Read lunyore HOSEA 2 Bible Online

HOSEA 2 - lunyore bible

HOSEA 2

¹Okulikhe Abaisiraeli basio mbu, “Abandu ba Nyasaye” khandi mbu “Abayanzwa bo MWAMI”.

²Inywe abaana banje, muhombe mama wenywe, m'muhombe kata nikali mbu ye siasili omukhasi wanje, ne ise sisili omusaatsawe khandi tawe. M'muhombe mbu alekhe obuheyi bubwe nende obutamba bubwe.

³Naralekha namunabuule tsingubo, ma namulekhe abe esihechenye singa obwa yebulwa. Namukhole abe singa esibala esiomu, esiraamangamwo esindu siosi, nase namwire nende obuluho.

⁴Khandi sindakhabeele abaana baabe esirenda tawe sichila nabaana abanyool'lwa mubuheyi.

⁵Mama wabwe yali okhuheya; khandi yakhola akesifwabwi. Ye omwene yali okhuboola: “Nanzie khubasaatsa abandayanza, yabo abambetsanga esiokhulia nende amaatsi, obuusi bwobwoya bwamakondi nende ekatani, amafura komuseituni nende ewaini.”

⁶Khulwe yako ndakhasire olukaka lwamahwa munjila yiye; khandi ndakhombokhe lisisi okhumwikal'la.

⁷Yakhalonde abasaatsa bandi nebutswa siyakhabanyoole tawe. Yakhabakhaabe ne siyakhabalole kata okhubatiila tawe. Kho yakhaboole mumwoyo kukwe mbu, “Nangalukhe khumusaatsa wanje owokhuranga, sichila olwa ndali n'naye bwali obulahi okhuyomba luno.”

⁸Ne siyali okhumanya mbu nise owali okhumuhelesia obuswache, newaini, namafura, nimumetela efetsa nende etsahabu ebia yarumikhilanga mubwekayakayi bwa Baali tawe.

⁹Khulwe yako olwe inyinga yokhuchesa yakhoole ndakhabukule obuswache bwanje okhurula khuye halala nende ewaini yanje. Khandi ndakhabukule obuusi nende ekatani bia ndamuhelesia khulwokhufunikha esihechenye sisie.

¹⁰Ne ndakhamunabuule esihechenyesie mumoni mwabasaatsabe, ne abulaho owakhamusoole okhurula mumukhono kwanje tawe.

¹¹Ndakhekal'le amasaboke kosi akabuli muhika nende akabuli omwesi nende ake Tsisabato namasabo kemilukhachie chiosi.

¹²Ndakhamulule emisabibuchie nende emikhuyuchie echia yaboolanga mbu, abasaatsabe nibo abali okhumurunga khulwo khubarumikhila. Ndakhalekhe emikundachie chiemisabibu nende echiamakhuyu okhukwa esitsiimi; etsisolo nabulimo tsiakhatsilie nitsitsiononia.

¹³Ndakhamuhe esinyasio khulwamatukhu akayanzibil'la olwa yali okhusambila Baali obwali ma niyesiaha tsingakatsie nebichendelwa ebiobukusi obukali, okhutsia okhulonda abasaatsabe, abayayanza. Ise OMWAMI mal'le okhuboola.

¹⁴Kho ndakhamuhile musitsiimi khandi ebwene yio ndakhamuhombelesie okhukalukha khu ise namang'ana kanje kobuyanzi.

¹⁵Ndakhamukalusisie emikunda chichie echiemisabibu, ne nikhola Libanda lia Akori libe omuliango kwobunaayi. Yakhangalusie olwa ndimulanga singa mumatukhu akobubukha bubwe olwa yarula musibala sie Misiri.

¹⁶Ma nilwo olwa yakhanange omusaatsa uwe khandi; ne siyakhanange mbu Baali uwe khandi tawe.

¹⁷Sindakhamuhuchil'le okhurala eliira lia Baali khandi tawe.

¹⁸Nase, khwitukhu yilio ndakhalombe indakano netsisolo tsiomubulimo namanyonyi kokhwikulu, nende ebindu ebimoolanga hasi. Khandi ndakhahinie ebikhupan'no biosi okhurula khwiloba, netsinganga tsiosi halala nobuyingo, ma ndakhachile abandu banje bamenye mumulembe.

¹⁹Isiraeli, ndakhakhuhambe obe omukhasi wanje inziayo, ndakhabe omusubilwa khandi owatooto khuibe; ndakhakhumanyie obuyanzi oburalilu nende tsimbabasi, nikhukhola obe owanje khulwe inziayo.

²⁰Ndakhakhole akandasubisia nikhukhola owanje, ne wakhamanye mbu ise nise OMWAMI.

²¹Khwitukhu yilio, ndakhakalusie amasaayo kabandu banje ba Isiraeli, ndakhakwisie ifula khusibala.

²²Esibala nasio siakhaame ebiamo biobuswache, ewaini nende amafura komuseituni.

²³Ndakhasimikhe abandu banje musibala nimbahindihasia. Ndakhamanyie obuyanzi khu uyo owalangwa mbu, “Orayanzwa.” Ne ndakhabool'le yabo abalangwanga mbu, “Abarali abandu banje” mbu, “Inywe muli abandu banje”; Nabo bakhakalusie mbu, “Ibe niwe Nyasaye wefwe.”