Read lunyore AMOSI 7 Bible Online

AMOSI 7 - lunyore bible

AMOSI 7

¹OMWAMI Nyasaye yali khumanyia libisulo mbu naarume tsisiche tsinyinji okhulia ebiraakwa bienywe. Yako nakekholekhe olwomuruchi nabe namal'le okhukula omukabwakwe olwe biraakwa bindi biosi nabibe nibisili okhucheswa.

²Mwibisulo yilio ndalola tsisiche nitsilitsanga esindu siosi esibisi ma nimboola mbu, “E OMWAMI Nyasaye, yanza obeele abandu baabo tsimbabasi. Bakhahonokokha mbwena? Abandubo nabatititi khandi nabatekhele.”

³OMWAMI yamala nakalukhania inganakani yiye ma naboola mbu, “Esiawali okhulola sinasiekhole tawe.”

⁴Khandi OMWAMI Nyasaye yamanyia libisulo lindi. Mwibisulo tsana ndalola niyerechekhanga okhuhaana esinyasio siokhusamba abandube. Omul'lo kwasamba inyanza ingali eli khusibala ma nikuchiaka okhusamba liloba.

⁵Nase nimboola mbu, “Lekha kabe, OMWAMI Nyasaye! Abandubo bakhahonokokha mbwena? Abandubo nibatititi khandi nabatekhele!”

⁶OMWAMI yakalukhania inganakaniye khandi ma naboola mbu, “Kano sinakekholekhekhwo tawe.”

⁷OMWAMI yamanyia libisulo lindi: Mwibisulo yilio, ndalola OMWAMI nasinjiye ahembi khwisisi eliali ndiombokhelwe khulwokhurumikhila ekapiro ne yali nekapiro tsana.

⁸OMWAMI niyareeba mbu, “Amosi, nisina esiololanga?” Nase ningalusia mbu, “Ndolanga ekapiro.” Ma naboola mbu, “Ise rumikhilanga ekapiro yiyi okhumanyia abandu banje mbu, bo bali singa lisisi liasiama. Sinangalukhanie inganakani yanje yokhubahelesia esinyasio tawe.

⁹Habundu habetsukhulu ba Isaka bekayakayilangaho hakhasambulwe. Habundu ahatsienukhu ha Isiraeli halalekhwa nihasasikhile. Nangwisie obwami bweinzu yomuruchi Yeroboamu.”

¹⁰Ma Amasia owali omwesaalisi wa Betseli narumila Yeroboamu omuruchi wa Isiraeli amang'ana mbu, “Amosi aloosianga masilisi okhukhukhol'la indiri mu Baisiraeli. Obul'lomi bubwe bwitsa okhusaalisia esibala.

¹¹Kano niko aka Amosi aboolanga mbu, ‘Yeroboamu alafwila mubulwani ne Abaisiraeli balafumilwa okhuhilwa mubuhambe.’ ”

¹²Amasia yamala nabool'la Amosi mbu, “Yako kahel'le omuroobi Amosi! Tsilil'la okhukalukha Yuda ma okambe ebwene iyo. Lekha bakhurunge khulwakene yako.

¹³Oratsilil'la okhuroobela aha Betseli hano khandi tawe. Hano nahabundu homuruchi okhwekayakayila, ahe hekalu yelihanga eli.”

¹⁴Ma Amosi nakalusia nabool'la Amasia mbu, “Ise sindi omuroobi singa abaroobi bandi abarungwanga khulwokhurooba tawe. Ise nomwayi khandi omulindi wemisaala chiemikhuyu.

¹⁵Nebutswa OMWAMI yambinia khumulimo kwanje kwobwayi khubiayo, niyambool'la mbu nzie okhuba omuroobi khubandube Abaisiraeli.

¹⁶Kho luno hulila ako MWAMI aboolanga. Umbool'langa ndekhe okhurooba khandi ndekhe okhukambila Abaisiraeli.

¹⁷Kho kano niko ako MWAMI aboolanga khuibe Amasia: ‘Omukhasiwo alakwa omutamba wokhuchenda khutsinjila mwitookho ne abaanabo abasiani nabakhaana nabeer'rwe mwihe. Emikunda chichio nachiaranibwe nichihebwa abandu bandi, nawe omwene nofwile musibala esiabandu banasibala. Khandi abandu ba Isiraeli bakhahinibwe musibala siabwe nibahilwa mubuhambe.’ ”