Read lunyore AMOSI 4 Bible Online

AMOSI 4 - lunyore bible

AMOSI 4

¹Hulile kano, inywe abakhasi ba Samaria abakhomelanga singa tsing'ombe tsia Bashani etsilisibwanga bulahi. Inywe abakhupianga abatekhele esibi nende okhusandia abatakha nimulaka abasaatsa benywe mbu bamuleer're amalwa!

²Singa obwo MWAMI Nyasaye ali omutsienukhu wesuhile mbu, “Amatukhu kakhetse olwa nabamukhweese netsingaka okhumuhila ehale, siamulala khwinywe yakhafwane isuche etil'lwe neingaka.

³Mwakhakhweswe okhurul'la musianzwi sielisisi elili ahembi ma mufuubwe esioba.”

⁴OMWAMI Nyasaye aboolanga mbu, “Abaisiraeli, tsie habundu hatsienukhu Betseli ma mukhole tsimbi nikanyalikha! Tsie Giligali ma mukhole tsimbi neinjinia! Tsilil'le okhuleera emiruko chienywe khulwokhuhaana emisango chienywe chiabulitukhu, khandi muleere esielikhumi sienywe buli khwitukhu liakhataru.

⁵Mutsilil'le okhuhaana emikaati chienywe khulwokhukhupila Nyasaye embwo ma khandi mwekhoyele ebihanwa bindi ebiamuhaananga! Kano niko akamwayanza okhukhola, inywe Abaisiraeli!

⁶“Nise owali okhuleera inzala khumatookho kenywe kosi, ne kata mbwo simwali okhukalukha khu ise tawe.

⁷Khandi ndali khubisia ifula olwe biraakwa bienywe biali nibitakhanga ifula. Ndakwisianga ifula khwitookho elala ne litookho lindi sindakwisiangakhwo tawe. Ifula yakwa khumikunda mulala ne emikunda chindi chioma.

⁸Abandu bali okhuhutuuma okhurula mwitookho elala okhutsia mulindi nibarunanga amaatsi, nebutswa sibakanyoola akabahela tawe. Kata mbwo simwali okhukalukha khu ise tawe.

⁹“Ndali okhuleera obusindu okhusamba ebiraakwa bienywe. Tsisiche tsialia emikunda chienywe chiemisabibu nende emikunda chindi chiosi halala nende emikunda chiemikhuyu nende echiemiseituni. Kata mbwo simwali okhukalukha khu ise tawe.

¹⁰“Ndali okhuleera amakhupako khwinywe singa aka ndarumilakhwo Emisiri. Nder'ra abasiani benywe ababuukha mwihe ma nimbukula etsisululi tsienywe. Ndetsusia amoolu kenywe nobukundu bwabandu abafwila mukambi. Ne kata mbwo simwali okhukalukha khu ise tawe.

¹¹“Ndali okhumulula abalala khwinywe singa obwa ndamulula Sodoma nende Komora. Yabo abahonokokha khwinywe bali singa esichienga esihuywe okhurula mumul'lo. Kata mbwo, simwali okhukalukha khu ise tawe,” nimbwo OMWAMI aboolanga.

¹²“Khulwe yako nzia okhumuhelesia esinyasio, inywe abandu ba Isiraeli. Ne sichila nzia okhumukhol'la kano, kho mwerechekhe okhunyoola okhukhalachilwa khwanje.”

¹³Nyasaye niye owalomba ebikulu nende omuyeka. Nyasaye akholanga abandu okhumanya inganakani yiye, akalukhanianga om'basu okhuba obutukhu. Achendanga khubutenje bwesibala. Lino nilio eliira lilie: OMWAMI Wokhunyala Biosi!