Read lunyore AMOSI 6 Bible Online

AMOSI 6 - lunyore bible

AMOSI 6

¹Mulitsiboolelwa inywe abalitsanga obwale mwitookho lia Sayuni nende inywe abapaalanga muli nomulembe mu Samaria — inywe abemeli abakhongo belihanga likhongo lia Isiraeli inywe ababandu bareebanga obukhonyi.

²Tsie mulolekhwo litookho lia Kalineli. Ma khandi mutsie okhulola litookho lia Hamatsi ma muselengere okhwola Filisiti nende litookho lia Gatsi. Amatookho yako kali amalahi okhuyomba amahanga ka Yuda nende Isiraeli noho? Esibala siako siali esikali okhuyomba esienywe noho?

³Musuulanga okhuhuchil'la mbu litukhu liokhumululwa siliakhetse tawe, nebutswa akamukholanga kaleeranga butswa litukhu yilio ahembi.

⁴Mulitsiboolelwa inywe abelambisianga khutsindebe tsiemito, nimulia inyama yebimosi ebikhomefu nende eyebimene:

⁵Mwayanza okhukulukunza tsinyembo singa Daudi yakholanga nimutsikhupila mumatungu.

⁶Munywetsanga ewaini khutsindaabo tsingali nimwebakha amafura amalahi okhusila, nebutswa simwekhuulanga khulwo khumululwa khwa Isiraeli tawe.

⁷Khulwe yako, mwakhabe abokhuranga okhuhilwa mubuhambe. Amasabo nende obusangali bwenywe bwakhahwe.

⁸OMWAMI Nyasaye Wokhunyala Biosi uhaan'ne esiesuho siokhubachetsiyia mbu: “Mbihil'lwanga omwekhonyo kwa Baisiraeli. Njaayanga tsinyumba tsiabwe tsingali etsiang'onibwa bulahi. Nambaane litookho liabwe likali khubasuku, nende biosi ebilimwo.”

⁹Nibaba nibaliho abandu likhumi abasikala munyumba ndala, okhwola bosi bafwe.

¹⁰Omwikho womundu ofwiye, ouba nasingiliye amasika alahinia omulambo munyumba. Omwikho tsana alalangisia munyumba imwo naboola mbu, “Mbula alikhwoho munyumba imwo omundu undi wosi osikaye n'nawe?” Omwoyo kulakalusia mbu, “Abulamwo!” Ma omwikho uyo alaboola mbu, “Siling'ana! Okhwola khuhenge bulahi khurarala eliira lio MWAMI.”

¹¹Olwo MWAMI nahaane lilako, tsinyumba tsingali nende tsindititi tsilasambulwa tsiosi.

¹²Mbula etsisululi tsiakhelukhila khutsinyanda noho? Kata abandu bakhalima inyanza netsing'ombe noho? Nebutswa mwakalukhania obukhalachi obulunji okhuba esumu, ne akatooto okhuba amasiamu.

¹³Inywe mwepaakanga khulwokhufumila litaala lia Lodiba. Mwepaakanga nimuboola mbu, “Khwafumiye Karinaimu khulwe tsingufu tsiefwe abene.”

¹⁴OMWAMI Nyasaye Wokhunyala Biosi aboolanga omwene mbu, “Inywe abandu ba Isiraeli; ise namurumile abasikari bebibala biebucheni okhubukula esibala sienywe. Nabo nabamukhupie esibi okhurula khulung'anyi lwa Hamatsi oluli esinyolu okhwola khumuchela kwa Arabba ouli enandete.”