Read lunyore AMOSI 5 Bible Online

AMOSI 5 - lunyore bible

AMOSI 5

¹Inywe abandu ba Isiraeli hulile amang'ana kolwembo lwamasika olwa nzia okhwemba khwinywe yilu:

²Isiraeli omukhaana omuchima ukwiye, khandi siyakhabuukhekhwo tawe. Akonanga hasi aha yafuubwa, ne sialiho omukhonyel'langa okhubuukha tawe.

³Kano niko aka OMWAMI Nyasaye aboolanga mbu, “Litookho elala mu Isiraeli, lirumanga abasikari elefu ndala okhutsia mwihe, ne bachelela abasikari emia ndala bonyene. Litookho lindi lirumanga abasikari emia ndala ne bachelela abasikari likhumi bonyene.”

⁴OMWAMI abool'langa abandu ba Isiraeli mbu, “Mwitse khu ise ne mulaba mwoyo.

⁵Muratsia Berisheba khulwokhwekayakaya tawe. Murateema okhuuruna Betseli tawe; Betseli sinalibeho tawe. Muratsia Giligali tawe — abandu belitookho lia Giligali bakhalachilwa okhutsia mubuhambe.”

⁶Tsie khu MWAMI nenywe mulaba mwoyo. Nimuratsia khuye, alamweya singa omul'lo okusambanga Abaisiraeli. Omul'lo kulasamba abandu ba Betseli ne sialiho owakhakusimia tawe.

⁷Wowe inywe abasiamianga amalunji nende okhukaata abandu khulwokhubahinia khukahabwene.

⁸OMWAMI yalonga tsinyininyini Kilimia nende Amayika.[3] Akalukhanianga esiilima okhuba obulafu, ne om'basu okhuba obutukhu. Alanganga amaatsi komunyanza, ma akasundula khusibala siosi. Eliiralie niye OMWAMI.

⁹Aleeranga okhumumwa khubetsingufu nende khutsiminga tsiabwe.

¹⁰Inywe musinyikhilanga omundu ofukulanga akarali akahabwene khandi ol'lomanga akatooto musiina.

¹¹Mwakhupia ababisandu esibi nimubanuula obuswache. Mwayombokha tsinyumba tsingali tsiamachina nebutswa sinamumenyemwo tawe. Mwaraaka emikunda chiemisabibu emilahi nebutswa sinamunywekhwo ewaini okhurula muchio tawe.

¹²Manyile obwa mwakhola akali amabi okhusila nende tsimbi tsinyinji etsiamwakhola. Mwakhupia abandu abalahi esibi nimubukula ebihetso khandi mwikal'langa ababisandu okhubula okhunyoola akabakhoyele musiina.

¹³Khulwe yako okhubuna tsi munyinga singa ino nilio ling'ana liobuchesi okhukhola sichila neinyinga imbi.

¹⁴Murune amalahi, tawe amabi kho mube abanyala okhumenya. Kho nilwo olwo MWAMI, Nyasaye Wokhunyala Biosi alaba n'nenywe, singa obwa muboolanga.

¹⁵Musuule akali amabi, nimuyanza akali amalahi, nimulola mbu obukhalachi bwatooto bukholwanga mumise. Haundi OMWAMI alaba netsimbabasi khubandu belihanga yili abasili mwoyo.

¹⁶Khulwe yako kano niko aka OMWAMI Nyasaye Wokhunyala Biosi aboolanga, “Okhwekhuula nende okhulakaya khwesibeela khwakhabeho mumihanda tsielitookho. Kata abalimi bakhalangwe okhwekhuula abafu halala nende yabo abarungwanga khulwokhwekhuula.

¹⁷Okhwekhuula khwakhabeho mumikunda chiemisabibu! Yaka kosi kakhekholekhe sichila ise nzitsanga okhumuhelesia esinyasio.” OMWAMI umal'le okhuboola.

¹⁸Mulitsiboolelwa inywe abekombanga litukhu lio MWAMI okhwitsa! Nibulahi sina obwa mwakhanyoole khwitukhu yilio? Khwiwe liakhabe litukhu liesiilima ne tawe eliobulafu.

¹⁹Kakhafwane singa omundu owilukhanga okhurula khusimba ne niyakaana nende eliaka. Nohomba singa omundu owinjilanga munyumba, niyesetamia khwisisi ne inzokha nemuluma.

²⁰Litukhu liokhwitsa khwo MWAMI liakhabe litukhu liesibeela ne tawe eliobusangali.

²¹OMWAMI aboolanga mbu, “Mbihil'lwanga amasabo kenywe Kedini. Sindi onyala okhukefwila tawe.

²²Kata nimundeer'ra emisango emisambe nende emisango chiobuswache sinanzihuchil'le tawe; kata sinambuchil'le ebiayo bienywe ebinolu ebiamundeer'ranga singa emisango tawe.

²³Tsie ehale neliyoka lietsinyembo tsienywe; sinyenya okhuhulila amayoosi kamatungu kenywe tawe.

²⁴Musilenje yisio akatooto kakwana okhubira singa amaatsi komuchela, ne obulunji bube singa omuchela okurakhamanga.

²⁵“Inywe abandu ba Isiraeli, ise sindamulakakhwo mundeer're emisango nende ebihanwa khulwemihika amakhumi kane etsia ndamwemel'la musitsiimi tawe.

²⁶Nebutswa luno, khulwa mbu mumal'le okhwekayakaya ebiniini bia Sakutsi, nyasaye wenywe omuruchi nende ebia Kaiwani, nyasaye wenywe wetsinyininyini, okhwola muchinge ebiniini biene yibio

²⁷olwa namuhile mubuhambe musibala esili injelekha wa Damasiko,” nimbwo OMWAMI oweliiralie ni Nyasaye Wokhunyala Biosi aboolanga.