Read lunyore YONA 4 Bible Online

YONA 4 - lunyore bible

YONA 4

¹Yona yali om'belelu okhusila khulwe yaka ma naba nelirima.

²Kho yasaaya khu Mwami, naboola, “OMWAMI, sindaali okhuboolakhwo khale nisili okhurula ingo mbu yaka niko butswa akanokhole? Yaka niko akachila nindema akanyalikha ninzilukha okhutsia Ebuhisipania! Manyile mbu oli Nyasaye owesirenda khandi owetsimbabasi, owokhwesimilisia khasotso, owobuyanzi khasotso omwerechekhu okhusukhania amapaalo nokhubula okhuhaana esinyasio.

³Luno OMWAMI, lekha ise fwe. Bwakhabeye obulahi ise okhufwa okhuyomba okhuba omulamu.”

⁴OMWAMI namukalusia namureeba, “Kali habwene ibe okhuba nelirima?”

⁵Yona yarula natsia elubeka webukwe welitookho ma niyekhala. Nalomba esiinikha niyekhala muusi mwasio, nalindil'langa alole esinyala okhwekholekha khu Nineve.

⁶Khe OMWAMI Nyasaye namesia libono ma nalikhusia ikulu khumurwe kwa Yona okhumuhelesia esiinikha, kho limusinge khu mubasu omululu. Yona yayanzisibwa okhusila nende libono yilio.

⁷Nebutswa m'mabwebwe litukhu lialondakhwo, Nyasaye yaruma esikoko okhulia libono yilio ma nilifwa.

⁸Olunyuma, eliuba nilimal'le okhurula, Nyasaye yaruma omuyeka okuhiye pa okhurula ebukwe nende eliuba okhusamba Yona khumurwekwe ma nikachila nichiaka okhukamul'la emiiya naba ahembi okhukwa hasi. Kho yekomba okhufwa ma naboola, “Bwakhabeye obulahi ise okhufwa okhuyomba okhuba omulamu.”

⁹Nebutswa Nyasaye namubool'la, “Olikhwo nobunyali bwosi okhuba nelirima khukhufwa khwelibono?” Yona nakalusia naboola, “Ndi nobunyali okhusila okhuba nelirima — kata lirima eliokhunzira!”

¹⁰OMWAMI namubool'la, “Libono yili liali okhukhula mubutukhu bulala ma nilioma mubutukhu bwalondakhwo; siwakholakhwo esindu siosi khulio tawe, khandi sioli niwe owachila nilikhula tawe, kho esichilanga nobelela khukekhol'le khulio nisina?

¹¹Kho sikambel'le okhubelel'la Nineve, litookho likali l'la, omwa balimwo abaana abayomba etsielefu emia namakhumi kabili abarali nesikha nende ebiayo ebinji!”