Read lunyore OBUBALI 10 Bible Online

OBUBALI 10 - lunyore bible

OBUBALI 10

¹OMWAMI nabool'la Musa mbu,

²“Lomba ebisiliba bibili okhurula khufetsa eyatuywa; ne obirumikhile khulwo okhulanga abandu bosi halala, nende khulwo okhusambula ekambi.

³Olwa ebisiliba biombi bikhupwa, abandu bosi bebunjikhe imbeli uwo habwinjil'lo bwe Liheema liokhubaho khwanje.

⁴Ne nibaba nibakhupa esisiliba silala sionyene, kho abakhulundu, abali abemeli bebilibwa bia Isiraeli, bebunjikhe aha oli.

⁵Ne olwe ebisiliba bihiinia amayoosi kabwangu, etsikambi etsili ebukwe tsichiake oluchendo lwatsio.

⁶Ne olwa bikhupwa okhuhiinia amayoosi kabwangu olwakhabili, etsikambi etsili enandete tsichiake oluchendo lwatsio; bikhupenje amayoosi kabwangu singa mbwo khulwa okhuchiakia tsinjendo.

⁷Nebutswa olwomukanda kwosi kwenya okhubunjelesibwa, ebisiliba bikhupwe khulwoluhono.

⁸Ne abasiani ba Haruni, abesaalisi, bakhupenje ebisiliba. Lilako yili okhwola lirumikhilwe khulweinziayo mumatukhu kosi akeetsanga.

⁹Kata olwa murula okhutsia mwihe musibala sienywe, okhulwana abasuku abamusandinjia, mukhupe ebisiliba khulwo okhumanyia mbu muli mwihe, ne ise OMWAMI Nyasaye wenywe naamukhonye, nimuhabina khubasuku benywe.

¹⁰Khandi khwitukhu liobusangali bwenywe, nohomba mumilukha chienywe, nohomba mumasabo kokhulaba khwomwesi, mukhupenje ebisiliba olwa muhaananga emisango chienywe emisambe, nende emisango chienywe chiobuhambani. Yisi silabetsanga khwinywe esiitsul'lo imbeli wanje ise Nyasaye wenywe. Ise nise OMWAMI Nyasaye wenywe.”

¹¹Mumuhika kwakhabili, mumwesi kwakhabili, khwitukhu liamakhumi kabili eliomumwesi yikwo okhurula olwa Abaisiraeli barula Emisiri, lilumbesi liarula khwiheema lio khubaho khwo MWAMI.

¹²Kho abandu ba Isiraeli bachiaka oluchendo lwabwe okhurula musitsiimi sia Sinai. Bachenda okhwola olwelumbesi liasinjila hasitsimi sia Parani.

¹³Bachiaka okhuchenda, singa OMWAMI yali nalachile Musa;

¹⁴ne buli lwosi olwa barulanga balondananga mubulosie bulala. Yabo abali hasi wependela yomukanda okwemel'lwanga nabolwibulo lwa Yuda bekholel'la okhurula mumikanda chiabwe; ne Nashoni omwana wa Aminadabu yali omwemeli wabwe.

¹⁵Ne omwemeli wolwibulo lwa Isakari yali Natsanieli omwana wa Suari.

¹⁶Ne omwemeli wolwibulo lwa Sabuloni yali Eliabu omwana wa Heloni.

¹⁷Liheema liokhubaho khwo MWAMI liasambulwanga, abesilibwa sia Gerishoni nende esia Merari, abachinganga Liheema liokhubaho khwo MWAMI nabo nibachaaka oluchendo.

¹⁸Ma yabo abali hasi wependela yekambi ya Rubeni balondakhwo mumikanda chiabwe; ne Elisuri omwana wa Shedeuri nali omwemeli wabwe.

¹⁹Ne omwemeli wolwibulo lwa Simioni yali Shelumieli omwana wa Surishadai.

²⁰Ne omwemeli wolwibulo lwa Gadi yali Eliasafu omwana wa Deweli.

²¹Ma Abalawi besilibwa sia Kohatsi balondakhwo, nibachinjile ebindu ebitsienukhu. Ne Liheema liokhubaho khwo MWAMI liasinjisibwanga nibasili okhwola ahekambi elondakhwo yakhomwa.

²²Ma yabo abali hasi wependela yekambi yolwibulo lwa Efuraimu balondakhwo, mumikanda chiabwe, ne Elishama omwana wa Amihudi nali singa omwemeli.

²³Ne omwemeli wolwibulo lwa Manase yali Gamalieli omwana wa Pedasuri.

²⁴Ne omwemeli wolwibulo lwa Benjameni yali Abidani omwana wa Gideoni.

²⁵Ma yabo abali hasi wependela yekambi yolwibulo lwa Dani, eyamalilikha khutsikambi tsiosi okhutsisinga emukongo, nibalondakhwo mumikanda chiabwe; ne Abieseri omwana wa Amishadai nali omwemeli wabwe.

²⁶Ne omwemeli wolwibulo lwa Asheri yali Pagieli omwana wa Okirani.

²⁷Ne omwemeli wolwibulo lwa Nafutali yali Ahila omwana wa Enani.

²⁸Tsinjendo tsiabandu ba Isiraeli tsiali singa mbwo, olwa basambulanga ekambi nibachaaka oluchendo.

²⁹Ne Musa yabool'la omukhwe uwe Hobabu, omusiani wa Yetsero, Omumidiani, mbu, “Khuli khuluchendo okhutsia habundu ho MWAMI yakhubool'la mbu yakhakhuhelesie. Ye wakhusubisia mbu yakhahindihasie Isiraeli, kho hamba khutsie n'nawe, nefwe nakhusange n'nawe mubuhinda bwefwe.”

³⁰Naye namukalusia mbu “Sinzia n'nenywe tawe; ngalukhanga musibala siefwe, khubolwibulo lwanje.”

³¹Musa namubool'la mbu “Khusaayanga mbu orakhulekha tawe; sichila niwe omanyile ahakhunyala okhwombokha etsikambi musitsiimi, ne olaba omwemeli wefwe.

³²Ne noba notsia n'nefwe, khulakabulana ebindu biosi ebio MWAMI nakhuhelesie.”

³³Abandu bachiaka oluchendo kho olwabandu barula khusikulu sia Sinai, esikulu esitsienukhu, bachenda khulwamatukhu kataru. Lisanduku lie Indakano yo MWAMI liali imbeli wabwe amatukhu kataru yako khulwo khubakhabila ahokhukhoma ekambi.

³⁴Lilumbesi lio MWAMI niliba ikulu wabwe m'basu, olwa bachiaka oluchendo okhurula mukambi.

³⁵Ne buli olwe Lisanduku Liendakano liarulanga, Musa yaboolanga mbu, “E OMWAMI, obuukhe! Abasukubo basalaanibwe, ma otaabie yabo abakhubihil'lwanga.”

³⁶Ne olwa liasinjilanga, yaboolanga mbu, “E OMWAMI, kalukhila Abaisiraeli etsielefu netsielefu.”