Read lunyore HOSEA 14 Bible Online

HOSEA 14 - lunyore bible

HOSEA 14

¹Kalukhe khu MWAMI Nyasaye wenywe, inywe abandu ba Isiraeli. Tsimbi tsienywe tsichil'le mwesikariye ma mukwiye.

²M'mukalukhile OMWAMI ma m'musaaye nimuboola mbu, “Okhulekhele tsimbi tsiefwe ma ohuchil'la amasaayo kefwe, nefwe khulakhwitsoomia singa obwa khwali okhwesuha.

³Asiria sianyala okhukhuhonia, khandi etsisululi tsielihe sitsinyala okhukhusoola tawe. Sinakhubool'lekhwo ebiniini mbu ninywe Nyasaye wefwe tawe. E OMWAMI oli owetsimbabasi khu yabo abali babisandu.”

⁴OMWAMI aboolanga mbu; “Nangalusie abandu banje khu ise. Nambayanze nomwoyo kwanje kwosi; sinambahambilekhwo oburima khandi tawe.

⁵Nambe singa ifula eyomusilangalangwe khubandu ba Isiraeli. Balaama esimuli singa amahuwa, balahila emisi chiabwe singa emisaala chia Lebanoni.

⁶Balaba mwoyo nende obukhuli obuhia, balaba abelikondo lilahi singa emisaala chiemiseituni, balahunya bulahi singa emisiita chia Lebanoni.

⁷Balakalukha ma bamenye hasi hobulindi bwanje. Balaraaka obuswache ma bameetekhe singa omukunda kwemisabibu. Balamanyikha singa ewaini ya Lebanoni.

⁸Abandu ba Isiraeli sibalatsilil'la okhwekayakaya ebiniini tawe. Nangalusie amasaayo kabwe nimbalinda bulahi. Nambasinge musiinikha singa omusaala okuranialanga; banyoolanga tsikhabi tsiabwe tsiosi okhurula khu ise.”

⁹Lekha yabo bosi abali nobuchesi bamanyilisie yako akahandichilwe musitapu sino, khandi bakwana okhukabiikha mumioyo chiabwe. Tsinjila tsio MWAMI netsiahabwene ne abandu abalunji bamenyanga khulwo khutsilonda, nebutswa abetsimbi besikar'ranga nibakwa sichila sibatsilondanga tawe.