'simba murwe khulwa okhukhwonoon'na.

⁹Omwami Nyasaye wefwe, oli owetsimbabasi khandi owokhukhubeela kata olwa khuba nikhukhol'le induli khuyibe.

¹⁰Sikhwakhuhul'la ibe OMWAMI Nyasaye wefwe nikhulinda amalako kaako aka wali okhukhuhelesia okhubir'ra mubarumikhili baabo abaroobi tawe.

¹¹Abaisiraeli bosi bafunaka amalako kaako nibasuula okhuhul'la akawaboola. Khwakhukhol'la tsimbi ma nikachila nokhuleer'ra amang'ana kebilaamo akahandikwa m'malako ka Musa omurumikhili uwo.

¹²Wahesiisie amang'ana aka waboola wakhakhole khu ifwe halala nabaruchi befwe. Wahelesisie Yerusalemu esinyasio esikali esisili okhuheebwakhwo litookho lindi liosi khusibala.

¹³Wakhuhelesia esinyasio singa obwa kahandiikwa m'malako ka Musa. Ne kata mbwo sikhuteemele okhukhuyanzisia ibe Omwami Nyasaye wefwe nikhulekha okhukhola tsimbi ne nikhulonda obwatootobwo tawe.

¹⁴Ibe Omwami Nyasaye wefwe, siwasisil'la okhukhuhelesia esinyasio tawe sichila kosi akokholanga nakahabwene, nefwe sikhwahuyia khukaako tawe.

¹⁵“Omwami Nyasaye wefwe, ibe wamanyia obunyalibwo olwa wahiinia abandubo okhurula musibala sie Misiri ma obunyalibwo tsana busiitsul'lwanga okhwola leelo. Ifwe khwakhola tsimbi nende amabi.

¹⁶E Omwami, ibe wakhusoola mumatukhu akabira, kho orasinyikhila Yerusalemu khandi tawe sichila nilio litookholio khandi esikulusio esitsienukhu. Abandu bosi abali mumahanga akali ahembi na Yerusalemu bachaayanga Yerusalemu nende abandubo bakwiye khulwe tsimbi tsiefwe nende amabi akabakuka befwe bakhola.

¹⁷Luno niko akachila Nyasaye wefwe, ohul'le amasaayo kanje nende obuhombi bwanje. Kalusia Ehekalu yiyo eyamala okhwononibwa mung'ono mwayo; tsikalusie mung'ono kho abandu bamanye mbu niwe Nyasaye.

¹⁸E Nyasaye wanje, reka amarwi ohul'le. Henga olole omunyakhano okwa khuli n'nakwo nende okwelitookho linyoolanga khulweliira lilio. Sikhukhusaayanga sichila ifwe khuli abalunji tawe, nebutswa khukhusaayanga khulwe tsimbabasitsio tsinyinji.

¹⁹E Omwami okhuhul'le. E, Omwami okhubeele tsimbabasi. Omwami okhuhulile ma okhukhonye. Orasisil'la tawe kho abandu bamanye mbu niwe Nyasaye. Litookho yili nelilio khandi abandu yaba nabaabo.”

²⁰Ndatsilil'la okhusaaya, nindeyamanga tsimbi tsianje nende tsimbi tsiabandu banje ba Isiraeli, nimuhomba Omwami Nyasaye wanje okhukalusia Ehekalu yiye inzienukhu.

²¹Olwa ndali nisisaayanga, Gaburieli owa ndali nindutsi mwibisulo liokhuranga yapulukha niyetsa hasi ahandali nindi. Yali inyinga yokhuhaana omusango kwamukolooba.

²²Yambool'la mbu, “Danieli, nzitsile hano okhukhukhonya okhumanyilisia akoburoobi.

²³Olwo ochachile okhusaaya, Nyasaye yali okhukhukalusia. Nyasaye wakhuyanza kho nzitsile okhukhubool'la likalusio. Kho reka amarwi olwamba ninjinoosinjia libisulo yili.

²⁴“Emihika amakhumi kane nakataru hali khane nakhataru nichio emihika echia Nyasaye yakhalaka khulwokhubeela abandubo nende litookholio litsienukhu okhurula mutsimbi, nende mubwonekhu. Tsimbi tsiakhalekhelwe ne obukhalachi bwahabwene bwakhabeho inziayo. Kho oburoobi nende libisulo biakhabe ebiatooto ne Ehekalu inzienukhu yakhatsienulwe khandi.

²⁵Kho omanye yaka nende esifune siako: Okhurula khunyinga olwe lilako lihanwa okhwombokha Yerusalemu obuhia okhwola olwo omwemeli owelwa na Nyasaye aliitsa nalube oluhono lwemihika chine nachitaru hali khane nakhataru. Yerusalemu liakhombokhwe obuhia nilirebwamwo tsinjila nende amasisi akasirwa butinyu ne liakhamenye emihika amakhumi kasasaba nachibili hali khane nakhataru. Nebutswa kakhabe amatukhu kom'boko.

²⁶Amatukhu yako nikahweye, omwemeli owelwa na Nyasaye yakherwe sila esikha. Litookho nende Ehekalu biakhamululwe nabasikari bomuruchi wetsingufu. Esihesi siakhetse singa omukhulula kwamaatsi nikuleeranga lihe nende okhumumwa okhwa Nyasaye yarechekha.

²⁷Omwemeli tsana owelwa na Nyasaye yakhalombe indakano iralilu nabandu abenji khulwemihika chine nachitaru. Ne olwenusu yemihika yichio yakhabe nehweye, yakhekal'le emisango nebihanwa. Esiinini sies'sinyo siakhareebwe khus'suli sie Hekalu ma silabeho okhwola olwe uyo owasiraho yakhoole khusihesi esia Nyasaye yamurechekhela.”