Read lunyore HOSEA 7 Bible Online

HOSEA 7 - lunyore bible

HOSEA 7

¹“Olwa nyenyanga okhuhonia abandu banje Abaisiraeli ma mbakhole abahinda khandi, esiandolanga mubo nobusiamu nende amabi kabakholanga. Bakaatananga abene khubene; bafunakanga tsinyumba nibenjilamwo okhwiba, banuulanga abandu khumihanda.

²Nebutswa bayibil'la mbu ndakhetsul'le emilimo chiabwe echiobumayanu. Tsimbi tsiabwe tsiabafumbila, ne tsilolekhanga mutsimoni tsianje.”

³OMWAMI aboolanga mbu, “Abandu bakaatanga omuruchi nende abemelibe namang'ana amabi kobubatsa.

⁴Yabo bosi nabaheyi, khandi sibali abahulili tawe. Okhubihil'lwa khwabwe khufwana singa amanda kang'aliye mwichiiko akarafurelwanga okhwola olwo obusie butubuywe bwerechekhele okhutekhwa.

⁵Khwitukhu libalombanga lisabo liomuruchi bamukholanga ye nende abemeli baabe okhumeela nende okhuba ebihingwa khulwo khunywa amalwa.

⁶Yee, bayitsanga singa lichiko nobusiemani bwabwe. Butukhu bwosi lirima liabwe limetekhanga ma nibusieye ne liatukha singa omul'lo.

⁷“Mwirima liabwe likali bali okhwira abaruchi babwe. Abaruchi babwe bairwa nibalondokhananga ne abulaho osaayanga khu ise nareeba obukhonyi.”

⁸OMWAMI aboolanga mbu, “Abandu ba Isiraeli bafwana singa omukaati kutekhelwe nikurayia tawe. Beletanga khumahanga kali ahembi n'nabo,

⁹ne sibamanyilisianga mbu okhweleta khubetsinzibulo tsindi khubanuulanga tsingufu tawe. Amatukhu kabwe kabalwa ne sibamanyile tawe.

¹⁰Esunga ya Baisiraeli elakayilanga mutsimoni tsiabwe. Nebutswa basili khungalukhila Ise OMWAMI Nyasaye wabwe.

¹¹Isiraeli echendachendanga bwangu singa likhuulwi lihingwa; olwokhuranga abandu balio bareeba Emisiri obukhonyi ne olundi nibelukhila khu Asiria!

¹²Nebutswa nzia khubaambula eneti ma mbafumile singa amanyonyi olwa bali mulitsia, ndabahelesia esinyasio khulwemilimo chiabwe emibi.

¹³“Balitsiboolelwa, sichila bayebera okhurula khu ise. Amanyakhano kabakwile khulwo okhukhol'la induli! Ndekombanga okhubasoola nebutswa obwekayakayi bwabwe khu ise nobwobubehi.

¹⁴Sibandakayilanga nomwoyo kwatooto tawe, nebutswa bakalakalanga hasi singa abanasibala bakholanga. Olwa basaayilanga obuswache nende ewaini, bekhalakanga singa abanasibala. Mako obwa bali abe induli.

¹⁵Kata nikali nise owabakhusia khandi nimbakufuhasia, bali okhuloosia okhusiemana.

¹⁶Batsilil'langa okhunzilukha nibatsia khunyasaye orali nobunyali. Bafwana obuyingo obwasiama oburanyala okhusubilwa. Khulwa mbu abemeli babwe bal'lomanga nomwekhonyo, nabeerwe nolukanga, ne Abaamisiri nababatsekhel'le.”