Read lunyore YONA 2 Bible Online

YONA 2 - lunyore bible

YONA 2

¹Okhurula munda mweisuche Yona yasaaya khu MWAMI Nyasaye uwe naboola;

²“Musibeela sianje, E OMWAMI, ndali okhulanga khuibe, nawe wangalusia. Okhurula mulutungu lwesibala sie Makombe ndalakaya khulwo obukhonyi, nawe wambulila.

³Wali okhufuuba hasi mutsindungu, hasi heinyanza okhusila, aha amaatsi kosi kali okhufumbila, ne amarunda kosi akobunyalibwo nikabir'ra khu ise.

⁴Ndapaala mbu ndali nimal'le okhuhiinibwa okhurula mumoni mumwo, ma sindakhalolekhwo Ehekalu yiyo inzienukhu khandi tawe.

⁵Amaatsi keetsa khu ise ma nikamina; inyanza yafuunikha kupu, ma obulimo bwokhunyanza nibufuunikha khumurwe kwanje.

⁶Ndatsia musi mwebikulu, musibala omwe ebilibwa biasio biekala inziayo. Nebutswa ibe, E OMWAMI Nyasaye wanje wangalusia okhurula mutsindungu nindi omulamu.

⁷Olwa ndalola obulamu bwanje buhwetsekhel'langa, khe, E OMWAMI, ndasaaya khuibe, ma mu Hekalu yiyo inzienukhu wambulila.

⁸Yabo abekayakayanga ebiniini ebirali matsami, balekha obusubilwa bwabwe khuibe.

⁹Nebutswa nanyembe tsinyembo etsiokhukhwitsoomia, nakhuhanile omusango nende okhukhola akandesuha. Obuhonia burulanga khu MWAMI!”

¹⁰Khe OMWAMI nalaka isuche okhusala Yona khuluchinga lweinyanza, ma nekhola mbwo.