Read lunyore AMOSI 8 Bible Online

AMOSI 8 - lunyore bible

AMOSI 8

¹OMWAMI Nyasaye yali okhuumanyia libisulo lindi. Mwibisulo tsana ndalola indubi nelimwo amatunde.

²OMWAMI niyareeba mbu, “Amosi, nisina esiololanga yisio?” Nase ningalusia mbu, “Ndolanga indubi elimwo amatunde.” Ma OMWAMI niyambool'la mbu, “Esihesi siol'le khubandu banje Isiraeli. Sinzia okhukalukhania inganakani yanje yokhubahelesia esinyasio tawe.

³Khwitukhu yilio, tsinyembo tsiomunyumba yomuruchi tsiakhabe etsikhwisi tsiokhwekhuula. Emilambo chiabandu abafwiye chiakhabe habundu hosi ne chiakhafuubwe esioba masilisi.”

⁴Hulile kano, inywe abasen'nanga abatakha hasi khandi abateemanga okhumuma ababisandu bomusibala.

⁵Mubool'langa mumwoyo mbu, “Amatukhu kokhuhonga nakahwe lina kho khube abanyala okhukusia obuswache? Litukhu lie Sabato nalihwe lina kho khuchiake okhukusia khandi? Nilwo olwa nakhukusie obukusi obukali, nikhurumikhila ebipimo birali ebiahabwene nende okhwononia etsiratili khulwokhwibila abakuli.

⁶Khunyala okhukusia ingano imbi obukusi obukali. Nakhunyoole omundu omutakha oranyala okhurunga amakobike nohomba kata oranyala okhukula ebipatipati ma nakhumukule okhuba omusumba.”

⁷OMWAMI Nyasaye wa Isiraeli wesuhile mbu, “Sinanzibil'lekhwo amang'ana kabwe amabi akabakhola tawe.

⁸Khulwe yako, esibala siakhatechele ne buli mundu omenyangamwo yakhabe mubutinyu. Esibala siosi siakharenge nisienuya okhutsia ikulu nende hasi singa omuchela kwa Naili.

⁹Inyinga yitsanga olwa ndakhakhole eliuba okhuyeela m'mubasu hakari ne esibala okhumwama munyinga tsiom'basu. Ise OMWAMI Wokhunyala Biosi mal'le okhuboola.

¹⁰Ndakhakalukhanie amasabo kenywe kosi okhuba amasika khandi ndakhakalukhanie tsinyembo tsienywe tsiosi tsiobusangali okhuba etsikhwisi tsiesibeela. Ndakhamuhakie okhubeka amaswi kenywe nende okhwebikha tsingubo tsiamakunia ne mwakhafwane singa abebuli bekhulanga okhufwa khwomwana wabwe omutelwa. Litukhu yilio liakhabe liibi om'basu kwosi.

¹¹“Inyinga yitsanga olwa ndakhaleere inzala khusibala. Abandu bakhabe neinzala, tawe inzala yobusuma; khandi bakhabe nobuluho, tawe obuluho bwamaatsi. Bakhabe neinzala nende obuluho okhuhulila amang'ana ko MWAMI. Ise OMWAMI Wokhunyala Biosi mal'le khuboola.

¹²Bakhatimatime okhurula khunyanza okhwola khunyanza yindi, khandi okhurula esinyolu okhwola ebukwe. Bakharunilisie habundu okhunyoola amang'ana ko MWAMI, nebutswa sibakhakanyoole tawe.

¹³Litukhu yilio abasiani nende abakhaana bali nobulamu obulahi bakhakwe hasi nokhukamul'la emiiya khulwobuluho.

¹⁴Yabo abesuhanga khulwokhurumikhila ebiniini bia Samaria, nibaboola mbu ‘Muliira liomunyasaye wa Dani’ nohomba ‘Muliira liomunyasaye wa Berisheba’ — bakhakwe ne sibakhabuukhekhwo khandi tawe.”