Read lunyore HOSEA 10 Bible Online

HOSEA 10 - lunyore bible

HOSEA 10

¹Abaisiraeli bali singa Omusabibu okwamanga ebiamo ebinji. Olwa obuhinda bwabwe bwameetekha, nilwo olwa bombokha tsisambwa tsinyinji. Olwesibala sianyoola ebiamo ebinji nilwo olwa bang'onia etsisiilo tsiabekayakayanga.

²Emioyo chiabwe chilimwo obukaati, ne luno okhwola basaal'le khulwe tsimbi tsiabwe. OMWAMI alafunaka tsisambwa tsiabwe ma yononie etsisiilo tsiabwe.

³Abandu bano balachiaka okhuboola mbu: “Khubula omuruchi sichila sikhwahelesia Nyasaye oluyali tawe. Ne omuruchi tsana yakhakhukholeeye sina kata mbwo?”

⁴Baribula amang'ana amakhaya, nibasubisia amang'ana karali akatooto nibalomba tsindakano tsiabutswa. Obukhalachi bwahabwene bukwiye obukhalachi oburali obwahabwene, ne bukhulanga singa eyongo musihindiri.

⁵Abandu abamenyanga mwitookho lia Samaria bakharie khandi bakhekhuule khulwokhufwa khwechulukhi yetsahabu eli Betsaweni[1]. Bo nende abesaalisi abetsimbia balekhuula khulwayo. Balalakaya olwa obukhongo bwetsahabu yayo bulahinibwa khuyo.

⁶Yee, esiniini tsana silahilwa Asiria singa obusuru bwokhurungwa khumuruchi wabwe omukhongo. Abandu ba Isiraeli balasimba emirwe, khandi tsisoni tsilabahamba khulwokhulonda obwibaali bwesiniini.

⁷Omuruchi wa Samaria alahilwa butswa singa oluswasi lwolukhwi oluli khumaatsi.

⁸Tsisambwa etsili khubutenje bwebikulu bia Betsaweni, okhwabandu ba Isiraeli bekayakayilanga ebiniini tsilamululwa. Ebisisia namarakaru kalamela khutsisambwa tsiabwe. Nabo balabool'la ebikulu ebirambi, “Khubise” ne khubikulu bindi “Khufuunikhe!”

⁹OMWAMI aboolanga mbu, “Abandu ba Isiraeli basili okhulekhakhwo okhukhola tsimbi imbeli wanje okhurula mumatukhu kabali okhukhola tsimbi nibali Gibea. Kho obulwani bulabamal'la Gibea.

¹⁰Ndakheetse okhuseera abandu abooni nokhubaha esinyasio. Abetsimbia tsindi bakhebunjelesia halala okhubaseera ne balahebwa esinyasio khulwe tsimbi tsiabwe tsinyinji.

¹¹“Isiraeli yali singa emooli eyechibwa okhuhuula obuswache. Nebutswa ndamurela likokolo khumabeka kaake amalahi, khulwo okhumunasia emilimo emitinyu. Ndakhola Yuda okhukhwesa likokolo ne Isiraeli naye okhusukuma lichooki.

¹²Ndaboola mbu, ‘Mwelimile abene omukunda omuyia. Muraake obwatooto, ma muchese ebiamo biobuyanzi obweinikhu khu ise. Neinyinga yenywe eyokhungalukhila ise, OMWAMI wenywe, nase nanzitse okhumutsukhil'la tsikhabi tsianje.’

¹³Nebutswa musilenje yisio mwaraaka obubi ma nimuchesa omunyakhano. Mwaliye ebiamo biobukaati bwenywe. “Sichila mwali okhusubila m'makari kenywe kobulwani nende mubwinji bwabasikari benywe,

¹⁴lihe liakhetse khubandu benywe, ne tsiminga tsienywe tsiakhalikul'lwe. Kakhabe singa khwitukhu elia omuruchi Shalimani yalikul'la litookho lia Betsabeli mwihe, ma abanyina nende abaana babwe nibatubulwa ma nibafwa.

¹⁵Nimbwo kakhekhole khwinywe abandu ba Isiraeli, sichila obubi bwenywe nobukhongo. Musitumukho esiobulwani, omuruchi wa Isiraeli yakhafwilemwo.”