Read lunyore AMOSI 3 Bible Online

AMOSI 3 - lunyore bible

AMOSI 3

¹Inywe abandu ba Isiraeli hulile amang'ana kano ako MWAMI amal'le okhuboola khwinywe, inywe lihanga liosi eliahinibwa musibala sie Misiri:

²“Ninywe mwenyene aba ndamanya mumahanga kosi akali musibala. Yako niko akachila okhwola muhelesie esinyasio khulwe tsimbi tsienywe.”

³Mbula abandu babili bakhachiaka oluchendo halala nibarahuchilisanisie?

⁴Esimba yakhahuuma mumutsuru neraluutsi esiehimanga? Mbula esimba imbuukha yakhakhaasila mulwanga lwayo neratil'le esindu noho?

⁵Mbula linyonyi liakhahambwa muluchiikha, ne oluchiikha nilurarekelwe noho? Mbula omureko kwakharekukha esindu nisiratil'lwemwo noho?

⁶Mbula olwika lwelihe lwakhakhupwa mwitookho sila okhuriisia abandu? Mbula likhupako liakhakwila litookho OMWAMI naralirumile noho?

⁷Tooto mwene, OMWAMI Nyasaye siakholanga ling'ana liosi naramanyisiekhwo lichoomolie khubarumikhilibe abaroobi tawe.

⁸Olwe esimba ehuumanga niwina oranyala okhuria? Olwo MWAMI Nyasaye al'lomanga niwina owakhasuula okhulandia amang'anake?

⁹Landie amang'ana kano khu yabo abamenyanga mutsinyumba tsioburuchi etsie Misiri nende Ashidodi, “Mwebunjikhe halala mubikulu ebili ahembi Samaria, ma mulole omunyakhano omukali okulimwo nende amabi akakholwanga ebwene yiyo.”

¹⁰OMWAMI aboolanga mbu, “Abandu yaba betsusianga tsinyumba tsiabwe tsingali nende ebindu ebiababukuye mukhuyaaka nende mubusoolo. Sibamanyile obwokhuba abasubilwa tawe.

¹¹Khulwe yako, omusuku naafumbile esibala siabwe nafunaka tsiminga tsiabwe nende okhuyaaka tsinyumba tsiabwe tsingali.”

¹²Kano niko ako MWAMI aboolanga, “Singa obwomwayi ahinianga mumunwa kwesimba ebilenje b'bili, nohomba esirwi silala esielikondi liesimba eliyekhwo, nimbwo khandi nakabe khubandu ba Samaria. Nibatititi khubo abakonanga khutsindebe tsiemito tsindahi abakhahonokokhe.

¹³Hulile luno ma muchetsiyie abolwibulo lwa Yakobo,” nimbwo OMWAMI Wokhunyala Biosi aboolanga.

¹⁴“Khwitukhu elia ndakhahelesie Abaisiraeli esinyasio khulwe tsimbi tsiabwe, ndakhafunake tsisambwa tsia Betseli. Etsikona tsia buli olusambwa tsiakhafunakwe nitsikwa hasi.

¹⁵Ndakhasambule tsinyumba etsirumikhilwanga mumatukhu kobusindu nende etsirumikhilwanga mumatukhu kom'basu tsiosi. Tsinyumba etsiang'onibwa nende ameno ketsinzofu tsiakhakwe hasi, ne buli inyumba ingali yakhakokwe hasi.”