Read lunyore OBUBALI 1 Bible Online

OBUBALI 1 - lunyore bible

OBUBALI 1

¹Khwitukhu liokhuranga khumwesi kwakhabili, khumuhika kwakhabili okhurula Abaisiraeli nibarula Emisiri, OMWAMI yal'loma na Musa Mwiheema liokhubaho khwo MWAMI, naboola mbu;

²“Ibe halala nende Haruni mubale abandu ba Isiraeli okhulondokhana nebilibwa biabwe nende tsinyumba tsiabwe. Muhandike amera kabasaatsa bosi

³okhurula khubemihika amakhumi kabili nende abayomba yaho abali netsingufu tsiokhulwana lihe.

⁴Ne musiolwibulo mube nomwemeli mulala owokhumukhonya.”

⁵Kano niko amera akabandu aba nabamukhonye: okhurula mulwibulo olwa Rubeni Elisuri omusiani wa Sedeuri;

⁶mulwibulo lwa Simioni, Shelumieli omusiani wa Surishadai;

⁷mulwibulo lwa Yuda, Nashoni omwana wa Aminadabu;

⁸mulwibulo lwa Isakari, Netsaneli omusiani wa Suari;

⁹mulwibulo lwa Sabuloni, Eliabu omusiani wa Heloni,

¹⁰khubaana ba Yosefu; mulwibulo lwa Efuraimu, Elishama omusiani wa Amihudi; mulwibulo lwa Manase, Gamalieli omusiani wa Pedasuri;

¹¹mulwibulo lwa Benjameni, Abidani omusiani wa Gideoni;

¹²mulwibulo lwa Dani, Abieseri omusiani wa Amishadai;

¹³mulwibulo lwa Asheri, Pagieli omusiani wa Okirani;

¹⁴mulwibulo lwa Gadi Eliasafu, omusiani wa Deweli;

¹⁵mulwibulo lwa Nafutali, Ahira omusiani wa Enani.

¹⁶Yaba nibo abeelwa khubomukanda okhuba abemeli betsinzibulo tsiabwe. Nibo abali abemeli betsinzibulo tsiabwe.

¹⁷Musa nende Haruni barumikhila abandu abamera kabwe karal'lwe yabo,

¹⁸okhulanga omukanda kwosi halala, khwitukhu liokhuranga khumwesi kwakhabili, ma nibahandika amera kabandu bosi hasi okhulondokhana netsinyumba tsiabwe khandi nebilibwa biabwe. Amera kabasaatsa bosi abali abemihika amakhumi kabili nende abayomba yaho, nibabalwa ma nibahandiikwa hasi,

¹⁹singa OMWAMI yali nalachile Musa. Yababal'la musitsiimi sia Sinai.

²⁰Abolwibulo lwa Rubeni, omwikulanda wa Isiraeli: abasaatsa bosi abemihika amakhumi kabili nende abayomba yaho, abali netsingufu tsiokhulwana lihe, Bahandiikwa amera simulala mubulondokhani bwebilibwa biabwe nende tsinyumba tsiabwe.

²¹Bosi halala, abolwibulo lwa Rubeni, bali etsielefu amakhumi kane natsisasaba netsimia tsirano.

²²Abolwibulo lwa Simioni: Abasaatsa bosi abemihika amakhumi kabili nende abayomba yaho abahel'le okhutsia mwihe bahandiikwa amera, simulala okhulondokhana nebilibwa biabwe nende tsinyumba tsiabwe.

²³Bosi ababalwa khubolwibulo lwa Simioni, bali etsielefu amakhumi karano nachirano nachine nende etsimia tsitaru.

²⁴Abolwibulo lwa Gadi: Abasaatsa bosi abemihika amakhumi kabili nende abayomba yaho abahel'le okhutsia mwihe, bahandiikwa amera simulala simulala okhulondokhana nebilibwa biabwe nende tsinyumba tsiabwe.

²⁵Bosi Ababalwa khubolwibulo lwa Gadi, bali etsielefu amakhumi kane natsirano netsimia tsisasaba namakhumi karano.

²⁶Abolwibulo lwa Yuda: Abasaatsa bosi abemihika amakhumi kabili nende abayomba yaho abahel'le okhutsia mwihe, bahandiikwa amera simulala okhulondokhana nebilibwa biabwe nende tsinyumba tsiabwe.

²⁷Bosi ababalwa khubolwibulo lwa Yuda bali etsielefu amakhumi kane nakataru natsine nende etsimia tsisasaba.

²⁸Abolwibulo lwa Isakari: Abasaatsa bosi abemihika amakhumi kabili nende abayomba yaho abahel'le okhutsia mwihe, bahandiikwa amera simulala okhulondokhana nebilibwa biabwe nende tsinyumba tsiabwe.

²⁹Bosi ababalwa khubolwibulo lwa Isakari, bali etsielefu amakhumi karano natsine netsimia tsine.

³⁰Abolwibulo lwa Sabuloni: Abasaatsa bemihika amakhumi kabili nende abayomba yaho, abahel'le okhutsia mwihe, bahandiikwa amera simulala okhulondokhana nebilibwa biabwe nende tsinyumba tsiabwe.

³¹Bosi ababalwa khubolwibulo lwa Sabuloni, bali etsielefu amakhumi karano natsine natsitaru netsimia tsine.

³²Abolwibulo lwa Yosefu: Abokhulwibulo lwa Efuraimu: Abasaatsa bosi abemihika amakhumi kabili nende abayomba yaho abahel'le okhutsia mwihe bahandiikwa amera simulala okhulondokhana nebilibwa biabwe nende tsinyumba tsiabwe.

³³Bosi ababalwa khubolwibulo lwa Efuraimu, bali etsielefu amakhumi kane netsimia tsirano.

³⁴Abokhulwibulo lwa Manase: Abasaatsa bosi abemihika amakhumi kabili nende abayomba yaho abahel'le okhutsia mwihe, bahandiikwa amera simulala okhulondokhana nebilibwa biabwe nende tsinyumba tsiabwe.

³⁵Bosi ababalwa khubolwibulo lwa Manase, bali etsielefu amakhumi kataru natsibili netsimia tsibili.

³⁶Abolwibulo lwa Benjameni: Abasaatsa bosi abemihika amakhumi kabili nende abayomba yaho abahel'le okhutsia mwihe bahandiikwa amera simulala okhulondokhana nebilibwa biabwe nende tsinyumba tsiabwe.

³⁷Bosi ababalwa khubolwibulo lwa Benjameni, bali etsielefu amakhumi kataru natsirano netsimia tsine.

³⁸Abolwibulo lwa Dani: Abasaatsa bosi abemihika amakhumi kabili nende abayomba yaho abahel'le okhutsia mwihe, bahandiikwa amera simulala okhulondokhana nebilibwa biabwe nende tsinyumba tsiabwe.

³⁹Bosi ababalwa khubolwibulo lwa Dani, bali etsielefu amakhumi kasasaba natsibili netsimia tsine natsitaru.

⁴⁰Abolwibulo lwa Asheri: Abasaatsa bosi bemihika amakhumi kabili nende abayomba yaho abahel'le okhutsia mwihe, abahandikwa amera simulala okhulondokhana nebilibwa biabwe nende tsinyumba tsiabwe.

⁴¹Bosi ababalwa khubolwibulo lwa Asheri, bali etsielefu amakhumi kane nandala netsimia tsirano.

⁴²Abolwibulo lwa Nafutali: Abasaatsa bosi abemihika amakhumi kabili nende abayomba yaho abahel'le okhutsia mwihe bahandiikwa amera simulala okhulondokhana nebilibwa biabwe nende tsinyumba tsiabwe.

⁴³Bosi ababalwa khubolwibulo lwa Nafutali, bali etsielefu amakhumi karano natsitaru netsimia tsine.

⁴⁴Yabo nibo abasaatsa aba Musa yali okhubala nali nende Haruni halala nabemeli ba Isiraeli likhumi nababili; buli mulala khubesilibwa siabwe.

⁴⁵Kho, abasaatsa bemihika amakhumi kabili nende abayomba yaho, abahel'le okhutsia mwihe babalwa okhulondokhana netsinyumba tsiabwe.

⁴⁶Bosi halala bali abasaatsa etsielefu tsimia tsisasaba natsitaru nende etsimia tsirano namakhumi karano.

⁴⁷Nebutswa abolwibulo lwa Lawi sibabal'lwa halala netsimbia tsindi tawe.

⁴⁸Okhuba OMWAMI yabool'la Musa mbu,

⁴⁹“Olwa nohandiike amera kabasaatsa abahel'le okhutsia mwihe, orabbal'lamwo olwibulo lwa Lawi tawe.

⁵⁰Nebutswa obare okhusinjil'la amang'ana ke Liheema liokhubaho khwo MWAMI nende ebindu bialio biosi. Balichingenge halala nebindu bialio biosi; nibalikhalabanila, ne nibakhoma ekambi yabwe okhulifumbel'la.

⁵¹Buli lwosi olwa mwenya okhuhiinia ekambi, Abalawi behe Liheema; ne buli lwosi olwa mwenya okhulikhoma, Abalawi balisinjisie; ne oundi wosi owakhesunda ahembi khulio aleerwa.

⁵²Ne Abaisiraeli bandi bakhomenje amaheema kabwe mumikanda chiabwe, buli mundu hakambi yabwe khandi buli mundu ahependela yabwe eli.

⁵³Nebutswa Abalawi bakhomenje akabwe okhufumbel'la Liheema liokhubaho khwo MWAMI mbu oburima bulekhe okhuba khumukanda kwa Baisiraeli; khandi balindenje Liheema eliabalekhelwa okhulinda.”

⁵⁴Kho abandu ba Isiraeli bakhola kosi ako MWAMI yali nalachile Musa okhukhola.