Read lunyore HOSEA 12 Bible Online

HOSEA 12 - lunyore bible

HOSEA 12

¹“Kosi akabandu ba Isiraeli bakholanga okhurula mukamba tsuli okhwola butukhu kabula esifune khandi nakokhusambula. Obusiemani nende obunuuli bumeetekhanga mubo. Batemanga okhulomba obuhambani nende Asiria nibakhola obukhala nende Emisiri.”

²OMWAMI ali nelireebo khubandu ba Yuda, khandi alaha Isiraeli esinyasio khulwebikhole biabandu balio bakholanga. Alabarunjia ma khulwebikhole biabwe.

³Kuka wabwe Yakobo yalwana nende omusiani wabwe Esau olwa bali nibasili munda mwa mama wabwe. Ne olwa yali omundu omukhongo yalwana nende Nyasaye;

⁴Yee, yalwana nom'malaika ma namuleka. Yalakaya ma namureeba mbu amulaamile ikhabi. Yabukana nende Nyasaye nali Betseli, ne habwene yaho Nyasaye yal'loma n'naye.

⁵OMWAMI Nyasaye Wokhunyala Biosi OMWAMI nilio eliiralie eliabandu bekayakayanga.

⁶Kho luno inywe abolwibulo lwa Yakobo, musubile mu Nyasaye wenywe ma mumukalukhile. Mube abasubilwa khuye khandi abatooto ma mulindil'le Nyasaye wenywe khasotso.

⁷OMWAMI aboolanga mbu, “Abandu ba Isiraeli nabakhala abarali abasubilwa; ebichelo biobukaati bili m'makhono kabwe, bayanzanga okhukaata abakulani babwe.

⁸Baboolanga mbu, ‘Ifwe khuli abahinda. Khwanyoola emiandu khubukhala bwefwe.’ Nebutswa obuhinda bwabwe sibunyala okhusilisia tsimbi tsiabakhoola tawe.

⁹Nebutswa Ise OMWAMI Nyasaye wenywe owamuhinia musibala sie Misiri nandekhe namumenye mumaheema khandi singa obwa mwamenyanga musilangalangwe.

¹⁰“Ndali okhul'loma nabaroobi yabo nimbaha amabisulo mubwinji, khandi okhubir'ra mubaroobi ndahelesia abandu banje amachetsiyio.

¹¹Nikakhaba obubi bwosi buli Gileadi, bulakholwa okhuba obwa butswa. Kata nikakhaba emisango tsietsichulukhi chiakhahanwa mu Gileadi, tsisambwa tsiabwe tsilaba singa ebituma biamachina mubihindiri.”

¹²Kuka wefwe Yakobo yeelukha natsia Padani Aramu aha yakhola emilimo chiokhwaya amakondi kho anyoole omukhasi.

¹³OMWAMI yaruma omuroobi okhuhiinia abandu ba Isiraeli okhurula mubuhambe Emisiri ma abalinde bulahi.

¹⁴Abandu ba Isiraeli bachema OMWAMI oburima obululu p'pa; bakwana okhufwa khulwobubi bwabwe. OMWAMI wabwe alabahelesia esinyasio khulwes'simba murwe esia bamuleereye.