Read lunyore HOSEA 11 Bible Online

HOSEA 11 - lunyore bible

HOSEA 11

¹OMWAMI aboolanga mbu, “Olwa Isiraeli yali omwana, ndamuyanza, ma nimuhinia Emisiri nimulanga omwana wanje.

²Oluhono lwa ndatsilil'la okhumulanga omwana wanje, nilwo olwa naye yatsilil'la okhwesunda ehale okhurula khu ise. Abandu banje batsilil'la okhuhaana emisango khubanyasaye ba Baali, nokhusamba obwali khubiniini.

³Nebutswa nise owekesia Isiraeli okhuchenda. Ndatiila abandu banje mumabaha kanje, nebutswa sibaamanya mbu nise owabahendela tawe.

⁴Ndabakhwesa betse khu ise khulwamahofu kobuyanzi. Ndabakinga ikulu nimbaletelesia khusilifu sianje, ma ninzinama khubo nimbalisia.

⁵“Bakhakalukhe musibala sie Misiri ne Asiria elabaamiha, sichila basuuye okhungalukhila.

⁶Lihe liakhabir're mumatookho kabwe ne ebilibwa biamatookho nibifunakwa. Liakhamume abandu banje sichila bakholanga aka amakani kabwe kalolanga okhuba amalahi.

⁷Abandu banje baakhalaka okhuukhupa omukongo. Bakhalakaye khulwe likokolo elili khubo ne abulaho owakhabahiniekhwo tawe.

⁸“Ndakhakhulekha mbwena ibe Isiraeli? Ndakhakhwebala siahene noho? Ndakhakhumulula tooto singa ndamulula Adama, nohomba singa ndakhol'la abandu ba Seboimu? Tawe! Omwoyo kwanje sikwakhahuchil'la khole mbwo tawe. Tsimbabasi tsianje khuibe netsingali.

⁹Sindakhakhuha esinyasio olwandi noburima tawe, khandi sindakhamulule Isiraeli tawe; okhuba ise ni Nyasaye, sindi omundu tawe. Ise, ouli omutsienukhu ndi n'nenywe, sinanzitse khu inywe nindi nelirima tawe.

¹⁰“Abandu banje bakhanonde olwa ndakhahukumile abasuku babwe singa esimba. Balayuchila okhwitsa khu ise okhurula emasaba.

¹¹Balarula Emisiri bwangu singa amanyonyi, khandi okhurula Asiria singa amakhulwi. Nambakalusie mutsingo tsiabwe khandi. Ise, OMWAMI mal'le khuboola.”

¹²OMWAMI aboolanga mbu, “Abandu ba Isiraeli bafumbiye nende obubeyi nobukaati ne abandu ba Yuda basikhol'langa induli, Ise Nyasaye omusubilwa khandi omutsienukhu.