Read lunyore AMOSI 2 Bible Online

AMOSI 2 - lunyore bible

AMOSI 2

¹Moabu Kano niko ako MWAMI aboolanga, “Abandu ba Moabu bakhola tsimbi ali akhenji ne khulwa akene yaka, okhwola nambahe esinyasio. Sibahelesia oluyali amakumba komuruchi wa Edomu tawe nebutswa bali okhukasamba ma nikakwa likokhe.

²Naarume omul'lo khusibala sia Moabu, ne nakusambe tsiminga tsia Keriotsi. Abandu ba Moabu nabafwile mwiyoka liobulwani olwa abasikari nababe nibahanzukhanga ne tsinzika nitsikhupa.

³Nanzire omuruchi wa Moabu nende abemeli bandi bosi abesibala yisio.” Yuda

⁴Kano niko ako MWAMI aboolanga, “Abandu ba Yuda bakhola tsimbi ali akhenji, ne khulwa akene yaka, okhwola nambahe esinyasio. Baachaya obwibaali bwanje khandi sibalonda amalako kanje tawe. Bakosibwa nende abanyasaye bobubehi ababakuka babwe bekayakayanga.

⁵Kho naarume omul'lo khusibala sia Yuda ma nakusambe tsiminga tsia Yerusalemu.”

⁶Kano niko ako MWAMI aboolanga, “Abandu ba Isiraeli bakhola tsimbi ali akhenji, khulwa akene yako okhwola nambahe esinyasio. Bakusianga abandu abasubilwa mubuhambe abaranyala okhurunga amakobi kabwe, khandi bakusianga abatakha abaranyala okhurunga likobi liebipatipati.

⁷Basen'nanga hasi abatekhele abaranyala esindu, khandi bakurulanga abatakha okhurula munjila. Omusiani nende samwana bakonanga nomukhaana omuhambe mulala ma bafwabia eliira lianje litsienukhu.

⁸Buli siahabundu hokhwekayakayila abasaatsa beyalisiangaho khutsingubo etsiababukuye okhurula khubatakha singa esiesingo khulwokhubula okhurunga amakobi. Babukulanga ewaini okhurula khubamakobi babwe nibachinywela muhekalu ya Nyasaye wabwe.

⁹“Kata mbwo, inywe abandu banje, ndali khumuma Abaamori khulwenywe, nabo bali abasaatsa abarambi singa emisiita khandi abetsingufu singa esikhuuma.

¹⁰Khandi ndamuhinia okhurula musibala sie Misiri ma nimwemel'la khulwemihika amakhumi kane musitsiimi ma nimuhelesia esiba sia Baamori okhuba esienywe.

¹¹Ndahula abalala khubasiani benywe okhuba abaroobi ne abalala khubasiani benywe ababuukha okhuba Abanasariti[2]. Sikali mbwo, inywe abandu ba Isiraeli? Ise OMWAMI mal'le okhuboola.

¹²Nebutswa mwachila Abanasariti nibanywa ewaini khandi nimukaya abaroobi okhuboola amang'ana kanje.

¹³Ne luno namutubul'le hasi ne namubinde singa likaari elikingile amakunia kamatuma.

¹⁴Kata abandu abelukhanga tsimbilo bwangu sibalahonokokha tawe. Abandu abakufu balahwel'lwa tsingufu, kata abasikari sibalahonia obulamu bwabwe tawe.

¹⁵Abalasi bobuyingo sibalalinda tawe, abelukhi betsimbilo abalahi sibalahonokokha tawe, kata abachendelanga khutsisululi sibalahonokokha tawe.

¹⁶Litukhu yilio, abasikari abalulu balafuuba ebilasan'nwe biabwe ma beelukhe.” OMWAMI umal'le okhuboola.