Read lunyore AMOSI 1 Bible Online

AMOSI 1 - lunyore bible

AMOSI 1

¹Kano namang'ana ka Amosi, owali omwayi okhurula mwitaala lia Tekoa. Nichisili emihika chibili esibala okhutechela, olwa Usia yali omuruchi wa Yuda ne Yeroboamu omusiani wa Yehoashi naali omuruchi wa Isiraeli, Nyasaye yabisul'la Amosi amang'ana kosi akali khu Isiraeli.

²Amosi yaboola mbu, “OMWAMI ahukumanga okhurula khusikulu sia Sayuni; omwoyokwe kuhulilikhanga okhurula Yerusalemu. Obwayilo bwomanga k'ka, khandi obunyasi obuli khubutenje bwesikulu sia Karimeli bunialanga.” Siria

³Kano niko ako MWAMI aboolanga, “Abandu ba Damasiko bakhola tsimbi ali akhenji, ne khulwa akene yaka, okhwola nambahe esinyasio. Bakhupaka abandu ba Gileadi singa obuswache bukhuywanga nende emiikho chiesibia.

⁴Kho naarume omul'lo okhusamba inyumba yoburuchi yombokhwa nomuruchi Hasaeli khandi naasambe tsiminga etsiombokhwa nomuruchi Benihadadi.

⁵Naaremanie emikal'lo chiebilibwa bia Damasiko, niikhunga abandu abamenyanga mwibanda lia Aweni nende omuruchi wa Betsiedeni. Abandu ba Siria balahilwa singa ababohe musibala sia Kiri.” Filisiti

⁶Kano niko ako MWAMI aboolanga, “Abandu ba Gasa bakhola tsimbi ali akhenji ne khulwa akene yaka okhwola nambahe esinyasio. Babukula abandu belihanga liosi ma nibatsia okhubakusia singa khubandu ba Edomu.

⁷Kho narume omul'lo khumasisi kelitookho lia Gasa ma nakusambe tsiminga tsialio tsiosi.

⁸Nambahinie khubwami abaruchi bamatookho ka Ashidodi nende Ashikeloni. Nambaane esinyasio khwitookho lia Ekironi ne Abafilisiti bosi abasikala nabafwe.” Tiro

⁹Kano niko ako MWAMI aboolanga, “Abandu ba Tiro bakhola tsimbi ali akhenji ne khulwa akene yaka, okhwola nambahe esinyasio. Babukula abandu belihanga liosi nibabahila mubuhambe musibala sia Edomu, khandi sibahesia indakano yomulembe eyabali okhulomba tawe.

¹⁰Kho naarume omul'lo khumasisi kelitookho lia Tiro ne nakusambe tsiminga tsialio tsiosi.” Edomu

¹¹Kano niko ako MWAMI aboolanga, “Abandu ba Edomu bakhola tsimbi ali akhenji, ne khulwa akene yaka, okhwola nambahe esinyasio. Babahiima abekho babwe[1]; Abaisiraeli, ne sibababeelakhwo tsimbabasi tawe. Lirima liabwe liali elinji okhusila khandi sibalilekha lihwe tawe.

¹²Kho naarume omul'lo khwitookho lia Temani ne nakusambe tsiminga tsia Bosira tsiosi.” Amoni

¹³Kano niko ako MWAMI aboolanga, “Abandu ba Amoni bakhola tsimbi ali akhenji, ne khulwa akene yaka, okhwola nambahe esinyasio. Mumahe kabwe kokhuruna liloba likali, bali kata okhwarania abakhasi abali netsinda mu Gileadi.

¹⁴Kho naarume omul'lo khumasisi kelitookho lia Rabba ne nakusambe tsiminga tsialio tsiosi. Ma nilwo khwakhabe neliyoka elinji khwitukhu lielihe, ne obulwani bwakhalule p'pa singa imbumbuyeka.

¹⁵Omuruchi wabwe nende abemelibe bakhahilwe mubuhambe musibala sindi.”