Read lunyore AMOSI 9 Bible Online

AMOSI 9 - lunyore bible

AMOSI 9

¹Ndalola OMWAMI nasinjiye halusambwa. Yalaka naboola mbu, “Khupa butinyu etsisiilo tsie Hekalu kho omusinji kwayo kwitechele. Mutsimekule etsisiilo yitsio tsikwe khumirwe chiabandu. Ne abandu basikalanga bosi nanzir're mwihe. Abulaho owanawilukhe; abulaho kata mulala owanohonokokhe.

²Kata nibaba nibayaba obuko okhwola khusibala sie Makombe, nambafumile. Kata nibaba nibaniina okhwola mwikulu, nambesie hasi.

³Kata nibaba nibebisa khubutenje bwesikulu sia Karimeli, nambakhaabe okhwola olwa mbanyoola. Kata nibebisa okhurula khulwalo lweinyanza, nandake inzokha ingali yomunyanza okhubaluma.

⁴Kata nibaba nibahilwa mubuhambe nabasuku babwe, nandake mbu beerwe. Ndehaan'ne okhubamulula ne tawe okhubakhonya.”

⁵OMWAMI Nyasaye Wokhunyala Biosi atiilanga khusibala, ma sirenga; ma bosi abamenyangamwo beekhuula. Esibala siosi sienuyanga okhutsia ikulu nende hasi, singa omuchela kwa Naili.

⁶OMWAMI yombokha inyumbaye mwikulu, nabambula likulu okhufunikha esibala. Arumananga amaatsi komunyanza ma akatsukha khusibala. OMWAMI nilio eliiralie.

⁷OMWAMI aboolanga mbu, “Inywe abandu ba Isiraeli mufwana singa abandu ba Etsiopia khu ise. Ndahinia Abafilisiti okhurula musibala sia Kurete, ne Abasiria okhurula musibala sia Kiri singa butswa obwa ndamuhinia inywe okhurula musibala sie Misiri.

⁸Ise OMWAMI Nyasaye menganga lihanga lia Isiraeli elietsimbi yili, ne nandimulule nindihinia khusibala. Nebutswa sinamulule abolwibulo lwa Yakobo bosi tawe.

⁹“Nambane lilako ma naseletse abandu ba Isiraeli singa obuswache buchungilwanga musichungilo mutsimbia tsiosi okhuhiiniamwo yabo bosi abarali matsami.

¹⁰Abetsimbi abali mubandu banje baleer'rwa mwihe; yabo ababoolanga mbu, ‘Nyasaye sialalekha esibi siosi siitse ahakhuli tawe.’ ”

¹¹OMWAMI aboolanga mbu, “Litukhu liitsanga olwa ndakhakalusie obwami khubeinyumba ya Daudi, obwami bufwana inyumba eyasasikha. Nanyombokhe obuhia amasisi kayo ma ekalukhe imbia. Nanziombokhe obuhia ma nanzikhole nefwane singa obwa yalinji khale.

¹²Ma nilwo olwabandu ba Isiraeli bakhaleke esibala sia Edomu esiliba nisiasikala halala nende amahanga kosi akalinji akanje,” nimbwo OMWAMI aboolanga owakhachile yaka kekhole.

¹³OMWAMI aboolanga mbu, “Amatukhu kakhetse olwo obuswache bwakhalabe bwangu, okhuyomba abokhubuchesa, tsinzabibu natsio tsiakhenge bwangu okhuyomba abalombi bewaini. Ewaini indelungu yakharonye okhurula khubikulu ebirambi, ne yakharaatse okhurula khubikulu ebimbichiti.

¹⁴Ndakhakalusie abandu banje musibala siabwe. Bakhombokhe obuhia amatookho kabwe akasasikha nibamenyamwo. Bakharaake emikunda chiemisabibu nibanywa ewaini yachio. Bakharaake emikunda nibalia ebirulamwo.

¹⁵Ndakhasimikhe abandu banje musibala sia ndabahelesia, ne sibakheywe okhurula musio khandi tawe.” OMWAMI Nyasaye wenywe umal'le okhuboola.